JOSHUA 8 - Khasi CL Bible (BSI)

Ka jingkurup bad jingpynjot ïa ka Ai

¹ U Trai u ong ha u Joshua, “Ïalam lang bad me ïa ki shipai baroh bad leit kiew sha Ai. Wat sheptieng lane khaw-eit. Ngan ai ha me ka jingjop ïa u syiem ka Ai; ki briew jong u, ka nongbah jong u, bad ka ri kan long ka jong me.

² Men leh ïa ka Ai bad ïa u syiem jong ka kumba me la leh ïa ka Jerikho bad u syiem jong ka, hynrei ha kane ka sien me lah ban bat ha lade ïa ki mar ki mata bad ïa ki jingri jong ka na ka bynta ïa lade. Pynkhreh ban tur ïaleh ïa ka nongbah da ka jingkyndit na lyndet jong ka.”

³ Kumta u Joshua ryngkat bad ki shipai jong u baroh ki khreh ban leit sha Ai. U da jied laiphew hajar ngut ki shipai kiba kynsai bad phah ba kin leit ha ka por mynmiet

⁴ lem bad kine ki hukum: “Rieh ha kawei ka liang jong ka nongbah, hynrei wat leit jngai than na ka; long ba la khreh ban tur ïaleh.

⁵ Ki rangbah jong nga bad ma nga ngin leit tur sha ka nongbah. Haba ki rangbah jong ka Ai ki wan mih pyrshah ïa ngi, ngin phai dien bad ngin phet, kumba ngi la leh ha ka sien kaba nyngkong.

⁶ Kin wan beh ïa ngi haduh ba ngin da ïalam ïa ki kham sha jngai na ka nongbah. Kin pyrkhat ba ngi la phet ïap na ki, kumba ngi leh mynshuwa.

⁷ Nangta, phin wan mih na ka jakarieh bad kurup ïa ka nongbah. U Trai U Blei jong phi un ai ïa ka ha phi.

⁸ Ynda phi la kurup ïa ka nongbah, thang ïa ka, kumba U Trai u la hukum. Kine ki long ki hukum ïa phi.”

⁹ Kumta u Joshua u phah noh ïa ki, bad ki la leit sha la ka jakarieh bad ap hangta, ha ka phang sepngi jong ka Ai, hapdeng ka Ai bad ka Bethel. U Joshua pat u sahmiet ha ka jaka sher dara.

¹⁰ Dang step phyrngab u Joshua u la khie bad lumlang ïa ki shipai. Nangta ma u bad ki nongïalam jong ki Israel ki la ïalam ïa ki sha Ai.

¹¹ Ma u bad ki shipai ki ïaleit sha ka khyrdop bah jong ka nongbah bad ki sher dara ha ka phang bashatei, ha kaba don ka them hapdeng jong ki bad ka Ai.

¹² U shim kumba san hajar ngut ki rangbah bad u buh ha kaba rieh ïa ki ha ka phang sepngi jong ka nongbah, hapdeng ka Ai bad ka Bethel.

¹³ Ïa ki shipai la pynbeit na ka bynta ka thma bad ka jaka sher dara kaba shatei jong ka nongbah, bad ïa kiba sah na ki rangbah sha ka phang sepngi. U Joshua u sahmiet ha ka them.

¹⁴ Haba u syiem jong ka Ai u ïohi ïa ki rangbah jong u Joshua, u pynstet ban leit ïaleh. Ma u bad ki rangbah jong u baroh ki la mih sha ka phang ka Them Jordan ban ïaleh ïa ki Israel ha kajuh ka jaka kum mynshuwa, khlem da tip ba un shah tur ïaleh na shadien.

¹⁵ U Joshua bad ki rangbah jong u ki leh mynleh kumba phai dien, bad ki phet sha ka jaka bashrah.

¹⁶ La khot lang ïa ki rangbah baroh kiba ha ka nongbah ban leit beh ïa ki, bad katba ki nang beh ïa u Joshua, katta ruh ki nang jngai na ka nongbah.

¹⁷ Uwei pa uwei u rangbah ha Ai u la leit beh ïa ki Israel, bad ki la iehnoh rynghang ïa ka nongbah, khlem don mano mano ban ïada ïa ka.

¹⁸ Nangta U Trai u ong ha u Joshua, “Kdew ïa u sum jong me ha ka Ai; nga ai ïa ka ha me.” U Joshua u leh kumba la bthah,

¹⁹ bad u tang shu rah ïa la ka kti, ki rangbah kiba la rieh ki ïeng joit, ki mareh sha ka nongbah bad kurup ïa ka. Mar mar ruh ki thang ïa ka nongbah.

²⁰ Haba ki rangbah jong ka Ai ki phai shadien, ki ïohi ïa ka tdem kaba kiew sha suiñbneng. Ym don lad shuh ba kin lait im, naba ki Israel kiba la phet sha ka jaka bashrah mynta ki phai kylla ban ïaleh ïa ki.

²¹ Haba u Joshua bad ki rangbah jong u ki ïohi ba kita kiwei pat ki la ïohknieh ïa ka nongbah bad ba ka la pluh, ki phai kylla bad ki sdang pynïap ïa ki rangbah jong ka Ai.

²² Ki Israel kiba hapoh ka nongbah mynta ki wan hiar ban ïasoh lem ha ka thma. Kumta ki rangbah jong ka Ai ki shem ïa lade ba ki la shah kerkut ha ki Israel, bad ba ki la shah pynïap lut. Ym don uwei ruh uba lait im, bad ym don uwei ruh uba lait na kata lait tang u syiem jong ka Ai.

²³ La kem ïa u bad la ïalam ïa u sha u Joshua.

²⁴ Ki Israel ki la pynïap ïa uwei pa uwei u nongshun ha ka jaka bashrah ha kaba ki la beh ïa ki. Nangta ki la leit phai pat sha Ai bad ki la pynïap ïa uwei pa uwei uba don hangta.

^25-26 U Joshua u rah ïa la u sum uba la kdew sha ka Ai bad um shym pynhiar ïa u tad haduh ba uwei pa uwei u briew hangta u la shah pynïap. Baroh ki nongshong shnong jong ka Ai kiba la shah pynïap ha kata ka sngi — khat-ar hajar ngut ki shynrang bad ki kynthei.

²⁷ Ki Israel ki shim ha lade ïa ki jingri bad ïa ki mar ki mata ba ki ïoh kurup na ka nongbah, kumba U Trai u la hukum ïa u Joshua.

²⁸ U Joshua u la thang ïa ka Ai bad u iehnoh ïa ka ha ka jingjot. Ka dang sah kumta mynta.

²⁹ U la phasi ïa u syiem jong ka Ai ha uwei u dieng bad u ieh ïa ka met jong u hangta haduh janmiet. Ha ka por sep sngi u Joshua u ai hukum ban weng noh ïa kata ka metïap, bad la bret ïa ka ha ka jaka rung sha ka khyrdop ka nongbah. Ki la tap ïa ka da ka kynton maw kaba heh, kaba dang sah hangta mynta.

La pule ïa ka Hukum ha u Lum Ebal

³⁰ Nangta u Joshua u tei ha u Lum Ebal ïa ka duwan ha U Trai, U Blei ki Israel.

³¹ U la tei ïa ka kat kum ki jingbthah ba u Moses, u shakri jong U Trai u la ai ha ki Israel, kumba la thoh ha ka Hukum u Moses: “Ka duwan ba la tei da ki maw ki bym shym la shtah da ki tiar nar.” Halor jong ka ki la thang ïa ki jingkñia ha U Trai, bad ki la ainguh ruh ïa ki jingainguh ïasyllok.

³² Hangta ha ka jingïohi ki Israel, u Joshua u pruid ha ki maw ïa ka jingthoh jong ka Hukum kaba u Moses u la thoh.

³³ Ki Israel lem bad ki nongïalam jong ki, ki rangbah pynïaidkam, bad ki nongbishar ryngkat lem bad ki nongwei kiba hapdeng jong ki, ki la ïeng ha baroh arliang jong ka Synduk ka Jutang U Trai, da kaba phai pyrshah ïa ki lyngdoh Lebi kiba bah ïa ka. Shiteng na u paidbah ki ïeng ha kaba ka lyngkdong jong ki ka phai sha u Lum Gerisim bad shiteng kiwei pat, ki lyngkdong jong ki, ki phai sha u Lum Ebal. U Moses u shakri U Trai u la hukum ïa ki ban leh ïa kane ynda poi ka por ïa ki ban ïohpdiang ïa ka jingkyrkhu.

³⁴ Nangta u Joshua u pule jam ïa ka Hukum baroh kawei, kaba kynthup ïa ki jingkyrkhu bad ïa ki jingtim, kumba la thoh ha ka kitab ka Hukum.

³⁵ U Joshua u pule ïa kawei pa kawei na ki hukum u Moses ha kata ka jingïalang, ha kaba la kynthup ïa ki kynthei bad ki khynnah, lem bad ki nongwei kiba shong basah hapdeng jong ki.