KI KAM 10 - Khasi CL Bible (BSI)

U Petros bad u Kornelios

¹ La don u briew ha Kaisaria uba kyrteng u Kornelios, uba long u rangbah shipai ha ka kynhun shipai ka Hima Rom ba la khot “Ka Kynhun shipai Italian”.

² U la long u briew uba riewblei; ma u lem bad ka longïing jong u baroh kawei ki la mane ïa U Blei. U la leh ruh shibun ban ïarap ïa ki Jiw kiba duk bad u ïai duwai ha U Blei.

³ Ka la long ha kawei ka sngi kumba lai baje nohphai sngi mynba u la ïoh ka jingïohipaw, ha kaba u la ïohi da kaba shai kdar ïa u angel jong U Blei uba wan shapoh bad ong ha u, “Kornelios!”

⁴ U la khmih shaiñ ïa u angel ha ka jingsheptieng bad u la ong, “Ka dei kaei, ko Kynrad?” U angel u la jubab, “U Blei u la sngewbha ïa ki jingduwai jong me bad ïa ki kam leh-isynei jong me, bad u kloi ban jubab ïa me.

⁵ Bad mynta to phah katto katne ngut ki rangbah sha Joppa ban leit shem ïa uwei u briew uba ka kyrteng pura ka long u Simon Petros.

⁶ Une u sah shipor ha ka ïing u nongpdem snieh uba kyrteng u Simon, uba shong basah harud duriaw.”

⁷ Te u angel u la leit noh, bad u Kornelios u la khot ar ngut na ki shakri ïing jong u bad uwei u shipai uba riewblei uba long uwei na kiba shakri ïa u.

⁸ U la ïathuh ha ki ïa kaei kaba la jia bad u la phah noh ïa ki sha Joppa.

⁹ Ha ka sngi kaba bud, katba ki dang don ha lynti bad ba ki la jan poi hajan Joppa, u Petros u la leit sha ka tnum jong ka ïing ha ka por shiteng sngi ban duwai.

¹⁰ U la sngew thngan, bad u la kwah ban bam ei ei; katba dang pynkhreh ïa ka jingbam, u la ïoh ka jingïohipaw.

¹¹ U la ïohi ba la plie ïa ka bneng bad kaei re kawei kaba wan hiar kaba i kum ka jaiñ siang kaba heh ïa kaba la pynhiar na ki saw tylli ki dong jong ka sha ka pyrthei.

¹² Ha ka, la don baroh ki jait mrad, ki kynja bapar bad ki sim khlaw.

¹³ Ka sur ka la ong ha u, “Ïeng joit, ko Petros; to pynïap bad to bam!”

¹⁴ Hynrei u Petros u la ong, “Da lei lei ruh em, ko Trai! ngam pat ju bam mynno mynno ïa kaei kaei ka bymkhuid lane kaba sang kat kum ka jinglehniam.”

¹⁵ Kata ka sur ka la kren biang ha u, “Wat ñiew bymkhuid ïa kano kano kaba U Blei u la pynbna ba ka long kaba khuid.”

¹⁶ Kane ka la jia lai sien, bad nangta ïa kata kaei kaei la shim noh pat sha bneng.

¹⁷ Katba u Petros u dang sngewlyngngoh shaphang ka jingmut jong kane ka jingïohipaw, ki rangbah kiba u Kornelios u la phah ki la tip hangno ka ïing jong u Simon ka don, bad mynta ki la ïeng ha khmat ka khyrdop.

¹⁸ Ki la pyrta bad kylli, “Don mo u nongshong basa hangne uba kyrteng u Simon Petros?”

¹⁹ U Petros u dang ïai pyrshang ban shemphang aïu ka jingïohipaw ka kit jingmut, haba U Mynsiem u la ong, “Ha sngap! Lai ngut ki rangbah ki ïawad ïa me.

²⁰ Kumta to khreh bad leit hiar, bad wat sngewlehrain ban leit bad ki, naba nga la phah ïa ki.”

²¹ Kumta u Petros u la leit hiar bad u la ong ha kita ki rangbah, “Dei ma nga uta uba phi ïawad. Phi donkam aïu?”

²² “U Kornelios, u rangbah shipai u la phah ïa ngi,” ki la jubab. “U long u briew uba bha uba mane ïa U Blei bad uba la ñiewburom shikatdei da ki Jiw baroh. U angel jong U Blei u la ïathuh ïa u ban khot sngewbha ïa phi sha ka ïing jong u, khnang ba u lah ban ïohsngew ïa kaei kaba phi don ban ong.”

²³ U Petros u la khot sngewbha ïa kita ki rangbah shapoh bad u la kyrpad jur ïa ki ban sahmiet hangta. Ha ka sngi kaba bud u la khreh bad u la leit bad ki; bad katto katne ngut ki parabangeit na Joppa ki la ïasynran lem ïa u.

²⁴ Ha ka sngi kaba bud u la poi ha Kaisaria, ha kaba u Kornelios u dang ap ïa u, lem bad ki ba-ha-ïing ha-sem bad ki paralok bajan jong u kiba u la khot sngewbha.

²⁵ Katba u Petros u dang rung, u Kornelios u la leit kynduh ïa u, u la dem khrup ha ki kjat jong u, bad u la nguh dem ha khmat jong u.

²⁶ Hynrei u Petros u la pynïeng ïa u. “To ïeng,” u la ong, “nga hi nga long tang u briew.”

²⁷ U Petros u la ïai kren ïa u Kornelios katba u dang leit shapoh ïing, ha kaba u la shem bun ki briew kiba la ïalumlang.

²⁸ U la ong ha ki, “Phi hi phi tip bha ba la khang ïa u Jiw da ka niam jong u ban leit jngoh lane ïajan bad ki Jentil. Hynrei U Blei u la pyn-i ha nga ba ngam dei ban ñiew bymkhuid ne basang kat kum ka jinglehniam ïa uno uno u briew.

²⁹ Bad kumta haba phi la phah khot ïa nga, nga la wan khlem kano kano ka jingpyrshah. Nga kylli ïa phi, te, balei ba phi phah khot ïa nga?”

³⁰ U Kornelios u la ong, “Ka la long kumba ha kane ka por lai sngi mynshuwa ba nga dang duwai ha ka ïing jong nga ha ka por lai baje nohphai sngi. Kynsan u briew uba riam ha ki jaiñ kiba phyrnai u la ïeng ha khmat jong nga, bad u la ong:

³¹ ‘Ko Kornelios! U Blei u la ïohsngew ïa ki jingduwai jong me bad u la kynmaw ïa ki kam leh-isynei jong me.

³² Phah ïano ïano sha Joppa ban shem ïa u briew uba ka kyrteng pura ka long u Simon Petros. U shong basa ha ka ïing jong u Simon, u nongpdem snieh, uba shong basah harud duriaw.’

³³ Bad kumta shisyndon nga la phah khot ïa me, me ruh me la long uba sbun eh ban wan. Mynta ngi baroh ngi don hangne ha ka jingdon ryngkat jong U Blei, da kaba ap ban ïohsngew ïa kano kano kaba U Trai u la bthah ïa me ban ong.”

Ka jingkren u Petros

³⁴ U Petros u la sdang ban kren: “Mynta nga sngewthuh ba ka long kaba shisha ba U Blei u ñiew kumjuh ïa uno uno baroh.

³⁵ Kito kiba mane ïa u bad kiba leh ïa kaba dei ki long kiba la pdiang sngewbha da u, kam pher na kano ka jaitbynriew ki long.

³⁶ Phi tip ïa ka khubor kaba u la phah sha ki paid Israel, da kaba pynbna ïa ka Khubor Babha jong ka jingsuk lyngba U Jisu Khrist, uba long U Trai jong baroh.

³⁷ Phi tip ïa ka jingjia kaba khraw kaba la jia ha kylleng ka ri Israel, kaba sdang ha Galilaïa hadien ba u Ïoannis u la ïalap ïa ka khubor jong u shaphang ka jingpynbaptis.

³⁸ Phi tip shaphang U Jisu uba na Nasareth bad kumno U Blei u la theh halor jong u ïa U Mynsiem Bakhuid bad ïa ka bor. U la leit kylleng, u da leh ki kam babha bad u da pynkhiah ïa baroh kiba la long hapoh ka bor jong u Ksuid, naba U Blei u la don lem bad u.

³⁹ Ngi long ki sakhi ïa kaei kaei baroh kaba U Blei u la leh ha ka ri Israel bad ha Jerusalem. Nangta ki la pynïap ïa u da kaba sahnar ïa u ha ka diengphna.

⁴⁰ Hynrei hadien lai sngi. U Blei u la pynmihpat ïa u bad u la pynlong ïa u ban mihpaw,

⁴¹ ym ha baroh, hynrei tang ha ki sakhi kiba U Blei u la lah jied, kata, ha ngi kiba la ïabam bad ïadih bad u hadien ba u la mihpat na ka jingïap.

⁴² Bad u la hukum ïa ngi ban ïalap ïa ka Gospel ha ki briew, bad ban sakhi ba u long uta ïa uba U Blei u la thung ban long u Nongbishar ïa kiba im bad kiba ïap.

⁴³ Baroh ki nongïathuhlypa ki la kren shaphang jong u, da kaba ong ba uno uno uba ngeit ha u un ïoh ka jingmap ïa ki pop lyngba ka bor jong ka kyrteng jong u.”

Ki Jentil ki ïohpdiang ïa U Mynsiem Bakhuid

⁴⁴ Katba u Petros u dang kren, U Mynsiem Bakhuid u la wan hiar halor kita baroh kiba shahshkor ïa ka khubor jong u.

⁴⁵ Ki Jiw kiba la ngeit kiba la wan na Joppa lem bad u Petros ki la sngewlyngngoh ba U Blei u la theh ïa ka jingai ïa U Mynsiem Bakhuid ha ki Jentil ruh.

⁴⁶ Naba ki la ïohsngew ïa ki ba ki kren ha ki ktien kiba pher bad ki da ïaroh ïa ka jingkhraw jong U Blei. U Petros u la kren:

⁴⁷ “Kine ki briew ki la ïohpdiang ïa U Mynsiem Bakhuid, kumba ma ngi ruh ngi la ïohpdiang. Hato don uno uno, te, u ban khang ïa ki na kaba shah pynbaptis da ka um?”

⁴⁸ Kumta u la hukum ba yn pynbaptis ïa ki ha ka kyrteng jong U Jisu Khrist. Te ki la kyrpad ïa u ban sah bad ki sa khyndiat sngi.