LEBITIKOS 14 - Khasi CL Bible (BSI)

Ka jingpynkhuid hadien ba la ïoh ïa ka jingpang sniehdoh

¹ U Trai u ai ha u Moses

² ïa kine ki jingbuhbeit ryntih kiba ïadei bad ka jingpynkhuid ïa u briew uba la koit na ka jingpang 'ñiangthohlieh. Ha kata ka sngi ha kaba yn pynkhuid ïa u, yn wallam ïa u ha khmat u lyngdoh,

³ bad u lyngdoh un ïalam ïa u shabar ka jaka shong dara, bad un khmih bha ïa u.

⁴ Lada kata ka jingpang ka la jem, u lyngdoh un hukum ba yn wanrah ar tylli ki sim ïa kiba la ñiew ba ki long kiba khuid ryngkat bad uwei u lyngkhot dieng Kedar, u 'saiwul uba saw, bad uwei u tnat Hissop.

⁵ Nangta u lyngdoh un hukum ban pynïap ïa kawei na kita ki sim halor u khiew khyndew ha uba don ka um kaba sngur na ka umpohliew.

⁶ Un shim sa ïa kawei pat ka sim, ïa u lyngkhot dieng Kedar, ïa u 'saiwul uba saw, bad ïa u tnat Hissop, bad un wieh lang ïa ki ha ka snam jong kata ka sim kaba u la pynïap.

⁷ Un synreit ruh hynñiew sien ïa kata ka snam ha ka met uta u briew ïa uba yn dang pynkhuid na ka jingpang 'ñiangthohlieh, bad hadien kata un sa pynbna ba u long uba khuid. Un pyllait noh ïa kata ka sim kaba dang im ba kan her kat shaba ka mon.

⁸ Uta u briew pat un sait ïa la ki jaiñ, un khi lut ïa la u shñiuh, bad un sum un sleh; te un sa long uba khuid. U lah ban wan rung sha ka jaka shong dara, hynrei u dei ban shong shabar ka ïingjaiñ jong u hynñiew sngi lynter.

⁹ Ha ka sngi kaba hynñiew, un khi biang ïa la u 'ñiuhkhlieh, u 'ñiuhtmoh, u 'ñiuhmat, bad u shñiuh baroh na ka met jong u; un sait ruh ïa la ki jaiñ, bad un sum un sleh de, bad nangta un sa long uba khuid.

¹⁰ Ha ka sngi kaba phra, un wallam ar tylli ki khunlangbrot shynrang bad kawei ka langbrot kynthei kaba shisnem, ki bym don kano kano ka jingduna, lai kilo u 'purew ba la khleh bad ka umphniang Olib, bad kumba shi bynta na ka lai bynta ka umphniang Olib.

¹¹ U lyngdoh un ïalam ïa uta u briew lem bad ïa kita ki jingainguh jong u ha khmat ka jingkhang ka Ïingjaiñ ka Jingdon Ryngkat U Trai.

¹² Nangta un shim ïa uwei na ki khunlangbrot shynrang, ryngkat bad ka shi bynta na ka lai bynta ka umphniang, bad un ai kum ka jingainguh namar ka jingleh palat. Un ai ïa ki kum ka jingai kaba kham kyrpang ha U Trai na ka bynta u lyngdoh.

¹³ Un pynïap ïa uta u khunlangbrot ha ka jaka kaba kyntang ha kaba la ju pynïap ïa ki jingri na ka bynta ki jingkñia namar ka pop bad ïa ki jingkñia ainguh thang. U dei ban leh ïa kane namar ba ka jingkñia na ka bynta ka jingpalat, kumba long ka jingkñia namar ka pop, ka dei ka jong u lyngdoh, bad ka long kaba khuid bha.

¹⁴ U lyngdoh un shim khyndiat na ka snam jong u khunlangbrot bad un tah ïa ka ha ka shkor kamon, ha ka 'tikmie kamon, bad ha ka 'jatkmie kamon jong uta u briew ïa uba yn pynkhuid.

¹⁵ U lyngdoh un shim ruh khyndiat ka umphniang Olib bad un theh ïa ka ha la ka sla'ti kadiang,

¹⁶ un wieh ïa la ka shynriah'ti kamon hangta, bad un synreit khyndiat na ka, hynñiew sien hangta ha khmat U Trai.

¹⁷ Un shim ruh khyndiat ka umphniang na la ka sla'ti bad khyndiat ka snam jong u khunlangbrot bad un tah ha ka shkor kamon, ka 'tikmie kamon, bad ka 'jatkmie kamon jong uta u briew ïa uba yn pynkhuid.

¹⁸ Ïa ka umphniang kaba dang sah ha ka sla'ti un kyllan ha ka khlieh jong uta u briew. Kumne keiñ u lyngdoh un pyndep ïa ka rukom lehniam kaba ïadei bad ka jingpynkhuid.

¹⁹ Nangta pat u lyngdoh un pynlong sa ïa ka jingkñia namar ka pop, bad un pyndep ïa ka jinglehniam kaba ïadei bad ka jingpynkhuid. Hadien kata, un pynïap ïa uta u jingri namar ka jingainguh thang,

²⁰ bad un kñia ïa u bad ka jingainguh bam halor ka duwan. Kumne keiñ u lyngdoh un pyndep ïa ka rukom lehniam kaba ïadei bad ka jingpynkhuid, bad uta u briew un sa long uba khuid.

²¹ Lada uta u briew u long uba duk bad um kotbor haduh katta, un wallam na ka bynta ka jingpynkhuid tang uwei u khunlangbrot kum ka jingkñia namar ka jingpalat, kaba long ka jingai kaba kyrpang ha U Trai na ka bynta u lyngdoh. Un wanrah ruh tang shi kilo u 'purew ba la khleh bad ka umphniang Olib ban pynlong ka jingkñia ainguh bam bad sa kumba shi bynta na ka lai bynta ka umphniang Olib.

²² Un wallam ruh ar tylli ki paro ne ki lyngdkhur, kawei na ka bynta ka jingkñia namar ka pop, bad kawei pat na ka bynta ka jingkñia ainguh thang.

²³ Un wallam ïa ki sha u lyngdoh ha ka jingkhang ka Ïingjaiñ ha ka sngi kaba phra jong ka jingpynkhuid ïa u.

²⁴ U lyngdoh un shim ïa uta u khunlangbrot bad ïa kata ka umphniang Olib bad un ai ïa ki kum ka jingai kaba kyrpang ha U Trai na ka bynta u lyngdoh.

²⁵ Un pynïap ïa uta u khunlangbrot bad un shim khyndiat ka snam bad un tah ïa ka ha ka shkor kamon jong uta u briew, ka 'tikmie kamon jong u, bad ha ka 'jatkmie kamon jong u.

²⁶ Uta u lyngdoh un theh khyndiat ka umphniang ha la ka sla'ti kadiang,

²⁷ bad da la ka shynriah'ti kamon un synreit khyndiat ïa ka, hynñiew sien hangta ha khmat U Trai.

²⁸ Un pyndei ruh khyndiat ka umphniang ha kijuh ki jaka ha kiba u la tah snam: ha ka shkor kamon jong uta u briew, ka 'tikmie kamon jong u, bad ha ka 'jatkmie kamon jong u.

²⁹ Ïa kaba dang sah na kata ka umphniang un kyllan ha ka khlieh jong uta u briew, bad da kumta un pyndep ïa ka rukom lehniam kaba ïadei bad ka jingpynkhuid.

³⁰ Nangta un kñia ïa kawei na kita ki paro lane ki lyngdkhur

³¹ kum ka jingkñia namar ka pop, bad ïa kata kawei pat kum ka jingainguh thang ryngkat bad ka jingainguh bam. Kumne keiñ uta u lyngdoh un pyndep ïa ka niam ka rukom kaba ïadei bad ka jingpynkhuid.

³² Kane ka long kata ka hukum na ka bynta uta u briew uba ïoh ïa ka jingpang 'ñiangthohlieh hynrei u bym kotbor ban wallam ïa ki jingainguh kumba ju long ka rukom ïa kiba yn pyndonkam ha ka jingpynkhuid ïa u.

Ka jingpang bthuh hapoh ïing

³³ U Trai u ai ha u Moses bad u Aaron

^34-35 ïa kine ki jingbuhbeit ryntih kiba ïadei bad ki ïing kiba bit bthuh. (Kine kin treikam hadien ba ki Israel ki la rung sha ri Kanaan, ha kaba U Trai un ai ha ki kum ka jingïohkynti.) Lada uno uno u shem ba U Trai u phah ïa ka jingpang bthuh ha ka ïing jong u, te u dei ban leit ïathuh ha u lyngdoh shaphang kata.

³⁶ U lyngdoh un hukum ba dei ban pynmih lut napoh ïing ïa ki tiar ki tar baroh shuwa ba un leit khmih ïa kata ka jingbthuh; lym kumta, yn pynbna ba baroh kaba don ha kata ka ïing ka long ka bymkhuid. Nangta un sa leit rung shapoh ïing bad un khmih bha ïa kata ka jingbthuh.

³⁷ Lada don ki dak lam jyrngam lane lam saw kiba paw kumba ki la ngam ha ka kynroh,

³⁸ un mihnoh na kata ka ïing bad un khang ïa ka hynñiew sngi.

³⁹ Ha ka sngi kaba hynñiew, un leit biang bad khmih bha ïa kata ka jingbthuh.

⁴⁰ Lada ka la pur, un hukum ba dei ban weng noh ïa ki maw ha kiba la bit bthuh bad bret noh ïa ki sha ka jaka theh ñiut shabar shnong.

⁴¹ Hadien kata, un phah khrud ïa ki kynroh baroh hapoh ïing, bad bret ïa kata ka khyndew shabar shnong ha ka jaka theh ñiut.

⁴² Nangta un bujli da kiwei pat ki maw ha ka jaka kita kiba la weng noh, bad yn sa ñiad astor thymmai ïa kita ki kynroh.

⁴³ “Lada ka jingbthuh ka paw biang ha kata ka ïing hadien ba la weng noh ïa kita ki maw bad hadien ba la khrud bad la ñiad astor thymmai ruh ïa ka, u lyngdoh un leit khmih bha ïa ka.

⁴⁴ Lada ka la pur, kata ka ïing ka long ka bymkhuid.

⁴⁵ Dei ban lied noh ïa ka, bad ïa ki maw, ki dieng, bad ka sorki jong ka baroh dei ban kit shabar shnong bad bret ha ka jaka theh ñiut.

⁴⁶ Uno uno u briew uba leit rung ha kata ka ïing kaba dang khang un long u bymkhuid haduh janmiet.

⁴⁷ Uno uno ruh uba thiah lane bam ha kata ka ïing u dei ban da sait ïa la ki jaiñ.

⁴⁸ “Lada, haba u lyngdoh u la wan khmih bha, bad u ïohi ba kata ka jingbthuh kam shym paw shuh hadien ba la ñiad astor biang, u dei ban pynbna ba kata ka ïing ka long kaba khuid, namar ba kata ka jingbthuh ka la jah lut.

⁴⁹ Ban pynkhuid ïa kata ka ïing, un shim ar tylli ki sim, khyndiat u lyngkhot dieng Kedar, u 'saiwul uba saw, bad uwei u tnat Hissop.

⁵⁰ Un pynïap ïa kawei na kita ki sim halor u khiew khyndew ha uba don ka um kaba sngur na ka umpohliew.

⁵¹ Nangta un shim ïa uta u lyngkhot dieng Kedar, ïa u tnat Hissop, ïa u 'saiwul saw, bad ïa kata ka sim kaba dang im, bad un wieh lang ïa ki ha ka snam jong kata ka sim kaba u la pynïap bad ha kata ka um sngur, bad un synreit hynñiew sien ïa kata ka ïing.

⁵² Ha kane ka rukom un pynkhuid ïa kata ka ïing da ka snam jong kata ka sim, ka um sngur, ka sim kaba dang im, u lyngkhot dieng Kedar, u tnat Hissop, bad u 'saiwul saw.

⁵³ Nangta un pyllait ïa kata ka sim ba kan her noh shabar ka nongbah kat shaba ka mon. Da kumta un pyndep ïa ka niam ka rukom kaba ïadei bad ka jingpynkhuid ïa kata ka ïing, bad kan sa long kaba khuid.”

⁵⁴ Kine ki long kita ki aiñ shaphang ka jingpang 'ñiangthohlieh;

^55-56 shaphang ka prum, u tohjaw, lane ka jingtyrha sniehdoh; bad shaphang ka jingbthuh ha ki jaiñ lane hapoh ïing.

⁵⁷ Kine ki aiñ ki batai shai kumno yn leh haba kaei kaei ka long ka bymkhuid bad haba ka la long khuid.