KI KAM 9 - Khasi CL Bible (BSI)

Ka jingkylla jong u Saul

¹ Ha kajuh ka por u Saul u la byrngem ban pynïap ïa ki nongbud jong U Trai.

² U la leit sha u Rangbah Lyngdoh, bad u la pan ïa ki shithi pynithuh sha ki synagog kiba ha Damaskos, khnang ba lada un lap ïano ïano hangta kiba bud ïa ka Lynti jong U Trai, un lah ban kem ïa ki, shynrang bad kynthei bad wallam pat ïa ki sha Jerusalem.

³ Haba u Saul u la wan poi hajan ka nongbah Damaskos, kynsan ka jingshai na ka sahit bneng ka la thaba lep sawdong ïa u.

⁴ U la hap sha madan bad u la ïohsngew ïa ka sur kaba ong ha u, “Saul, Saul! Balei me pynshitom beiñ ïa nga?”

⁵ “Me long uei, A Trai?” u la kylli. “Nga long U Jisu, ïa uba me pynshitom beiñ!” ka sur ka la ong.

⁶ “Hynrei, ïeng joit bad leit rung shapoh ka nongbah, ha kaba yn ïathuh ïa me ïa kaei kaba me dei ban leh.”

⁷ Ki rangbah kiba la ïaleit ryngkat bad u Saul ki la sangeh, khlem kren wat shikyntien ruh; ki la ïohsngew ïa ka sur hynrei kim lah ban ïohi ïano ïano ruh.

⁸ U Saul u la khie joit na madan bad u la peit, hynrei um lah ban ïohi ei ei. Kumta ki la shim ïa u na ka kti bad ki la ïalam ïa u sha Damaskos.

⁹ Haduh lai sngi um shym lah ban ïohi, bad ha kata ka por um shym la bam ne dih ei ei.

¹⁰ La don uwei u riewngeit ha Damaskos uba kyrteng u Ananias. U la ïoh ka jingïohipaw, ha kaba U Trai u la ong ha u, “Ananias!” “Hangne nga don, A Trai,” u la jubab.

¹¹ U Trai u la ong ha u, “Khreh bad leit sha ‘Ka Lynti Ba-beit,’ bad ha ka ïing jong u Judas kylli ïa u briew na Tarsos uba kyrteng u Saul.

¹² U dang duwai bad ha ka jingïohipaw u la ïohi ïa u briew uba kyrteng u Ananias ba u wan rung bad buh ïa la ki kti ha u, khnang ba un ïoh imat pat.”

¹³ U Ananias u la jubab, “Ko Trai, bun ki briew ki la ïathuh ïa nga shaphang une u briew bad shaphang kiei kiei kiba shyrkhei kiba u la leh ïa ki briew jong me ha Jerusalem.

¹⁴ Bad u la wan poi sha Damaskos lem bad ka bor na ki rangbah lyngdoh ban kem ïa baroh kiba mane ïa me.”

¹⁵ U Trai u la ong ha u, “Khie leit, namar ba nga la jied ïa u ban shakri ïa nga, ban pyntip ïa ka kyrteng jong nga ha ki Jentil bad ha ki syiem bad ha ki paid Israel.

¹⁶ Bad nga hi ngan pyn-i ha u ïa baroh kaba u dei ban shah na ka bynta jong nga.”

¹⁷ Kumta u Ananias u la leit, u la rung shapoh ka ïing ha kaba u Saul u don, bad u la buh ïa la ki kti halor jong u. “Ko Saul, u para jong nga,” u la ong, “U Trai u la phah ïa nga — U Jisu hi, uba la mihpaw ha me ha ka lynti katba me dang wan shane. U la phah ïa nga khnang ba men ïoh imat pat bad ban pyndap ïa me da U Mynsiem Bakhuid.”

¹⁸ Kumta hi kaei re kaei kaba kum ki snep dohkha ki la hap na ki khmat jong u Saul, bad u la lah ban ïohi pat. U la ïeng joit bad la pynbaptis ïa u;

¹⁹ bad hadien ba u la bam jingbam, u la ïohbor pat. U Saul u la sah katto katne sngi bad ki parabangeit ha Damaskos.

U Saul u ïalap ha Damaskos

²⁰ U la leit beit sha ki synagog u la sdang ban ïalap ba U Jisu u long U Khun U Blei.

²¹ Baroh kiba la ïohsngew ïa u ki la sngewlyngngoh bad ki la kylli, “Hato une um dei uto uba ha Jerusalem u la pynïap ïa kito kiba mane ïa uta U Jisu? Bad hato um shym wan hangne na ka bynta kajuh ka jingthmu ban kem ïa kito ki briew bad ban ïalam pat ïa ki sha ki rangbah lyngdoh?”

²² Hynrei ka jingïalap jong u Saul ka la nang kham khrawbor, bad ki jingpynshisha jong u ba U Jisu u long U Messaïah ki long kiba skhem ba ki Jiw kiba shong basah ha Damaskos kim lah ban jubab ïa u.

²³ Hadien bun sngi, ki Jiw ki la ïashem lang bad ki la pynlong ki jingthmu ban pynïap ïa u Saul, hynrei la ïathuh ha u shaphang ka jingthmu jong ki.

²⁴ Mynsngi bad mynmiet ki la ap ha ki khyrdop shnong khnang ban pynïap ïa u.

²⁵ Hynrei ha kawei ka miet ki nongbud jong u Saul ki la ïalam ïa u bad ki la pynhiar sha tbian ïa u lyngba ka thliew ha ka kynroh, da kaba pynhiar ïa u ha ka shang.

U Saul ha Jerusalem

²⁶ U Saul u la leit sha Jerusalem bad u la pyrshang ban ïasoh bad ki synran. Hynrei kim lah ban ngeit ba u la long u synran, bad baroh ki la sheptieng ïa u.

²⁷ Nangta u Barnabas u la ïarap ïa u bad u la ïalam ïa u sha ki apostol. U la batai ha ki kumno u Saul u la ïohi ïa U Trai ha ka lynti bad ba U Trai u la lah kren bad u Saul. U la ïathuh ruh kumno u Saul u la ïalap da ka jingshlur ha Damaskos ha ka kyrteng U Jisu.

²⁸ Bad kumta u Saul u la sah bad ki bad u la leit kylleng ka Jerusalem, da kaba ïalap da ka jingshlur ha ka kyrteng jong U Trai.

²⁹ U la kren ruh bad u la ïatainia bad ki Jiw kiba kren Grik, hynrei ki la pyrshang ban pynïap ïa u.

³⁰ Haba ki parabangeit ki la tip shaphang kata, ki la ïalam ïa u Saul sha Kaisaria bad ki la phah noh ïa u sha Tarsos.

³¹ Bad kumta ka la long ba ka balang ha kylleng ka Judia, Galilaïa bad Samaria ka la ïoh shongsuk. Da ka jingïarap jong U Mynsiem Bakhuid la pynshaitbor ïa ka bad ka la nang san ha ka jingbun briew, haba ka ïaid ha ka jingsheptieng ïa U Trai.

U Petros ha Lydda bad Joppa

³² U Petros u la leit kylleng kylleng, bad ha kawei ka sien u la leit ban jngoh ïa ki briew jong U Blei kiba shong basah ha Lydda.

³³ Hangta u la shem ïa u briew uba kyrteng u Ainias, uba la pang ïapshiliang bad u bym shym la lah ban khie na ka jingthiah la phra snem.

³⁴ “Ko Ainias,” u Petros u la ong ha u, “U Jisu Khrist u pynkhiah ïa me. To ïeng joit bad pynbeit ïa la ka jingthiah.” Mar kumta hi u Ainias u la ïeng joit.

³⁵ Baroh ki briew kiba shong basah ha Lydda bad Sharon ki la ïohi ïa u, bad ki la phai sha U Trai.

³⁶ Ha Joppa la don ka briew kaba kyrteng ka Tabitha, kaba long ka riewngeit. (Ka kyrteng jong ka ha ka Ktien Grik ka long ka Dorkas, kaba mut “ka skei.”) Ka la pynlut ïa ka por jong ka baroh ha kaba leh babha bad ha kaba ïarap ïa kiba duk.

³⁷ Ha kata ka por ka la pang bad ka la ïap. Ïa ka met jong ka la pynsum bad la pynthiah ïa ka ha ka kamra kaba haneng.

³⁸ Ka Joppa kam shym da jngai na Lydda, bad haba ki parabangeit ha Joppa ki la ïohsngew ba u Petros u la don ha Lydda, ki la phah ar ngut ki rangbah sha u lem bad ka khubor, “To pynkloi bad wan sha ngi.”

³⁹ Kumta u Petros u la khreh bad u la leit bad ki. Haba u la poi, la ïalam ïa u sha ka kamra kaba haneng, ha kaba ki riewkynthei baroh ki la ïalum sawdong ïa u, ki da ïam bad pyn-i ïa ki sopti bad ki jaiñkup kiba ka Dorkas ka la suh mynba ka dang im.

⁴⁰ U Petros u la pynmih ïa ki baroh shabar ka kamra, bad u la dem khohsiew bad duwai; nangta u la phai sha ka met bad u la ong, “Ko Tabitha, khie joit!” Ka la plied ïa la ki khmat, bad haba ka la ïohi ïa u Petros, ka la khie shong.

⁴¹ U Petros u la kner ïa la ki kti, bad u la ïarap pynkhie ïa ka. Nangta u la khot ïa ki parabangeit baroh, kynthup ïa ki riewkynthei, u la aiti ïa ka ha ki, ka briew kaba la im pat.

⁴² Ka khubor shaphang kane ka la par kylleng ka Joppa, bad bun ki briew ki la ngeit ha U Trai.

⁴³ U Petros u la ïaisah bun sngi ha Joppa lem bad u nongpdem snieh uba kyrteng u Simon.