LEBITIKOS 16 - Khasi CL Bible (BSI)

Ka sngi ka jingpynïasuk

¹ U Trai u kren ha u Moses hadien ka jingïap jong ki ar ngut ki khun shynrang jong u Aaron kiba la shah pynïap mynba ki kñia ainguh ha U Trai da ka ding bymkhuid.

² U ong, “Ïathuh ha u hynmen jong me u Aaron ba dei tang ha ka por kaba dei ba un leit shadien ka jingkah jong ka jaka kaba khuid tam, namar ba dei hangta ba nga mihpaw ha u lyoh halor ka jingtap ka Synduk ka Jutang. Lada um kohnguh, un shah pynïap.

³ U lah ban rung sha ka Jaka Kaba Khuid Tam tang hadien ba u la wallam ïa uwei u masi lyngraw ban pynlong ka jingkñia namar ka pop bad ïa uwei u langbrot na ka bynta ka jingkñia ainguh thang.”

⁴ Te U Trai u la ai ïa kine ki jinghikai shuwa ba u Aaron un rung sha ka Jaka Kaba Khuid Tam, u dei ban da sum, bad nangta un kup ïa ki jaiñkup lyngdoh; ka sopti linen, ka patlun lyngkot, ka jingpanpoh, bad ka jaiñspong.

⁵ Ki Israel ki dei ban ai ïa u Aaron ar tylli ki 'langsohmoh ban pynlong ka jingkñia namar ka pop, bad uwei u langbrot na ka bynta ka jingkñia thang.

⁶ Un kñia ïa uta u masi lyngraw kum ka jingkñia ban map ïa ki pop jong u bad jong ka longïing jong u.

⁷ Nangta un shim ar tylli ki blang sha ka jingkhang jong ka Ïingjaiñ ka Jingdon Ryngkat U Trai.

⁸ Hangta un kynting sbai da ki ar tylli ki maw, uwei na ka bynta U Trai bad uwei pat na ka bynta u Asasel.

⁹ U Aaron un kñia ïa u 'langsohmoh uba hap ha U Trai da ka jingkynting sbai, bad un kñia ïa u kum ka jingkñia namar ka pop.

¹⁰ U 'langsohmoh uba hap ha u Asasel yn wallam im ha khmat U Trai bad nangta yn pyllait ïa u sha ka ri shyiap sha u Asasel, khnang ba un kit noh ïa ki pop u paidbah.

¹¹ Haba u Aaron u kñia ïa uta u masi lyngraw kum ka jingkñia namar ka pop na ka bynta ïa lade bad ka longïing jong u,

¹² un shim ïa u khiew thang jingiwbih ba la pyndap da u rnga ding barhem na ka duwan bad ar kham ka jingiwbih, bad un wanrah ïa ki sha ka Jaka Kaba Khuid Tam.

¹³ Hangta ha khmat U Trai un thang ïa kata ka jingiwbih, halor ka ding bad ka tdem jong kata ka jingiwbih kan kah ïa ka jingtap ka Synduk ka Jutang khnang ba un ym ïohi ïa ka bad u ïap.

¹⁴ Un shim khyndiat ka snam jong uta u masi lyngraw bad un synreit ïa ka da la ka shynriah'ti ha khmat kata ka jingtap, bad nangta un synreit ïa ka hynñiew sien ha khmat ka Synduk ka Jutang.

¹⁵ Hadien kata, un pynïap ïa uta u 'langsohmoh kum ka jingkñia namar ka pop na ka bynta u paidbah, un rah ïa ka snam jong u sha ka Jaka Kaba Khuid Tam, bad un synreit ïa ka halor ka jingtap bad ha khmat jong ka Synduk ka Jutang, kumba u la leh da ka snam jong uta u masi lyngraw.

¹⁶ Ha kane ka rukom un pyndep ïa ka rukom lehniam ban pynkhuid ïa ka Jaka Kaba Khuid Tam namar ka jingbymkhuid jong ki Israel bad namar ki pop jong ki baroh. U dei ban leh kumne ha ka Ïingjaiñ namar ka ïeng hapdeng ka jaka shong dara, ïa kaba la ñiew ba ka long ka bymkhuid.

¹⁷ Naduh ka por ba u Aaron u leit rung sha ka Jaka Kaba Khuid Tam ban pyndep ïa ka rukom lehniam kaba ïadei bad ka jingpynkhuid haduh ba un da mih nangta, ym bit ïano ïano ban don hapoh ka Ïingjaiñ. Ynda u la pyndep ïa kata ka rukom lehniam na ka bynta ïa lade, na ka bynta la ka longïing, bad na ka bynta u paidbah baroh,

¹⁸ un leit sha kata ka duwan ka jingainguh thang bad un pynkhuid ïa ka. U dei ban shim khyndiat na ka snam jong uta u masi lyngraw bad khyndiat na ka snam jong uta u 'langsohmoh bad un tah ïa ka ha ki reng kiba ha ki dong jong kata ka duwan.

¹⁹ Da la ka shynriah'ti un synreit khyndiat na kata ka snam ha kata ka duwan hynñiew sien. Ha kane ka rukom u dei ban pynkhuid ïa ka na ki pop jong ki paid Israel, bad un pynlong khuid ïa ka.

U 'langkitpop

²⁰ Ynda u Aaron u la lah pyndep ïa ka rukom lehniam ban pynkhuid ïa ka Jaka Kaba Khuid Tam, ïa kaba sah jong ka Ïingjaiñ ka jingdon Ryngkat U Trai, bad ïa ka duwan, un ai sha U Trai ïa uta u 'langsohmoh uba dang im uba la jied na ka bynta u Asasel.

²¹ Un buh ïa la ki kti baroh ar ha ka khlieh jong uta u 'langsohmoh, bad halor jong u un phla ïa ki jingbymman, ïa ki pop, bad ïa ki jingïaleh pyrshah baroh jong ki Israel, bad da kumta un pynkit ïa ki ha ka khlieh jong uta u 'langsohmoh. Nangta dei ban ñiah noh ïa uta u 'langsohmoh sha ka ri shyiap da u briew uba la jied kyrpang na ka bynta kata.

²² Uta u 'langsohmoh un kit lut noh ïa ki pop baroh sha ka ri kaba ym pat ju don ba sah briew.

²³ Nangta u Aaron un leit rung shapoh ka Ïingjaiñ, un law noh ïa ki jaiñkup lyngdoh kiba u la kup shuwa ba un leit rung sha ka Jaka Kaba Khuid Tam, bad un buh ïa ki hangta.

²⁴ U dei ban sum ha ka jaka kaba khuid bad phong da la ki jong ki jaiñ. Hadien kata, un mih shabar bad un kñia ïa ka jingainguh thang ban weng noh ïa ki pop jong u bad ïa ki pop jong u paidbah de.

²⁵ Un thang ha ka duwan ïa ka khleiñ jong u mrad na ka bynta ka jingainguh namar ka pop.

²⁶ Uta u briew uba leit ñiah ïa uta u 'langsohmoh sha ka ri shyiap sha u Asasel u dei ban sait ïa la ki jaiñkup bad un sum shuwa ba un wan pat shapoh ka jaka shong dara.

²⁷ Ïa uta u masi lyngraw bad ïa uta 'langsohmoh ïa kiba la kñia kum ka jingkñia namar ka pop, bad ïa kiba ka snam jong ki la leit rah sha ka Jaka Kaba Khuid Tam ban weng noh ïa ka pop, dei ban leit rah shabar ka jaka shong dara bad thang ïa ki hangta. Ïa ka snieh, ka doh, bad ki snier jong ki ruh dei ban thang lang hangta.

²⁸ Uta uba thang ïa ki u dei ban sait ïa la ki jaiñkup bad un sum shuwa ba un leit phai sha ka jaka shong dara.

Kaba rakhe ïa ka sngi ka jingpynïasuk

²⁹ Kine harum ki long ki jingbuhbeit ryntih kiba dei ban bud pateng la pateng. Ha ka sngi kaba shiphew jong u bnai uba hynñiew, ki Israel bad ki nongwei kiba shong ryngkat bad ki, ki dei ban shahjingit bad ban ym trei ïa kano kano ka kam.

³⁰ Ha kata ka sngi, dei ban pyndep ïa ki rukom lehniam ban pynkhuid ïa ki na ki pop jong ki baroh, ba kumta yn ñiew ïa ki ba ki long kiba khuid.

³¹ Kata ka sngi ka dei ban long ka sngi kaba khuid bha, ka sngi ha kaba ki shahjingit bad kim trei ïa kano kano ka kam. Kine ki dei ki jingbuhbeit ryntih ban rakhe pateng la pateng.

³² U Rangbah Lyngdoh, ïa uba la pynkupbor bad pynkyntang kum u lyngdoh ha ka jaka u kpa jong u, u dei ban pyndep ïa ka rukom lehniam kaba ïadei bad ka jingpynkhuid. U dei ban da phong ïa ki jaiñkup lyngdoh,

³³ bad un pyndep ïa ka rukom lehniam ban pynkhuid ïa ka Jaka Kaba Khuid Tam, ïa ka Ïingjaiñ ka Jingdon Ryngkat U Trai, ïa ka duwan, ïa ki lyngdoh, bad ïa u paidbah baroh.

³⁴ Kine ki long ki jingbuhbeit ryntih kiba dei ban rakhe pateng la pateng. Ïa kane ka rukom lehniam dei ban leh shisien shisnem ban pynkhuid ïa ki Israel na ki pop jong ki. Kumta u Moses u leh, kumba U Trai u la hukum ïa u.