LEBITIKOS 11 - Khasi CL Bible (BSI)

Ki mrad kiba bit ïa ka ban bam

¹ U Trai u ai ha u Moses bad u Aaron ïa kine harum ki jingbuhbeit ryntih na ka bynta ki Israel,

² “Phi lah ban bam ïa uno uno u mrad ryngkew

³ uba pait khnap bad uba ktha ar sien,

^4-6 hynrei phim bit ban bam ïa ki ut, ki phyllad, ne ki rabbit. Dei ban ñiew ïa ki ba ki long ki bymkhuid; ki ktha ar sien, hynrei kim dei kiba pait khnap.

⁷ Wat bam ïa ki sniang. Dei ban ñiew ïa ki ba ki long ki bymkhuid; ki pait khnap, hynrei kim ktha ar sien.

⁸ Wat bam ïa kine ki mrad lane wat ktah ruh ïa ka metïap jong ki; ki long ki bymkhuid.

⁹ “Phi lah ban bam ïa kano kano ka jait dohkha kaba don ki shnet bad ki snep,

¹⁰ hynrei ïa kano kano kaba im ha um ka bym don ki shnet ne ki snep ym bit ban bam.

¹¹ Kum kita ki jingthaw ki long ki bymkhuid. Phim dei ban bam ïa ki ne phim bit wat tang ban ktah ruh ïa ki metïap jong ki.

¹² Phim bit ban bam ïa kano kano kaba im ha um ka bym don ki shnet bad ki snep.

^13-19 “Phim bit ban bam ïa kine ki jait sim harum: ki pukni, ki dkhoh, ki kbeit, ki khlieng, ki khlieng ïong, ki pukni, ki tyngab, ki ostrit, ki tyngab duriaw, ki thring, ki heron, ki pelikan, ki kormoran, ki proh-jyndem, ne ki lymbit.

²⁰ “Baroh ki khñiang kiba her ki long ki bymkhuid,

²¹ lait noh tang kito kiba kynthih.

²² Phi lah ban bam ïa u puit bah, ïa u puit suh wah, bad ïa u puit tangkuli.

²³ Hynrei baroh kiwei pat ki khñiang kiba rit, kiba don thapniang bad kiba par, la ñiew ba ki long ki bymkhuid.

^24-28 “Uno uno uba ktah ïa ka metïap jong kine ki mrad harum un long u bymkhuid haduh janmiet: baroh ki mrad kiba don khnap, lait noh kito kiba pait khnap bad kiba ktha ar sien, bad ki mrad saw kjat baroh kiba don tyrsim. Uno uno uba rah ïa ki metïap jong ki u dei ban da sait ïa la ki jaiñkup, hynrei un long hi u bymkhuid tad haduh janmiet.

^29-30 “Ki bsong, ki khnai, ki khnai tynjit bad ki 'ñiangbshiah, ki long ki bymkhuid.

³¹ Uno uno uba ktah ïa ki ne ïa ka metïap jong ki un long u bymkhuid haduh janmiet.

³² Bad lada ka metïap jong ki ka hap halor kaei kaei, kata ruh kan kylla long ka bymkhuid. Kane ka long kumta la ka dei ka lyngkhot dieng, lane ka jaiñkup, lane ka snieh, lane ka byrni, kam pher wat la pyndonkam ïa ka ha kano kano ka rukom. Dei ban wieh ïa ka ha ka um, hynrei kan long hi ka bymkhuid haduh janmiet.

³³ Bad lada ki met jong ki, ki hap ha uno uno u khiew khyndew, baroh kaba don hapoh uta u khiew kan kylla long ka bymkhuid, bad phi dei ban pynpait noh ïa u.

³⁴ Kano kano ka jingbam kaba lah ban bam, hynrei lada la theh um ha ka na kum uta u khiew, kan kylla long ka bymkhuid, bad kano kano ruh ka jingdih kaba don ha kum uta u khiew kan kylla long ka bymkhuid.

³⁵ Kano kano ha kaba ki metïap jong ki, ki hap kan kylla long ka bymkhuid; la ka long ka dpei ne ka nar shet, dei ban pynpait pharia ïa ki,

³⁶ hynrei ka umpohliew lane ka pung tong um ka ïaisah hi kaba khuid, wat la kiwei pat kiba kum dei bad ki metïap jong ki, ki kylla long ki bymkhuid.

³⁷ Lada kawei na ki ka hap ha uno uno u symbai u ban dang bet, uta u symbai un ïaisah uba khuid.

³⁸ Hynrei lada kawei na kita ka leit hap ha u symbai ba dang pdem ha um, uta u symbai u kylla long u bymkhuid.

³⁹ “Lada uno uno u mrad uba bit ban bam u ïap, uno uno uba ktah ïa u, un kylla long u bymkhuid haduh janmiet.

⁴⁰ Bad lada uno uno u briew u bam ïa ka doh jong uta u mrad, u dei ban da sait ïa la ki jaiñ, hynrei un kylla long hi u bymkhuid haduh janmiet. Uno uno ruh uba rah ïa kata ka metïap u dei ban da sait ïa la ki jaiñ, hynrei un ïaisah hi u bymkhuid haduh janmiet.

⁴¹ “Phim bit ban bam ïa kino kino ki mrad barit bapar ha ka khyndew,

⁴² kam pher la ki shu par, lane ki ïaid saw kjat, lane ki don bun tylli ki kjat.

⁴³ Wat pyntngit ïa lade da kaba bam ïa uno uno na kita.

⁴⁴ Nga long U Trai U Blei jong phi, bad kumta phi dei ban ri khuid ïa lade, namar nga, nga long uba khuid.

⁴⁵ Nga long U Trai uba la ïalam noh ïa phi na Ijipt khnang ba ngan long U Blei jong phi. Phi dei ban long kiba khuid, namar nga long uba khuid.”

⁴⁶ Kane keiñ ka long kata ka aiñ kaba ïadei bad ki mrad bad ki sim, bad kiei kiei baroh kiba im ha um, bad baroh kiba par ha ka khyndew.

⁴⁷ Phi dei ban nang ban pynïapher ïa kaba khuid bad ka bymkhuid, ïa ki mrad kiba bit ban bam bad kito ki bym bit ban bam.