KI KAM 2 - Khasi CL Bible (BSI)

Ka jingwan U Mynsiem Bakhuid

¹ Haba ka sngi Pentekost ka la poi, baroh ki riewngeit ki la ïalumlang ha kawei ka jaka.

² Kynsan la don ka jingsawa na sahit bneng kaba sawa kum ka jingbeh ka lyer bajur, bad ka la pyndap ïa ka ïing baroh kawei ha kaba ki la ïashong.

³ Nangta ki la ïohi ïa kaei kaba i kum ki thylliej ding kiba pur kylleng bad ktah ïa uwei pa uwei u briew hangta.

⁴ La pyndap ïa ki baroh da U Mynsiem Bakhuid bad ki la sdang ban kren ha kiwei pat ki ktien, kat kumba U Mynsiem u pynlah ïa ki ban kren.

⁵ La don ki Jiw kiba shong basah ha Jerusalem, ki riew niam kiba la wan na kawei pa kawei ka ri ha ka pyrthei.

⁶ Haba ki la ïohsngew ïa kane ka jingsawa, u paidbah babun u la ïalum. Ki la ïasngewtynnat, namar ba uwei pa uwei na ki u la ïohsngew ba ki riewngeit ki kren ha ka ktien jong u hi.

⁷ Ha ka jinglyngngoh bad jingphylla ki la pynbna, “Kine ki briew kiba kren kumne ki long ki nong Galilaïa!

⁸ Kumno, te, ba baroh na ngi, ngi ïohsngew ïa ki ba ki kren ha ka ktien tynrai jong ngi hi?

⁹ Ngi dei na Parthia, na Media, bad na Elam; na Mesopotamia, na Judia, bad na Kappadokia; na Pontos bad na Asia,

¹⁰ na Phrygia bad na Pamphylia, na Ijipt bad na ki thain ka Libya hajan ka Kyrini. Katto katne ngut na ngi, ngi dei na Rom,

¹¹ ki Jiw bad ki Jentil kiba la kylla sha ka niam Jiw, bad katto katne ngut na ngi, ngi dei na Krit bad na Arabia — pynban baroh na ngi, ngi ïohsngew ïa ki ba ki kren ha ki ktien jong ngi shaphang kiei kiei kiba khraw kiba U Blei u la leh!”

¹² Da kaba lyngngoh bad shaïong, ki la ïai kylli uwei ïa uwei pat, “Aïu kane ka kit jingmut?”

¹³ Hynrei kiwei pat ki kren biria ïa ki riewngeit, da kaba ong, “Kine ki briew ki la buaid!”

Ka khubor u Petros

¹⁴ Nangta u Petros u la ïeng joit lem bad kiwei pat ki khatwei ngut ki apostol bad ha ka sur bajam u la sdang ban kren ha u paidbah: “Ko para Jiw bad phi baroh kiba shong basah ha Jerusalem, to shahshkor ïa nga bad shah ïa nga ban ïathuh ha phi aïu kane ka kit jingmut.

¹⁵ Kine ki briew kim shym buaid, kumba phi tharai; ka dang khyndai baje mynstep.

¹⁶ Pynban, kane ka long kaei kaba u Joel u nongïathuhlypa u la kren shaphang jong ka:

¹⁷ “ ‘Kane ka long kaei kaba ngan leh ha ki sngi bakhatduh, U Blei u ong: Ngan theh noh ïa U Mynsiem jong nga halor uwei pa uwei baroh. Ki khun shynrang bad ki khun kynthei jong phi kin pynbna ïa ka khubor jong nga; ki samla shynrang jong phi kin ïohi ki jingïohipaw, bad ki rangbah ba la tymmen jong phi kin ïoh ki jingphohsniew.

¹⁸ Ho-oid, wat ha ki shakri jong nga, baroh shynrang bad kynthei, ngan theh ïa U Mynsiem jong nga ha kita ki sngi, bad kin pynbna ïa ka khubor jong nga.

¹⁹ Ngan leh ki kambah ha ka sahit bneng shajrong bad ïa ki jingphylla ha ka khyndew sha tbian. Kan don ka snam, ka ding, bad ka tdem kaba rben;

²⁰ ïa ka sngi yn pyndum, bad u bnai un kylla saw kum ka snam, ha shuwa Ka Sngi kaba khraw bad kaba donburom jong U Trai ka wan.

²¹ Bad nangta, ïa uno uno uba khot kyrpad sha U Trai ban ïoh jingïarap yn pynim.’

²² “A to shahshkor ïa kine ki kyntien, ko para nong Israel! U Jisu uba na Nasareth u la long u briew uba ïa ka bor ba kynja blei jong u la pynshisha da kaba shai ha phi da ki kambah bad kamphylla baroh kiba U Blei u la leh lyngba jong u. Phi hi phi tip ïa kane, naba ka la jia hangne hapdeng jong phi.

²³ Kat kum ka jingthmu jong u hi, U Blei u la lah thmu lypa ba ïa U Jisu yn aiti ha phi; bad phi la pynïap ïa u da kaba shah ïa ki briew bapop ban sahnarphna ïa u.

²⁴ Hynrei U Blei u la pynmihpat ïa u na ka jingïap, da kaba pyllaitluid ïa u na ka bor jong ka, namar ka long ka bym lah long ba ka jingïap kan bat ïa u.

²⁵ Naba u Dabid u la ong shaphang jong u, “ ‘Nga la ïohi ïa U Trai ha khmat jong nga ha ki por baroh; u don hajan jong nga, bad ngan ym don ha ka jingjynjar.

²⁶ Bad kumta la pyndap ïa nga da ka jingkmen, bad ki kyntien jong nga ki dap da ka jingkmen. Bad ma nga, la nga long tang u briew, ngan ym khuslai ha ka jingkyrmen,

²⁷ namar men ym iehnoh ïa nga ha ka pyrthei kiba ïap; men ym shah ïa u shakri baïaineh jong me ban pyut hapoh ka jingtep.

²⁸ Me la pyn-i ha nga ïa ki lynti ïaid kiba ïalam sha ka jingim, bad ka jingdon ryngkat jong me kan pyndap ïa nga da ka jingkmen.’

²⁹ “Ko hynmen ko para jong nga, nga dei ban kren shai shaphang U syiem Dabid u kpa tymmen bapawnam jong ngi. U la ïap bad la tep ïa u, bad ka jingtep jong u ka don hangne bad ngi haduh kane ka sngi.

³⁰ U la long u nongïathuhlypa, bad u la tip aïu U Blei u la kular ïa u: U Blei u la pynlong ka jingsmai ba un pynlong syiem ïa uwei na ki khun ki ksiew jong u Dabid, kumba u Dabid u la long.

³¹ U Dabid u la ïohi ïa kaei kaba U Blei un leh ha ka lawei, bad kumta u la kren shaphang ka jingmihpat jong U Messaïah haba u ong, “ ‘Ym shym la iehnoh ïa u ha ka pyrthei kiba ïap; ka met jong u kam shym la pyut hapoh ka jingtep.’ ”

³² U Blei u la pynmihpat ïa une hi U Jisu na ka jingïap, bad ngi baroh ngi long ki sakhi ïa kane ka jingshisha.

³³ La kyntiew ïa u sha ka liang kamon jong U Blei, U Kpa jong u, bad u la ïohpdiang na u ïa U Mynsiem Bakhuid, kumba u la lah kular. Kaei kaba phi ïohi bad ïohsngew mynta ka long ka jingai sngewbha kaba u la theh noh ha ngi.

³⁴ Naba ym shym dei u Dabid uba la leit kiew sha bneng; pynban u la ong: “ ‘U Trai u la ong ha u Trai jong nga: Shong hangne ha ka liang kamon jong nga

³⁵ tad ynda nga buh ïa ki nongshun jong me kum ka jingïuhkjat hapoh ki kjat jong me.’

³⁶ “Baroh ki paid Israel, te, ki dei ban tip da kaba thikna ba une U Jisu, uba phi la sahnarphna, u dei uta uba U Blei u la pynlong U Trai bad U Messaïah!”

³⁷ Haba ki paidbah ki la ïohsngew ïa kane, ki la khuslai shikatdei eh bad ki la ong ha u Petros bad ha kiwei pat ki apostol, “Kaei kaba ngin leh, ko para?”

³⁸ U Petros u la ong ha ki, “Uwei pa uwei na phi u dei ban phai noh na ki pop jong u bad ba yn pynbaptis ha ka kyrteng jong U Jisu Khrist, khnang ba yn map ïa ki pop jong phi, bad phin ïohpdiang ïa U Mynsiem Bakhuid uba long ka jingai jong U Blei.

³⁹ Naba ïa ka jingkular jong U Blei la pynlong ha phi bad ha ki khun jong phi, bad ha baroh kiba sha jngai — baroh kiba U Trai U Blei jong ngi u khot sha lade.”

⁴⁰ U Petros u la pynlong ïa kane ka jingkyrpad ha ki bad da ki kyntien babun u la kyrpad ïa ki, da kaba ong, “To pynim ïa lade na ka jingpynshitom kaba wan ha une u paidbah ba-bymman!”

⁴¹ Kiba bun na ki, ki la ngeit ïa ka khubor jong u bad la pynbaptis ïa ki, bad kumba lai hajar ngut ki briew la pynïasoh sha ka kynhun ha kata ka sngi.

⁴² Ki la pynlut ïa ka por jong ki ha kaba ïoh jinghikai na ki apostol, ha kaba ïashim bynta ha ka jingïasyllok, bad ha kaba ïa-ai lem ha ka jingïabam lang bad ha ki jingduwai.

Ka jingim hapdeng ki riewngeit

⁴³ Shibun ki kambah bad ki kamphylla la leh lyngba ki apostol, bad ïa uwei pa uwei baroh la pyndap da ka jingsheptieng ïa U Blei.

⁴⁴ Baroh ki riewngeit ki la ïadon lang ha ka jingïasyllok bajan bad ki la ïasam ïa la ki jingdon jingem iwei ïa iwei pat.

⁴⁵ Ki die noh ïa ka jaka ka puta bad ka jingdon jingem jong ki, bad sam ïa ka pisa hapdeng jong ki baroh, kat kum kaei kaba uwei uwei u donkam.

⁴⁶ Na kawei ka sngi sha kawei pat ki ju ïakynduh kum ka kynhun hapoh ka Templ, bad ki ïabam jingbam lang ha ki ïing jong ki, ki da bam da ka dohnud kaba kmen bad kaba sngewrit,

⁴⁷ da kaba ïaroh ïa U Blei, bad lehkmen ha ka jingbhasbun jong ki briew baroh. Bad man ka sngi U Trai u nang pynïasoh ha ka kynhun jong ki ïa kito kiba la pynim.