LEBITIKOS 15 - Khasi CL Bible (BSI)

Ki jingbymkhuid ba mih na ka met u briew

¹ U Trai u ai ha u Moses bad u Aaron ïa kine harum ki jingbuhbeit ryntih na ka bynta ki paid Israel.

² Haba na uno uno u briew ka mih ka jor, kata kaba mih ka long ka bymkhuid,

³ kam pher la kata ka jor ka dang ïai mih ne ka la sangeh noh.

⁴ Kano kano ka jingthiah ha kaba u shong ne u thiah ka long ka bymkhuid.

⁵ Uno uno uba ktah ïa ka jingthiah jong u

⁶ lane uba shong ha kaei kaei kaba uta u briew u shong, u dei ban sait ïa la ki jaiñ bad un sum, bad un long u bymkhuid haduh janmiet.

⁷ Uno uno uba ktah ïa uta u briew uba mih jor u dei ban sait ïa la ki jaiñ bad un sum, bad un long u bymkhuid haduh janmiet.

⁸ Lada u briew uba mih jor u bynthiew ha uno uno uba long khuid kat kum ka jinglehniam, uta u briew u dei ban sait ïa la ki jaiñ bad un sum, bad u long u bymkhuid haduh janmiet.

⁹ Kano kano ka jin ne ka jaka shong ha kaba u briew uba mih jor u shong ka long ka bymkhuid.

¹⁰ Uno uno uba ktah ïa kano kano ha kaba uta u briew u shong u long u bymkhuid haduh janmiet. Uno uno uba rah ïa kano kano ha kaba uta u briew u shong u dei ban sait ïa la ki jaiñ bad un sum, bad u long u bymkhuid haduh janmiet.

¹¹ Lada u briew uba mih jor u ktah ïano ïano khlem da thet shuwa ïa la ki kti, uta u briew u dei ban sait ïa la ki jaiñ bad un sum, bad u long u bymkhuid haduh janmiet.

¹² Ïa uno uno u khiew khyndew ba uta u briew u ktah dei ban pynpait, bad ïa kano kano ka pliang dieng kaba u ktah dei ban da sait.

¹³ Hadien ba uta u briew u ïohkhiah na kaba mih jor, u dei ban ap hynñiew sngi bad nangta un sait ïa la ki jaiñ bad un sum ha ka umpohliew kaba sngur, te yn ñiew ïa u ba u long uba khuid.

¹⁴ Ha ka sngi kaba phra un leit rah ar tylli ki paro lane ar tylli ki lyngdkhur sha ka jingkhang jong ka Ïingjaiñ ka Jingdon Ryngkat U Trai bad un ai ha u lyngdoh.

¹⁵ U lyngdoh un kñia ïa kawei na ki kum ka jingkñia namar ka pop bad ïa kawei pat kum ka jingainguh thang. Ha kane ka rukom un pyndep ïa ka jinglehniam kaba ïadei bad ka jingpynkhuid ïa uta u briew.

¹⁶ Haba u briew u don ka jingmih jor, u dei ban sum baroh shi rynïeng, bad u long u bymkhuid haduh janmiet.

¹⁷ Kano kano kaba suh da ka jaiñ ne ka snieh ha kaba kata ka jor ka jaw dei ban sait, bad ka long ka bymkhuid haduh janmiet.

¹⁸ Hadien ka jingïathiah shongkha, baroh ar ngut u briew bad ka briew ki dei ban sum, bad ki long ki bymkhuid haduh janmiet.

¹⁹ Haba ka kynthei ka poi bnai, ka long ka bymkhuid hynñiew sngi. Uno uno uba ktah ïa ka u long u bymkhuid haduh janmiet.

²⁰ Kat ha kaba ka shong ne thiah ha ka por ba ka poi bnai kata ka long ka bymkhuid.

^21-23 Uno uno uba ktah ïa ka jingthiah jong ka ne ïa kaei kaei ha kaba ka shong, u dei ban sait ïa la ki jaiñ bad un sum, bad u long u bymkhuid haduh janmiet.

²⁴ Lada uno uno u briew u ïathiah shongkha bad ka ha ka por ba ka poi bnai, u ruh u ïabit ïa ka jingbymkhuid jong ka bad u long u bymkhuid haduh hynñiew sngi, bad kano kano ka jingthiah ha kaba u thiah ka long ka bymkhuid.

²⁵ Lada ka kynthei ka ïoh ïa ka jingpang mihsnam bun sngi haba kam dei ka por poi bnai jong ka, lane lada ka jingmihsnam jong ka, ka dang ïai bteng hadien ba la kut ka jingpoi bnai jong ka, ka long ka bymkhuid katba kata ka jingmihsnam ka dang don, kumba ka long ha ka por ba ka poi bnai.

²⁶ Kano kano ka jingthiah ha kaba ka thiah bad kaei kaei baroh ha kaba ka shong ha kum kata ka por ka long ka bymkhuid.

²⁷ Uno uno uba ktah ïa kita u long u bymkhuid bad u dei ban sait ïa la ki jaiñ bad un sum; u long u bymkhuid haduh janmiet.

²⁸ Hadien ba kata ka jingmihsnam ka la sangeh, ka dei ban ap sa hynñiew sngi, bad nangta yn sa ñiew ba ka long kaba khuid.

²⁹ Ha ka sngi kaba phra, kan leit rah ar tylli ki paro lane ki lyngdkhur sha u lyngdoh ha ka jingkhang jong ka Ïingjaiñ ka Jingdon Ryngkat U Trai.

³⁰ U lyngdoh un kñia ïa kawei na ki kum ka jingkñia namar ka pop bad kawei pat kum ka jingainguh thang, bad ha kata ka rukom un pyndep ïa ka jinglehniam kaba ïadei bad ka jingpynkhuid ïa ka.

³¹ U Trai u ong ïa u Moses ban maham ïa ki paid Israel shaphang ka jingbymkhuid jong ki, ïoh ba ki pyntngit ïa ka Ïingjaiñ ka Jingdon Ryngkat jong U, kaba don hapdeng ka jaka shong dara. Lada ki leh kumta, kin shah pynïap.

³² Kine ki long ki jingbuhbeit ryntih ba ïadei bad u briew haba don ka jingmih jor na u,

³³ ka kynthei haba ka poi bnai, lane u briew haba u ïathiah shongkha bad ka kynthei ïa kaba la ñiew ka bymkhuid.