JOSHUA 5 - Khasi CL Bible (BSI)

¹ Ki syiem Amor baroh ha ka phang sepngi jong ka Jordan bad ki syiem Kanaan baroh kiba harud ka Duriaw Mediterranian ki la ïohsngew ba U Trai u la pynrngad ïa ka Jordan haduh ba ki paid Israel kin da jam ïa ka. Ki la sheptieng bad khaw-eit namar ki Israel.

Ka jingotsher ha Gilgal

² Nangta U Trai u ong ha u Joshua, “Shna katto katne ki tari na u mawshamok bad otsher ïa ki Israel.”

³ Kumta u Joshua u la leh kumba U Trai u la hukum, bad u la otsher ïa ki Israel ha ka jaka ba la khot kyrteng U Lum Jingotsher.

^4-6 Mynba ki Israel ki la mihnoh na Ijipt, la dep otsher ïa ki shynrang baroh. Hynrei ha ki sawphew snem ba u paidbah u ïaid lyngba ïa ka ri shyiap, ym shym la otsher satia ïa uno uno u khunlung shynrang. Kumjuh ruh, ha kaba kut jong kata ka por ki rangbah baroh kiba la kynjoh ka rta ïaleh mynba ki la mihnoh na Ijipt ki la ïap namar ba kim shym kohnguh ïa U Trai. Kumba u la smai, ym shym la shah ïa ki ban ïohi ïa kata ka ri kaba tuid da ka dud bad ka ngap kaba u la kular ha ki kpa tymmen jong ki.

⁷ Ïa ki khun shynrang jong kine ki rangbah ym shym la otsher, bad dei ïa kane ka pateng bathymmai ba u Joshua u la otsher.

⁸ Hadien ba la pyndep ïa ka jingotsher, ka jaitbynriew baroh kawei ka sah ha kata ka jaka shong dara haduh ba ki jingmong kin da khiah.

⁹ U Trai u ong ha u Joshua, “Ha kane ka sngi nga la weng noh na phi ïa ka jingjahburom ka jinglongmraw ha Ijipt.” Namar kata la khot kyrteng ïa ka jaka, ka Gilgal, ka kyrteng kaba ka dang don.

¹⁰ Katba ki Israel ki dang shong dara ha Gilgal ha ka pyntha hajan ka Jerikho, ki la rakhe ïa ka Jingkhawai Niam Ka Jinglait ha ka janmiet jong ka sngi kaba khatsaw jong u bnai.

¹¹ Ka sngi kaba bud ka long ka sien banyngkong ba ki ïabam ïa ka jingbam ba la pynmih ha Kanaan: ïa u kew ba la shu sdieh bad ïa u kpu khlem thiat.

¹² Ka manna ka la sangeh noh ban hap, bad ki Israel kim ju ïoh shuh ïa ka. Naduh kata ka por ki bam ïa ka jingbam ba la pynmih ha Kanaan.

U Joshua bad u briew uba rah waitlam

¹³ Katba u Joshua u dang don hajan Jerikho, kynsan u ïohi ïa u briew uba ïeng ha khmat jong u, uba bat ïa ka waitlam. U Joshua u leit sha u bad u kylli, “Me dei uwei na ki shipai ngi, ne u nongshun?”

¹⁴ “Ngam dei uno uno,” uta u briew u jubab. “Nga don hangne kum u rangbah ai hukum jong ka kynhun ïapom U Trai.” U Joshua u dem mane ngon ha khyndew bad u ong, “Bah, nga long u shakri jong phi. Aïu phi kwah ïa nga ban leh?”

¹⁵ Te uta u rangbah ai hukum jong ka kynhun ïapom U Trai u ong ha u, “Loit noh ïa ki juti jong me, naba kata ka jaka ha kaba me ïeng ka long kaba khuid.” Bad u Joshua u la leh kumba la bthah ïa u.