KI KAM 3 - Khasi CL Bible (BSI)

Ïa u briew uba dkoh la pynkhiah

¹ Ha kawei ka sngi, u Petros bad u Ïoannis ki la leit sha ka Templ ha ka por lai baje nohphai sngi, kaba long ka kynta jingduwai.

² Hangta ha ka Khyrdop Ba-itynnat, kumba la ju khot ïa ka, la don u briew uba la dkoh baroh shi jingim. Man ka sngi la ju bah ïa u sha ka khyrdop ban khrong pisa na ki briew kiba leit shapoh ka Templ.

³ Haba u la ïohi ïa u Petros bad u Ïoannis ba ki rung shapoh, u la kyrpad ïa ki ban ai ei ei ïa u.

⁴ Ki la khmih shlip ha u, bad u Petros u la ong, “Peit sha ngi!”

⁵ Kumta u la peit sha ki, da ka jingkhmih lynti ban ïoh ei ei na ki.

⁶ Hynrei u Petros u la ong ha u, “Ngam don pisa ei ei, hynrei nga ai ha me ïa kaei kaba nga don: Ha ka kyrteng jong U Jisu Khrist uba na Nasareth nga hukum ïa me ban ïeng joit bad ïaid!”

⁷ Nangta u la shim ïa u na ka kti kamon jong u bad u la ïarap pynïeng ïa u. Shisyndon ki kjat bad ki matsohlah jong une u briew ki la khlaiñ;

⁸ u la kynthih, u la ïeng ha la ki kjat, bad u la sdang ban ïaid kylleng sawdong. Nangta u la leit shapoh ka Templ lem bad ki, u da ïaid bad kynthih bad ïaroh ïa U Blei.

⁹ Ki briew kiba hangta ki la ïohi ïa u ba u ïaid bad ïaroh ïa U Blei,

¹⁰ bad haba ki la ithuh ïa u kum u nongkhrong uba la ju shong ha ka Khyrdop Ba-itynnat, baroh ki la kyndit bad lyngngoh ïa kaei kaba la lah jia ha u.

Ka khubor u Petros ha ka Templ

¹¹ Katba uta u briew u don ryngkat bad u Petros bad u Ïoannis ha ka baranda u Solomon, kumba la khot ïa ka, ki paidbah ki la sngewlyngngoh bad ki la mareh sha ki.

¹² Haba u Petros u la ïohi ïa ki paidbah, u la ong ha ki, “Ko para Israel, balei phi ïakyndit ha kane, bad balei ba phi peit seh ïa ngi? Hato phi pyrkhat ba ka dei da ka bor jong ngi hi lane da ka jingriewblei jong ngi hi ba ngi la pynlong ïa une u briew ban ïaid?

¹³ U Blei jong u Abraham, u Isaak, bad jong u Jakob, U Blei ki kpa tymmen jong ngi, u la ai ïa ka burom ba kynja blei ha U Jisu u shakri jong u. Hynrei phi la aiti ïa u ha ki bor synshar, bad phi la kyntait ïa u ha khmat u Pilat, wat hadien ba u Pilat u la rai ban pyllait noh ïa u.

¹⁴ U la long uba khuid bad uba bha, hynrei phi la kyntait ïa u, bad pynban phi la kyrpad ïa u Pilat ban leh na ka bynta jong phi ban pyllait ïa u nongpynïap briew.

¹⁵ Phi la pynïap ïa uta uba ïalam sha ka jingim, hynrei U Blei u la pynmihpat ïa u na ka jingïap — bad ngi long ki sakhi ïa kane.

¹⁶ Ka long ka bor jong ka kyrteng jong u kaba la ai jingkhlaiñ ïa une u briew uba dkoh. Ïa kaei kaba phi ïohi bad tip, la leh da ka jingngeit ha ka kyrteng jong u; ka long ka jingngeit ha U Jisu kaba la pynkhiah ïa u, kumba phi baroh phi ïohi.

¹⁷ “Bad mynta, ko hynmen ko para jong nga, nga tip ba kaei kaba ma phi bad ki nongïalam jong phi, phi la leh ïa U Jisu ka long namar ka jingbymtip jong phi.

¹⁸ U Blei u la pynbna naduh mynshuwa lyngba ki nongïathuhlypa baroh ba U Messaïah jong u, u dei ban shahshitom; bad u la pynlong ïa ka, ban jia shisha ha kane ka rukom.

¹⁹ Te, to kylla-kaba-mut, bad to phai sha U Blei, khnang ba un map ïa ki pop jong phi.

²⁰ Lada phi leh kumta, ki por jong ka jingkhlaiñ ba kynja mynsiem kin wan na U Trai, bad un phah ïa U Jisu, uba long U Messaïah ïa uba u la lah jied na ka bynta jong phi.

²¹ U dei ban don ha bneng tad ynda ka poi ka por ha kaba yn thaw thymmai kiei kiei baroh, kumba U Blei u la pynbna lyngba ki nongïathuhlypa bakhuid jong u kiba la im slem bah mynshuwa.

²² Naba U Moses u la ong, ‘U Trai uba U Blei jong phi un phah ha phi ïa u nongïathuhlypa, kumba u la phah ïa nga, bad un long uwei na ki briew jong phi hi. Phi dei ban kohnguh ïa kaei kaei baroh kaba u ong ïa phi ban leh.

²³ Uno uno u bymkohnguh ïa uta u nongïathuhlypa un shah pynkhlad na ki briew jong U Blei bad un shah pynjot.’

²⁴ Bad baroh ki nongïathuhlypa kiba la don ka khubor, kynthup ïa u Samuel bad kito kiba mih hadien jong u, ki la pynbna ruh ïa kaei kaba la jia ha kine ki sngi.

²⁵ Ki jingkular jong U Blei lyngba ki nongïathuhlypa ki long na ka bynta jong phi, bad phi ïoh bynta ha ka jutang kaba U Blei u la pynlong bad ki kpa tymmen jong phi. Kumba u la ong ha u Abraham, ‘Lyngba ki khun ki ksiew jong me ngan kyrkhu ïa ki briew baroh ha ka pyrthei.’

²⁶ Bad kumta U Blei u la jied ïa la u Shakri bad u la phah ïa u nyngkong ha phi, ban kyrkhu ïa phi da kaba pynlong ïa uwei pa uwei na phi ban phai noh na ki lynti bymman jong u.”