LEBITIKOS 13 - Khasi CL Bible (BSI)

Ki Aiñ shaphang ka jingpang sniehdoh

¹ U Trai u ai ha u Moses bad u Aaron ïa kine harum ki jingbuhbeit ryntih.

² Lada uno uno u briew u mih prum, lane u mih tohjaw, lane u tyrha ka sniehdoh, bad kata ka lah ban kylla sha ka jingpang 'ñiangthohlieh, dei ban leit ïalam ïa u ha u lyngdoh uba na ka longïing jong u Aaron.

³ U lyngdoh un khmih bniah ïa kata ka prum, bad lada u shñiuh hangta u la kylla lieh bad kata ka prum ka i kumba ka kham jylliew ban ïa ka sniehdoh sawdong jong ka, kata ka dei ka jingpang 'ñiangthohlieh, bad u lyngdoh un pynbna ba uta u briew u long u bymkhuid.

⁴ Hynrei lada kata ka prum ka long kaba lieh, bad kam shym paw ba ka kham jylliew ban ïa ka sniehdoh sawdong jong ka, bad u shñiuh ha kata ka prum ruh um pat lieh, u lyngdoh un pynkyrpang ïa uta u briew hynñiew sngi.

⁵ U lyngdoh un khmih biang ïa u ha ka sngi kaba hynñiew, bad lada ha ka jingshem jong u ba kata ka prum ka long kumjuh bad kam shym pur, un pynkyrpang ïa u sa hynñiew sngi.

⁶ Hadien hynñiew sngi, u lyngdoh un khmih biang ïa u, bad lada kata ka prum ka la nang jah bad kam shym pur satia, un pynbna ba uta u briew u long uba khuid; ka dei tang ka prum. Uta u briew un sait ïa la ki jaiñ, bad un long uba khuid.

⁷ Hynrei lada kata ka prum ka pur pat hadien ba u lyngdoh u la khmih bniah ïa u bad u la pynbna ba u long uba khuid, u dei ban leit pyn-i biang ïa lade ha u lyngdoh.

⁸ U lyngdoh un khmih bniah ïa u sa shisien, bad lada kata ka prum ka la pur, un pynbna ba u long u bymkhuid; ka dei ka jingpang 'ñiangthohlieh.

⁹ Lada uno uno u briew u ngat ïa ka jingpang 'ñiangthohlieh, dei ban ïalam ïa u ha u lyngdoh,

¹⁰ u ban khmih bniah ïa u. Lada ka don ka prum kaba lieh ha ka sniehdoh jong u kaba la pynlieh ïa u shñiuh bad kaba dap da ka ksuit,

¹¹ kata ka dei ka jingpang 'ñiangthohlieh kaba la shong slem. U lyngdoh un pynbna ba uta u briew u long u bymkhuid. Ym da donkam ban pynkyrpang ïa u, naba u la long lypa u bymkhuid.

¹² Lada kata ka jingpang 'ñiangthohlieh ka la pur ha ka met jong u naduh khlieh haduh kjat,

¹³ u lyngdoh un khmih bniah biang ïa uta u briew. Lada u shem ba kata ka jingpang 'ñiangthohlieh ka la sop shisha ïa ka met jong u baroh shi rynïeng, un pynbna ba uta u briew u long uba khuid. Lada ka sniehdoh jong u baroh ka la kylla lieh un long uba khuid.

¹⁴ Hynrei naduh ka por ba ka prum ka mih biang, u kylla long u bymkhuid.

¹⁵ U lyngdoh un khmih bniah ïa u, bad lada u ïohi ïa ka prum, un pynbna ba uta u briew u long u bymkhuid. Ka prum ka pyn-i ba ka dei ka jingpang 'ñiangthohlieh, bad uta u briew u long u bymkhuid.

¹⁶ Hynrei haba kata ka prum ka la jem bad ka la kylla lieh biang, uta u briew u dei ban leit sha u lyngdoh, u ban khmih bniah biang ïa u.

¹⁷ Lada kata ka prum ka la kylla lieh, uta u briew u long uba khuid, bad uta u lyngdoh un pynbna ba uta u long uba khuid.

¹⁸ Haba uno uno u briew u mih tohjaw bad u la jem,

¹⁹ bad lada hadien, ha kata ka jaka ba mih u tohjaw, ka don ka jingat kaba lieh ne ka dak kaba byrsaw-lieh, u dei ban leit pyn-i ha u lyngdoh.

²⁰ U lyngdoh un peit bniah ïa u, bad lada kata ka dak ka paw ba ka kham jylliew ban ïa ka sniehdoh sawdong jong ka bad ba u shñiuh hangta ruh u la kylla lieh, un pynbna ba uta u long u bymkhuid. Kata ka dei ka jingpang 'ñiangthohlieh kaba sdang na uta u tohjaw.

²¹ Hynrei ynda u lyngdoh u la peit bniah ïa kata ka dak bad u shem ba u shñiuh uba hangta um pat kylla lieh, bad ba kam long kaba kham jylliew ban ïa ka sniehdoh sawdong jong ka hynrei ka stang ha ka rong, u lyngdoh un pynkyrpang ïa u hynñiew sngi lynter.

²² Lada kata ka dak ka pur, u lyngdoh un pynbna ba uta u long u bymkhuid; u la bit jingpang.

²³ Hynrei lada ka sah kumjuh bad kam shym pur, ka long tang ka sohkhliang kaba sah dak na u tohjaw, bad u lyngdoh un pynbna ba uta u long uba khuid kat kum ka jinglehniam.

²⁴ Haba u briew u khluit ding, bad lada ka sniehdoh ka kylla lieh ne lam byrsaw-lieh, u lyngdoh un peit bniah ïa u.

²⁵ Lada u shñiuh ha ka dak khluit ding u la kylla lieh bad kata ka dak ka kham jylliew ban ïa ka sniehdoh sawdong jong ka, kata ka dei ka jingpang 'ñiangthohlieh kaba la sdang na kata kaba khluit ding, bad u lyngdoh un pynbna ba uta u long u bymkhuid.

²⁶ Hynrei lada u shñiuh ha kata ka dak um kylla lieh, bad kata ka dak kam long kaba kham jylliew ban ïa ka sniehdoh sawdong jong ka, hynrei ka stang ha ka rong, u lyngdoh u dei ban pynkyrpang ïa u hynñiew sngi lynter.

²⁷ Ha ka sngi kaba hynñiew u lyngdoh un peit bniah biang ïa u, bad lada ka la pur, kata ka dei ka jingpang 'ñiangthohlieh, bad u lyngdoh un pynbna ba uta u long u bymkhuid.

²⁸ Hynrei lada kata ka dak ka sah kumjuh, bad kam shym pur satia, hynrei ka stang ha ka rong, kata kam dei ka jingpang 'ñiangthohlieh. U lyngdoh un pynbna ba uta u long uba khuid, namar ka dei tang ka sohkhliang na kata ka dak ing ding.

²⁹ Lada u briew ne ka briew ki mih prum ha ka khlieh ne ha ka tmoh, u lyngdoh un peit bniah ïa ka.

³⁰ Lada ka paw ba ka kham jylliew ban ïa ka sniehdoh sawdong jong ka, bad u shñiuh hangta u lam stem bad stang, kata ka dei ka jingpang 'ñiangthohlieh, bad un pynbna ba uta u briew u long u bymkhuid.

³¹ Lada, haba u lyngdoh u la peit bniah ïa u, u shem ba kata ka prum kam shym long kaba kham jylliew ban ïa ka sniehdoh sawdong jong ka, hynrei ym pat shym don shñiuh ïong hangta, yn pynkyrpang ïa u hynñiew sngi lynter.

³² U lyngdoh un khmih biang ïa kata ka prum ha ka sngi kaba hynñiew, bad lada kam pat pur lane ym don u shñiuh uba lam stem ha ka, bad kam paw ruh ba ka kham jylliew ban ïa ka sniehdoh sawdong jong ka,

³³ uta u briew un khi lyndum ïa la ka khlieh, lait noh ïa ka jaka bit prum. U lyngdoh un pynkyrpang ïa u sa hynñiew sngi.

³⁴ Ha ka sngi kaba hynñiew u lyngdoh un peit biang ïa kata ka prum, bad lada kam pat pur bad kam kham jylliew ban ïa ka sniehdoh sawdong jong ka, un pynbna ba uta u long uba khuid. Uta u briew un sait ïa la ki jaiñkup bad un long uba khuid.

³⁵ Hynrei lada kata ka prum ka pur hadien ba la pynbna ba uta u long uba khuid,

³⁶ u lyngdoh un peit biang ïa u. Lada kata ka prum ka la pur shisha, um donkam ban da khmih sa ïa u shñiuh ba lam stem; ka la paw shai hi ba u long u bymkhuid.

³⁷ Hynrei lada ha ka jingkhmih jong u lyngdoh ka prum kam shym pur, bad u shñiuh uba ïong u la sdang mih hangta, kata ka prum ka la jem, bad u lyngdoh un pynbna ba uta u long uba khuid.

³⁸ Haba u briew ne ka briew ki don ki dak thohlieh ha ka sniehdoh jong ki, u lyngdoh un khmih bniah ïa uta u briew.

³⁹ Lada kita ki dak ki long kiba lieh blad, ki dei tang ki dak thohbria ha ka sniehdoh jong u; uta u briew u long uba khuid.

^40-41 Lada u briew u hap shñiuh na shadien ne na sha khmat ka khlieh jong u, kata kam pynlong ïa u bymkhuid.

⁴² Hynrei lada ka prum kaba byrsaw-lieh ka mih ha ka jaka hap shñiuh, ka dei ka jingpang 'ñiangthohlieh.

⁴³ U lyngdoh u dei ban khmih bha ïa u, bad lada ka don shisha ka prum kaba byrsaw-lieh,

⁴⁴ u lyngdoh un rai ïa u ba u long u bymkhuid, namar ba ka jingpang 'ñiangthohlieh ka la don ha ka khlieh jong u.

⁴⁵ U briew uba la ïoh ïa ka jingpang 'ñiangthohlieh u dei ban phong da ki jaiñjot, un ieh khlem sad ïa la u shñiuh, un tap ïa la ka khmat naduh ki rmiang shyntur sharum, bad un pyrta, “U bymkhuid, u bymkhuid!”

⁴⁶ Un ïaisah u bymkhuid katba kata ka jingpang ka dang don, bad u dei ban sah kyrpang shabar ka jaka shong dara, jngai na kiwei pat.

Ki Aiñ namar ka jingpang bthuh

⁴⁷ Lada don ka jingbthuh ha ka jaiñkup la ka jaiñ 'saiwul ne ka jaiñ linen,

⁴⁸ lane ha kano kano ka lyngkhot jaiñ linen ne jaiñ 'saiwul, lane ha ka snieh, lane ha kaei kaei kaba la shna da ka snieh,

⁴⁹ lada ka dei kaba lam jyrngam lane kaba lam saw, ka dei ka jingbthuh kaba pur bad dei ban leit pyn-i ïa ka ha u lyngdoh.

⁵⁰ U lyngdoh un khmih bha ïa ka, bad un buh kyrpang ïa kata kaba la bit bthuh haduh hynñiew sngi.

⁵¹ Un khmih bha pat ïa ka ha ka sngi kaba hynñiew, bad lada kata ka jingbthuh ka la pur, kata ka long ka bymkhuid.

⁵² U lyngdoh u dei ban thang noh ïa ka, namar ka dei ka jingpang bthuh kaba pur, kaba dei ban pynduh da ka ding.

⁵³ Hynrei lada hadien ba u la khmih bha ïa ka, u lyngdoh u shem ba kata ka jingbthuh kam shym pur,

⁵⁴ un hukum ba dei ban sait ïa ka, bad buh kyrpang ïa ka sa hynñiew sngi.

⁵⁵ Hadien kata un khmih bha ïa ka, bad lada kata ka jingbthuh kam kylla rong, wat la kam pur, ka dang long hi ka bymkhuid; dei ban thang noh ïa ka, kam pher la kata ka jingbthuh ka long na shapoh ne shalor.

⁵⁶ Hynrei, haba u lyngdoh u la khmih bha pat ïa ka, lada kata ka jingbthuh ka la nang duna, u dei ban tar noh ïa kata kaba la bit bthuh na kata ka jaiñ ne na kata ka snieh.

⁵⁷ Te, lada ka jingbthuh ka paw biang, ka mut ba ka la wan pur biang, bad u trai u dei ban thang noh ïa ka.

⁵⁸ Lada u sait ïa kata bad ka jingbthuh ka jah noh, u dei ban sait biang ïa ka sa shisien, bad kan sa long kaba khuid.

⁵⁹ Kane keiñ ka long kata ka aiñ kaba ïadei bad ka jingbthuh ha ka jaiñkup, la ka dei kaba da u 'saiwul ne da ka linen, lane ha kaei kaei kaba la shna da ka snieh, dei ha kane ka rukom yn bishar la ka long kaba khuid ne ka bymkhuid.