KI KAM 22 - Khasi CL Bible (BSI)

¹ “Ko ki para nong Israel jong nga, to shahshkor ïa nga katba nga dang pynlong ka jingïasaid na ka bynta ïa lade ha khmat jong phi!”

² Haba ki la ïohsngew ïa u ba u kren ha ka ktien Hebru, ki la kham sngap jar, bad u Paul u la bteng:

³ “Nga long u Jiw, ïa uba la kha ha Tarsos ha Kilikia, hynrei ïa uba la pynheh pynsan hangne ha Jerusalem kum u shah hikai jong u Gamaliel. Nga la ïohpdiang ïa ka jinghikai bapyrkhing ha ka Hukum jong ki kpa tymmen jong ngi, bad nga la long uba la pynkyntang sha U Blei kumba long ma phi baroh hangne ha kane ka sngi.

⁴ Nga la pynshitom beiñ haduh kaba pynïap ïa ki briew kiba la bud ïa kane ka Lynti. Nga la kem ïa ki rangbah bad ki kynthei bad nga la thep ïa ki ha ka byndi.

⁵ U Rangbah Lyngdoh bad ka Dorbar hi baroh kawei ki lah ban pynshisha ba nga kren ïa ka jingshisha. Nga la ïohpdiang na ki ïa ki shithi kiba la thoh sha ki para Jiw kiba ha Damaskos, kumta nga la leit shata ban kem ïa kine ki briew bad wan ïalam pat ïa ki, kiba la khum ha ki kynjri sha Jerusalem ba yn pynshitom ïa ki.

U Paul u ïathuh ïa ka jingkylla jong u

⁶ “Katba nga dang leit lynti bad wan poi hajan ka Damaskos, hamar shiteng sngi ka jingshai baphyrnai na sahit bneng ka la thaba kynsan sawdong jong nga.

⁷ Nga la hap sha madan bad nga la ïohsngew ïa ka sur kaba ong ha nga, ‘Saul, Saul! Balei me pynshitom beiñ ïa nga?’

⁸ ‘Me dei uei, A Trai?’ nga la kylli. ‘Nga long U Jisu uba na Nasareth, ïa uba me pynshitom beiñ,’ u la ong ha nga.

⁹ Ki rangbah kiba ïadon bad nga ki la ïohi ïa ka jingshai, hynrei kim shym ïohsngew ïa ka sur jong uta uba kren ha nga.

¹⁰ Nga la kylli, ‘Aïu ngan leh, A Trai?’ bad U Trai u la ong ha nga, ‘Ïeng joit bad leit sha Damaskos, bad hangta yn sa ïathuh ïa kaei kaei baroh kaba U Blei u la thmu na ka bynta jong me ban leh.’

¹¹ Nga la matlah namar ka jingshai baphyrnai, bad kumta ki paralok jong nga ki la btin ïa nga da ka kti bad ki la ïalam ïa nga sha Damaskos.

¹² “Ha kata ka nongbah la don u briew uba kyrteng u Ananias, u briew uba riewblei uba la kohnguh ïa ka Hukum jong ngi bad ïa uba la ñiewburom shikatdei eh da ki Jiw baroh kiba shong basah hangta.

¹³ U la wan sha nga, u la ïeng hajan jong nga, bad u la ong, ‘Ko Saul, to men ïoh imat pat!’ Ha kata hi ka khyllipmat nga la lah ban peit pat, bad nga la khmih ïa u.

¹⁴ U la ong, ‘U Blei jong ki kpa tymmen jong ngi, u la jied ïa me ban tip ïa ka mon jong u, bad ban ïohi ïa U Shakri bahok jong u, bad ban ïohsngew ïa u ba u kren ha ka sur jong u hi.

¹⁵ Naba men long u sakhi na ka bynta jong u ban ïathuh ha uwei pa uwei ïa kaei kaba me la ïohi bad ïohsngew.

¹⁶ Bad mynta, balei me pyntud? To ïeng joit bad shah ba yn pynbaptis ïa me bad sait noh ïa ki pop jong me da kaba duwai sha u.’

Ka jingkhot ïa u Paul ban ïalap sha ki Jentil

¹⁷ “Nga la leit phai sha Jerusalem, bad katba nga dang duwai ha ka Templ, nga la ïoh ka jingïohipaw,

¹⁸ ha kaba nga la ïohi ïa U Trai, haba u la ong ha nga, ‘Pynkloi bad mihnoh kyrkieh na Jerusalem, namar ki briew hangne kin ym pdiang ïa ka jingsakhi jong me shaphang jong nga.’

¹⁹ ‘Ko Kynrad,’ nga la jubab, ‘ki ïatip bha ba nga la leit sha ki synagog bad nga la kem bad shoh ïa kito kiba ngeit ha me.

²⁰ Bad haba la pynïap ïa u Stephan, u sakhi jong me, nga hi nga la don hangta, nga da mynjur ïa ka jingpynïap ïa u bad nga da sumar ïa ki jaiñ jong ki nongpynïap ïa u.’

²¹ ‘Khie leit,’ U Trai u la ong ha nga, ‘naba ngan phah ïa me sha jngai sha ki Jentil.’ ”

²² Ki paidbah ki la pynshahshkor ïa u Paul haduh ba un da dep kren; hynrei pynban ki la sdang ban kyang jam eh, “Pynduh ïa u! Pynïap ïa u! Um long uba bit ban im!”

²³ Ki la lynñiar, ki da khaweh ïa la ki jaiñ, bad ki da kynting ïa u pui pui sha suiñ.

²⁴ U rangbah ai hukum ka kynhun shipai Rom u la hukum ïa la ki rangbah ban ïalam ïa u Paul shapoh ka kut shipai, bad u la ong ïa ki ban sympat ïa u khnang ban lap balei ba ki Jiw ki kyang kumne pyrshah ïa u.

²⁵ Hynrei haba ki la lah khum ïa u ban sympat, u Paul u la ong ïa u rangbah pynïaidkam uba ïeng hangta, “Hato ka shong aiñ ïa me ban sympat ïa u traishnong ka Hima Rom u bym shym la shah bishar na ka bynta kano kano ka kam runar?”

²⁶ Haba uta u rangbah pynïaidkam u la ïohsngew ïa kane, u la leit sha u rangbah ai hukum bad u la kylli ïa u, “Me leh aïu? Utai u briew u dei u traishnong ka Hima Rom?”

²⁷ Kumta u rangbah ai hukum u la leit sha u Paul bad u la kylli ïa u, “Ïathuh ïa nga, hato me dei u traishnong ka Hima Rom?” “Ho-oid,” la jubab u Paul.

²⁸ U rangbah ai hukum u la ong, “Nga la long u traishnong da kaba siew shibun ka pisa.” “Hynrei nga long traishnong naduh dang kha,” u Paul u la jubab.

²⁹ Mar kumta ki rangbah kiba la leit ban tohkit ïa u Paul ki la kynriah noh na u, bad uta u rangbah ai hukum u la sheptieng haba u la sngewthuh ba u Paul u la long u traishnong ka Hima Rom bad ba u la lah phah khum kynjri ïa u.

U Paul ha khmat ka dorbar

³⁰ U rangbah ai hukum u la kwah ban tip thikna ïa kaei ba ki Jiw ki mudui ïa u Paul; kumta ha ka sngi kaba bud u la phah weng noh ïa ki kynjri na u Paul bad u la hukum ïa ki rangbah lyngdoh bad ïa ka Dorbar baroh ban ïakynduh lang. Nangta u la ïalam ïa u Paul bad u la pynïeng ïa u ha khmat jong ki.