LEBITIKOS 1 - Khasi CL Bible (BSI)

Ki jingkñia ainguh thang

¹ U Trai u khot ïa u Moses na ka Ïingjaiñ ka Jingdon Ryngkat U Trai bad u ai ha u ïa kine ki aiñ harum,

² ba ki Israel kin rakhe haba ki wallam ïa ka jingkñia jong ki. Haba uno uno u wallam ka jingkñia da ka mrad, ka lah ban long uwei na ki masi, ne ki blang, ne ki langbrot jong u.

³ Lada u ainguh da uwei na ki masi kum ka jingainguh thang, u dei ban wallam da u shynrang uba khlem don kano kano ka jingduna. U dei ban wan ai ïa u ha ka jingkhang jong ka Ïingjaiñ ka Jingdon Ryngkat U Trai khnang ba U Trai un pdiang ïa u.

⁴ Uta u briew un buh ïa la ka kti ha ka khlieh jong ka, bad yn sa pdiang ïa ka kum ka jingkñia ban kit noh ïa ki pop jong u.

⁵ Un pynïap ïa uta u masi hangta, bad ki lyngdoh kiba na ka ïing u Aaron kin ai ïa ka snam sha U Trai, bad hadien kata kin synreit ïa ka sawdong kata ka duwan kaba don ha khmat ka jingkhang jong ka Ïingjaiñ.

⁶ Nangta pat un khoh snieh ïa uta u mrad bad ot ïa u lyngkhot lyngkhot,

⁷ bad ki lyngdoh pat kin pynbiang diengthang halor kata ka duwan bad ai ding ïa ka.

⁸ Kin buh ha ka ding ïa kita ki lyngkhot doh, kynthup ïa ka khlieh bad ka khleiñ.

⁹ Uta u briew un sait ïa ki snier bad ki kjat-dien, bad u lyngdoh uba ïarap un thang ïa ka jingkñia baroh halor ka duwan. Ka jingiw jong ka jingainguh bam ka long kaba pynsngewbha ïa U Trai.

¹⁰ Lada uta u briew u wallam ïa ka jingainguh da uwei na ki blang ne ki langbrot jong u, u dei ban long da u shynrang uba khlem kano kano ka jingduna.

¹¹ Un pynïap ïa u ha ka phang kaba shatei jong kata ka duwan, bad ki lyngdoh kin synreit ïa ka snam jong u sawdong kata ka duwan.

¹² Hadien ba uta u briew u la ot ïa u lyngkhot lyngkhot, u lyngdoh uba ïarap un buh ha ka ding ïa kita ki lyngkhot doh baroh, ïa ka khlieh, bad ka khleiñ.

¹³ Uta u briew u dei ban sait ïa ki snier bad ïa ki kjat-dien, bad u lyngdoh un ai ïa kata ka jingkñia sha U Trai, bad thang ïa ka baroh halor ka duwan. Ka jingiw jong kane ka jingainguh bam ka long kaba pynsngewbha ïa U Trai.

¹⁴ Lada uta u briew u ai jingkñia da ka sim kum ka jingainguh thang, ka dei ban long ka paro ne ka lyngdkhur.

¹⁵ U lyngdoh un rah ïa ka sha ka duwan, un khyrwait pyndkut ïa ka ryndang jong ka, bad thang ïa ka khlieh jong ka halor ka duwan. Ïa ka snam jong ka un pjiar ha ka krung jong ka duwan.

¹⁶ Un khlaw noh ïa u khu bad baroh kat kiba don ha u, bad un bret ïa ki ha ka jaka theh dpei kaba shaphang mihngi na kata ka duwan.

¹⁷ Un bat na ki thapniang jong ka bad un kad ïa ka met jong ka khlem da pyndkut ïa kita ki thapniang, bad nangta un thang tylli ïa ka ha ka duwan. Ka jingiw jong kane ka jingainguh bam ka long kaba pynsngewbha ïa U Trai.