LEBITIKOS 10 - Khasi CL Bible (BSI)

Ka Pop u Nadab bad u Abihu

¹ U Nadab bad u Abihu, ki khun shynrang jong u Aaron, ki shim ïa la ki khiew thang jingiwbih, ki buh rnga ding ha ki, ki thang ïa ka jingiwbih hangta, bad ki kñia ainguh ïa ka ha U Trai. Hynrei kane ka ding ka long ka bymkhuid, namar U Trai um shym la hukum ïa ki ban leh kumta.

² Kynsan U Trai u phah ïa ka ding, bad kata ka thang ïa ki hangta ha khmat jong U Trai haduh ba kin da ïap.

³ Te u Moses u ong ha u Aaron, “Kane ka long kaei kaba U Trai u la kren shaphang jong ka mynba u ong, ‘Baroh kiba shakri ïa nga ki dei ban burom ïa ka jinglongkhuid jong nga; ngan pynpaw ïa ka burom jong nga ha la ki briew.’ ” Hynrei u Aaron u shu sngap jar.

⁴ U Moses u khot ïa u Mishael bad ïa u Elsaphan, ki khun jong u Ussiel, u kñi jong u Aaron, bad u la ong ha ki, “Ale shane bad ïarah noh ïa kine ki met jong ki parakha jong phi na ka Ïingjaiñ bakyntang bad buh ïa ki shabar ka jaka shong dara.”

⁵ Kumta ki la ïawan, ki bat na ki jaiñkup jong ki metïap bad ki ïarah noh ïa ki shabar ka jaka shong dara, kumba u Moses u la hukum.

⁶ Nangta u Moses u ong ha u Aaron bad ha u Eleasar bad u Ithamar, ki khun shynrang jong u, “Wat ieh ra-ngiep ïa la u shñiuh lane kad ïa la ki jaiñ ban pyn-i ba phi ïam sngewsih, lada phi leh kumta phin ïap, bad U Trai un bitar ïa u paidlang baroh. Hynrei ïa baroh ki para jait Israel jong phi la shah ba kin ïa-ïam briew na ka bynta kane ka jingïap ba la wallam da ka ding kaba U Trai u la phah.

⁷ Wat mih shabar ka jingkhang jong ka Ïingjaiñ, ïoh phi ïap, namar la pynkyntang ïa phi da ka umphniang pynsleh jong U Trai.” Kumta ki la leh kumba u Moses u la ong.

Ki Aiñ ïa ki Lyngdoh

⁸ U Trai u ong ha u Aaron.

⁹ “Ma me bad ki khun shynrang jong me phim dei ban rung shapoh ka Ïingjaiñ ka Jingdon Ryngkat jong nga hadien ba phi la dih waiñ lane dih kyiad; lada phi leh kumta phin ïap. Kane ka long ka aiñ kaba dei ban bud da ki khun ki ksiew jong me pateng la pateng.

¹⁰ Me dei ban pynïapher ïa kata kaba long ka jong U Trai na kata kaba lah ban pyndonkam paidbah, ïa kata kaba khuid na kata ka bymkhuid.

¹¹ Me dei ban hikai ïa ki paid Israel ïa ki aiñ baroh kiba nga la ai ha me lyngba u Moses.”

¹² U Moses u ong ha u Aaron, bad ha ki ar ngut ki khun shynrang jong u kiba dang sah, u Eleasar bad u Ithamar, “Shim ïa ka jingainguh bam kaba sah na kata ka jingbam kaba la kñia sha U Trai, pynlong kpu khlem thiat da ka bad bam ïa ka harud ka duwan, namar kane ka jingkñia ka long kaba khuid bha.

¹³ Bam ïa ka ha ka jaka kaba khuid; ka long ka bynta kaba dei ka jong me bad jong ki khun shynrang jong me na kata ka jingbam ba la kñia ainguh sha U Trai. Kata ka long kaei kaba U Trai u la hukum ïa nga.

¹⁴ Hynrei ma me bad ki longïing jong me, phi lah ban bam ïa ka shadem bad ïa ka kjat-dien ïa kiba la ai kum ka jingai kaba kyrpang bad ka jingsynñiang bakyrpang sha U Trai na ka bynta ki lyngdoh. Phi lah ban bam ïa ka ha ka jaka ïa kaba la ñiew ba ka long kaba khuid. Ïa kine ki jingkñia ainguh la ai ha me bad ha ki khun jong me kum ka bynta kaba dei ka jong me na ki jingainguh ïasyllok jong ki paid Israel.

¹⁵ Kin wallam ïa ka kjat-dien bad ïa ka shadem katba dang kñia ïa ka khleiñ kum ka jingainguh bam sha U Trai. Kine ki bynta ki long ki jong me bad jong ki khun jong me pateng la pateng, kumba U Trai u la hukum.”

¹⁶ U Moses u la kylli bniah shaphang uta u 'langsohmoh ba la ai kum ka jingkñia namar ka pop, bad u la tip ba la lah thang noh ïa u. Kane ka la pynlong ïa u ban bitar ïa u Eleasar bad u Ithamar, bad u kylli ïa ki,

¹⁷ “Balei phim shym ïabam ïa kata ka jingkñia namar ka pop ha ka jaka kyntang? Ka long kaba khuid bha, bad U Trai u la ai ïa ka ha phi na ka bynta ban kit noh ïa ka pop jong u paidlang.

¹⁸ Namar ba ïa ka snam jong u 'langsohmoh ym shym la wanrah shapoh ka Ïingjaiñ bakyntang, phi la dei ban bam ïa ka jingkñia hangta, kumba nga la hukum.”

¹⁹ Te u Aaron u jubab, “Lada nga la bam ïa kata ka jingkñia namar ka pop mynta ka sngi, hato U Trai un sngewbha? Ki paidbah ki la wallam ïa la ki jingkñia namar ka pop sha U Trai mynta ka sngi, bad ki wallam ïa ki jingainguh thang jong ki, pynban kum kine kiei kiei kiba shyrkhei ki dang wan jia ha nga.”

²⁰ Haba u Moses u la ïohsngew ïa kane, u la sngewhun.