LEBITIKOS 12 - Khasi CL Bible (BSI)

Ka jingpynkhuid ïa ki kynthei hadien ka jingkha khun

¹ U Trai u ai ha u Moses ïa kine harum ki jingbuhbeit ryntih na ka bynta ki Israel.

² Hynñiew sngi hadien ba ka kynthei ka kha khun shynrang, kan long ka bymkhuid, kumba ka long ha ka por ba ka poi bnai.

³ Ha ka sngi kaba phra dei ban otsher ïa uta u khunlung.

⁴ Nangta kan shim por pat sa laiphew lai sngi ba yn ñiew ïa ka kaba la khuid biang na ka jingmihsnam. Kam dei ban ktah ïa kaei kaei kaba khuid lane rung sha ka Ïingjaiñ tad ynda la kut ka por pynkhuid ïa ka.

⁵ Khatsaw sngi hadien ba ka kynthei ka kha khun kynthei, kan long ka bymkhuid kum ha ka por ba ka poi bnai. Nangta kan shim por pat sa hynriewphew hynriew sngi ba yn ñiew ïa ka kaba la khuid biang na ka jingmihsnam.

⁶ Ynda ka por pynkhuid ïa ka, ka la kut, la ka long na ka bynta u khun ne ka khun, ka dei ban wallam sha u lyngdoh ha ka jingkhang jong ka Ïingjaiñ ka Jingdon Ryngkat U Trai ïa u khunlangbrot uba shisnem kum ka jingainguh thang bad ïa ka lyngdkhur ne ka paro kum ka jingainguh namar ka pop.

⁷ U lyngdoh un kñia ïa ka jingainguh jong ka ha U Trai bad un pynlong ka jinglehniam ban shim noh ïa ka jingbymkhuid jong ka; bad kan sa long kaba la pynkhuid. Kane ka long kaba ka kynthei ka dei ban leh hadien ba kha khun.

⁸ Lada kata ka kynthei kam lah ban ai ïa u khunlangbrot, kan wallam ar tylli ki lyngdkhur ne ar tylli ki paro, kawei na ka bynta ka jingkñia ainguh thang bad kawei pat na ka bynta ka jingkñia ainguh namar ka pop bad u lyngdoh un pynlong ka jinglehniam ban shim noh ïa ka jingbymkhuid jong ka, bad kan sa long kaba la pynkhuid.