KI KAM 18 - Khasi CL Bible (BSI)

Ha Korinth

¹ Hadien kane, u Paul u la mihnoh na Athens bad u la leit sha Korinth.

² Hangta u la ïakynduh ïa u Jiw uba kyrteng u Akwila, ïa uba la kha ha Pontos, uba dang shu wan shen na Italy lem bad ka Priskila ka tnga jong u, naba u Patsha Klaudius u la lah hukum ïa ki Jiw baroh ban mihnoh na Rom.

³ U Paul u la leit ban jngoh ïa ki, namar ba u la kamai da kaba shna ïingjaiñ, kumba long ma ki.

⁴ U la ïaphylliew jingmut hapoh synagog man la ka sngi Sabbaton, da kaba pyrshang ban pynkohnguh ïa ki Jiw bad ki Grik.

⁵ Haba u Silas bad u Timothi ki la poi na Makedonia, u Paul u la pynlut ïa ka por jong u baroh ha kaba ïalap ïa ka khubor, da kaba sakhi ha ki Jiw ba U Jisu u dei U Messaïah.

⁶ Haba ki la ïa-pyrshah ïa u bad ki la ong kiei kiei kiba sniew shaphang jong u, u la pynpaw ïa ka jingsngew pyrshah da kaba kynther ïa u pui pui na ki jaiñ jong u bad ong ha ki, “Lada phi long kiba la jah noh, phi hi da lade phi dei ban shim ka jingkitkhlieh na ka bynta jong ka! Ngam don jingkitkhlieh. Naduh mynta ngan leit sha ki Jentil.”

⁷ Kumta u la iehnoh ïa ki bad u la leit sah noh ha ka ïing jong u Jentil uba kyrteng u Titius Justos, uba mane ïa U Blei; ka ïing jong u ka don ha syndah jong ka synagog.

⁸ U Krispos, uba long u nongïalam jong ka synagog, u la ngeit ha U Trai, lem bad ka longïing jong u baroh; bad kiba bun kiwei pat ki briew ha Korinth ki la ïohsngew ïa ka khubor, ki la ngeit, bad la pynbaptis ïa ki.

⁹ Ha kawei ka miet, u Paul u la ïoh ka jingïohipaw ha kaba U Trai u la ong ha u, “Wat sheptieng, hynrei ïai kren bad wat sangeh, naba nga long lem bad me.

¹⁰ Ym don mano mano ba lah ban pynmynsaw ïa me, naba kiba bun ha kane ka nongbah ki long ki briew jong nga.”

¹¹ Kumta u Paul u la sah hangta shisnem shiteng, u da hikai ha ki ïa ka ktien jong U Blei.

¹² Haba ïa u Gallio la pynlong u lyngskor jong ka Akhaïa kaba ha ka hima Rom, ki Jiw ki la ïalumlang hangta, ki la kem ïa u Paul, bad ki la ïalam ïa u sha ka ïingbishar.

¹³ “Une u briew,” ki la ong, “u pyrshang ban pynkohnguh ïa ki briew ban mane ïa U Blei ha ka rukom kaba long pyrshah ïa ka aiñ!”

¹⁴ U Paul sa ba un sdang kren, haba u Gallio u la ong ha kita ki Jiw, “Lada kane ka long ka kam runar lane ka kam sniew ba la leh, kan long kaba shongnia ïa nga ban ïaishah bad ki Jiw.

¹⁵ Hynrei namar ba ka long ka jingïatainia shaphang ki ktien bad ki kyrteng bad shaphang ka hukum jong phi, phi hi phi dei ban ïapynbeit ïa ka. Ngan ym long u nongbishar ïa kine kiei kiei!”

¹⁶ Bad u la beh noh ïa ki shabar ka ïingbishar.

¹⁷ Ki baroh ki la kem ïa u Sosthenes, uta u nongïalam jong ka synagog, bad ki la shoh ïa u ha khmat jong ka ïingbishar. Hynrei kata kam shym pynsalia wat khyndiat ruh ïa u Gallio.

Ka jingwanphai sha Antiokh

¹⁸ U Paul u la nang sah kham bun sngi bad ki parabangeit ha Korinth, nangta u la iehnoh ïa ki bad u la leit da ka lieng lem bad ka Priskila bad u Akwila sha Syria. Ha shuwa ba un leit da ka lieng na Kenkhria u la phah khi ïa la ka khlieh namar ka jingsmai kaba u la pynlong.

¹⁹ Ki la poi ha Ephesos, ha kaba u Paul u la iehnoh ïa ka Priskila bad ïa u Akwila. U la leit sha ka synagog bad u la pynlong ka jingïaphylliew jingmut bad ki Jiw.

²⁰ Ki paidbah ki la kyrpad ïa u ban sah kham slem, hynrei u kyrngah.

²¹ Pynban, u la ong ïa ki ha shuwa ba un mihnoh, “Lada ka long ka mon U Blei, ngan wan pat sha phi.” Bad kumta u la leit da ka lieng na Ephesos.

²² Haba u la poi ha Kaisaria, u la leit sha Jerusalem bad u la ai khublei ïa ka balang, bad nangta u la leit sha Antiokh.

²³ Hadien ba u la pynlut katto katne por hangta, u la mihnoh bad u la leit lyngba ka thain jong ka Galatia bad Phrygia, da kaba pynkhlaiñ ïa ki parabangeit baroh.

U Apollos ha Ephesos bad ha Korinth

²⁴ Ha kata ka por uwei u Jiw uba kyrteng u Apollos ïa uba la kha ha Aleksandria, u la wan poi sha Ephesos. U long u nongkren uba pnah bad uba don ka jingtip babniah ïa ki Jingthoh Bakhuid.

²⁵ La hikai ïa u ha ka Lynti jong U Trai, bad da ka jingshitrhem bakhraw u la pynbna bad hikai khlem bakla ïa ki jingshisha shaphang U Jisu. Pynban u la tip tang ïa ka jingpynbaptis jong u Ïoannis.

²⁶ U la sdang ban kren shlur ha ka synagog. Haba ka Priskila bad u Akwila ki la ïohsngew ïa u, ki la ïalam ïa u sha la ïing bad ki la batai ha u kham bniah ïa ka Lynti jong U Blei.

²⁷ Nangta u Apollos u la kut jingmut ban leit sha Akhaïa, kumta ki parabangeit ha Ephesos ki la ïarap ïa u da kaba thoh sha ki parabangeit kiba ha Akhaïa, da kaba kyrpad ïa ki ban pdiang sngewbha ïa u. Haba u la poi, u la long ka jingïarap bakhraw ïa kito kiba da ka jingaiei jong U Blei ki la kylla long ki parabangeit.

²⁸ Naba da ki nia bakhlaiñ jong u, u la jop ïa ki Jiw ha ki jingïatainia ha khmat ki paidbah da kaba pynshisha na ki Jingthoh Bakhuid ba U Jisu u dei U Messaïah.