JOSHUA 7 - Khasi CL Bible (BSI)

Ka pop u Akhan

¹ Ïa ka jinghukum U Trai ïa ki Israel ban ym shim na Jerikho ïa kaei kaei kaba dei ban pynjot thiaw, ym shym la kohnguh. U briew uba kyrteng u Akhan um shym la kohnguh ïa kata ka hukum, bad kumta U Trai u la bitar lep ïa ki Israel. (U Akhan u dei u khun jong u Karmi bad u ksiew jong u Sabdi, bad uba na ka kur Serah, kaba long shi bynta na ka jait Judah.)

² U Joshua u phah katto katne ngut ki rangbah na Jerikho sha Ai, ka nongbah sha ka phang mihngi na Bethel, hajan ka Bethaben, lem bad ki hukum ïa ki bad swar ïa ka jaka. Haba ki la dep leh kumta,

³ ki wan ïathuh ha u Joshua, “Ym da donkam ba baroh kin leit tur ïaleh ïa ka Ai. Phah tang kumba ar ne lai hajar ngut ki rangbah. Wat phah ïa ka kynhun shipai baroh kawei ban leit ïaleh; kam dei ka shnong kaba heh.”

⁴ Kumta kumba lai hajar ngut ki rangbah Israel ki leit tur shata, hynrei ki hap ban phet ïap nangta.

⁵ Ki rangbah jong ka Ai ki beh krad ïa ki naduh ka khyrdop shnong haduh ki katto katne ki par bad ki la pynïap kumba laiphew hynriew ngut ha ka lynti sharum ki lumrit. Te ki Israel ki la duh ka jingshlur bad ki la sheptieng.

⁶ U Joshua bad ki nongïalam jong ki Israel ki la kad ïa la ki jaiñ da ka jingsngewdiaw, bad ki dem khrup ha khyndew ha khmat ka Synduk ka Jutang U Trai bad dem hangta haduh janmiet lem bad u pui pui halor ki khlieh jong ki ban pyn-i ïa ka jingsngewsih jong ki.

⁷ Bad u Joshua u ong, “A Trai Nongsynshar! Balei me wan ïalam ïa ngi sha shiliang ka Jordan? Hato ban aiti noh ïa ngi ha ki nong Amor? Hato ban pynjot ïa ngi? Balei ngim shu shongsah sha kawei pat ka liang jong ka Jordan!

⁸ Aïu nga lah ban ong, A Trai, mynta ba ki Israel ki la kynran dien na u nongshun?

⁹ Ki Kanaan bad baroh kiba hapoh ka ri kin sa ïohsngew ïa kane. Kin sa kerkut ïa ngi, bad kin sa pynïap ïa uwei pa uwei ïa ngi! Bad nangta aïu men leh ban ïada ïa la ka burom?”

¹⁰ U Trai u ong ha u Joshua, “Ïeng joit! Balei me dem sah kumne ha khyndew?

¹¹ Ki Israel ki la leh pop! Ki la pynkheiñ ïa ka jingkular bad nga kaba nga la hukum ïa ki ban bat. Ki la shim katto katne kiei kiei kiba dei ban pynjot. Ki la tuh ïa ki, ki la len shaphang kata, bad buh lang ïa ki bad la ki jong ki tiar ki tar.

¹² Dei namar kane ba ki Israel kim lah ban ïeng ïaleh ïa ki nongshun jong ki. Ki kynran dien na ki namar ki hi ki la shah pynrem sha ka jingpynjot! Ngan ym don ryngkat shuh bad phi lymda phi pynjot thiaw ïa kiei kiei kiba la hukum ïa phi ban ym shim!

¹³ Ïeng joit! Pynkhuid ïa u paidbah bad pynkhreh ban wan ha khmat jong nga. Bthah ïa ki ban long kiba la kloi lashai ka sngi, namar ma nga, U Trai U Blei ki Israel nga don kane ban ong: ‘Israel, phi don ha ki jingdon jingem jong phi katto katne kiba nga la hukum ïa phi ban pynjot! Phim lah ban ïeng pyrshah ïa ki nongshun jong phi tad haduh ba phin da lait na kine kiei kiei!’

¹⁴ Kumta ïathuh ïa ki ba ha ka por mynstep yn ïalam ïa ki sha khmat, kawei ka jait hadien kawei pat. Ka jait kaba nga jied kan wan sha khmat, shi kur shi kur. Ka kur kaba nga jied kan wan sha khmat, kawei ka longïing hadien kawei pat. Ka longïing kaba nga la jied kan wan sha khmat uwei hadien uwei pat.

¹⁵ Ïa uta uba la shah kdew bad ha uba la lap ïa ki tiar ki tar kiba la mana yn thang ha ka ding, lem bad ïa ka longïing jong u, bad kaei kaei baroh kaba u don, naba u wanrah ïa ka jinglehrain bashyrkhei ïa ki Israel bad u la pynkheiñ ïa ka jutang jong nga.”

¹⁶ Dang step phyrngab ha ka sngi kaba bud u Joshua u wan ïalam ïa ki Israel sha khmat, shi jait shi jait, bad la kdew ïa ka jait Judah.

¹⁷ U wan ïalam ïa ka jait Judah sha khmat, shi kur shi kur, bad la kdew ïa ka kur ki Serah. Nangta u wan ïalam ïa ka kur Serah sha khmat, shi ïing shi ïing, bad la kdew ïa ka ïing u Sabdi.

¹⁸ Nangta u wan ïalam sha khmat ïa ka longïing jong u Sabdi sha khmat, uwei hadien uwei, bad la kdew ïa u Akhan, u khun jong u Karmi bad u ksiew jong u Sabdi.

¹⁹ U Joshua u ong ha u, “Ko khun shynrang jong nga, ïathuh ïa ka jingshisha hangne ha khmat U Trai, U Blei ki Israel, bad phla. Ïathuh ha nga mynta ïa kaei kaba me la leh. Wat pyrshang ban buhrieh ïa ka na nga.”

²⁰ “Ka long kaba shisha,” u Akhan u jubab, “nga la leh pop pyrshah ïa U Trai, U Blei ki Israel, bad kane ka long kaei ba nga la leh.

²¹ Napdeng kita ki mar kiba ngi la kurup, nga la ïohi kawei ka barandi Babilon kaba itynnat, kumba ar kilo ka rupa, bad shi lyngkhot ka ksiar kaba khia palat shiteng kilo. Nga la ikwah eh ïa ki, bad nga la shim ïa ki. Phin shem ba la tep ïa ki hapoh ka ïingjaiñ jong nga, bad ka rupa ka don ha trai.”

²² Kumta u Joshua u phah katto katne ngut ki rangbah kiba mareh sha ka ïingjaiñ bad ki shem ba kita ki mar ba la shah kyntait la tep shisha hangta, bad ka rupa ha trai.

²³ Ki wanrah ïa ki shabar ka ïingjaiñ, ki leit lam ïa ki sha u Joshua bad sha kita ki Israel baroh, bad ki buh ïa ki ha khmat U Trai.

²⁴ U Joshua, lem bad ki paid Israel, ki shim ïa u Akhan, ka rupa, ka barandi, ka lyngkhot ksiar, lem bad ïa ki khun shynrang bad khun kynthei jong u Akhan, ki jingri jong u, ki kada jong u, bad ki langbrot jong u, ka ïingjaiñ jong u, bad kaei kaei baroh kaba u don, bad ki ïalam ïa ki sha ka Them Jingjynjar.

²⁵ Bad u Joshua u ong, “Balei me la pynngat ha ngi ïa ka jynjar kaba kum kane? U Trai mynta un pynngat ïa ka jynjar ha me!” Te ki briew baroh ki lynthem maw ïa u Akhan haduh ba un da ïap; ki lynthem maw bad ki thang ruh ïa ki ba-ha-ïing ha-sem jong u bad ïa ki jingdon jingem jong u.

²⁶ Ki pynïeng ruh halor jong u ïa ka kynton maw kaba heh, kaba dang don haduh mynta. Dei namar kata ba ïa kata jaka la dang ïai khot ka Them Jingjynjar. Da kumta U Trai um shym da bitar shla shuh.