JOSHUA 4 - Khasi CL Bible (BSI)

La pynïeng ïa ki maw pynsah jingkynmaw

¹ Haba ka jaitbynriew baroh kawei ka la lah jam ïa ka Jordan, U Trai u ong ha u Joshua,

² “Jied khat-ar ngut ki rangbah, uwei na kawei kawei ka jait,

³ bad hukum ïa ki ban shim khat-ar tylli ki maw napdeng jong ka Jordan, na kata hi ka jaka ha kaba ki lyngdoh ki la ïeng. Ong ïa ki ban bah ïa kine ki maw bad buh ïa ki ha ka jaka kaba kin sah ha kata ka miet.”

⁴ Nangta u Joshua u khot ïa ki khat-ar ngut ki rangbah kiba u la jied,

⁵ bad u ong ha ki, “Khie leit sha ka Jordan ha shuwa ka Synduk ka Jutang U Trai U Blei jong phi. Uwei pa uwei na phi un bah ïa u maw ha la ka tyrpeng jong phi, uwei na ka bynta kawei kawei ka jait Israel.

⁶ Kine ki maw kin pynkynmaw ïa ki briew ïa kaei kaba U Trai u la leh. Hadien habud, haba ki khun ki kti jong phi ki kylli aïu kine ki maw ki mut,

⁷ phin ïathuh ïa ki ba ka um jong ka Jordan ka la sangeh ban tuid haba ka Synduk ka Jutang U Trai ka jam ïa ka wah. Kine ki maw kin ïai pynkynmaw ïa ki paid Israel shaphang kaei kaba la jia hangne.”

⁸ Ki rangbah ki bud ïa ki hukum jong u Joshua. Kumba U Trai u la hukum ïa u Joshua, ki la shim khat-ar tylli ki maw napdeng jong ka Jordan, uwei na ka bynta kawei kawei ka jait Israel, ki la bah ïa ki sha ka jaka shong dara, bad ki buh ïa ki hangta.

⁹ U Joshua u pynïeng ruh khat-ar tylli ki maw hapdeng jong ka Jordan, ha kaba ki lyngdoh kiba bah ïa ka Synduk ka Jutang ki la ïeng. (Kito ki maw ki dang don hangta.)

¹⁰ Ki lyngdoh ki ïeng hapdeng jong ka Jordan haduh ban da pyndep lut ïa kaei kaei baroh ba U Trai u la hukum ïa u Joshua ban ong ïa u paidbah ban leh. Kane ka dei kata kaba u Moses u la hukum. U paidbah u la pynkloi sha shiliang ka wah.

¹¹ Haba baroh ki la ïadon sha kawei pat ka liang, kita ki lyngdoh bad ka Synduk ka Jutang U Trai ki jam ha shuwa uta u paidbah.

¹² Ki rangbah na ka jait Reuben bad ka jait Gad, bad na ka shiteng ka jait Manasseh, ki la khreh ïa ka thma, ki la jam ha shuwa jong kiba sah jong uta u paidbah, kumba u Moses u la bthah ïa ki ban leh.

¹³ Ha ka jingdon ryngkat U Trai kumba sawphew hajar ngut ki rangbah kiba la khreh ïa ka thma ki la jam sha shiliang sha ka pyntha kaba hajan ka Jerikho.

¹⁴ Kaei kaba U Trai u la leh ha kata ka sngi, ka la pynlong ïa ki paid Israel ban ñiew ïa u Joshua u riewkhraw. Ki burom ïa u shi lynter ka jingim jong u, kumba ki la burom ïa u Moses.

¹⁵ Nangta U Trai u ong ïa u Joshua

¹⁶ ban hukum ïa ki lyngdoh kiba bah ïa ka Synduk ka Jutang ban wan kiew noh na ka Jordan.

¹⁷ U Joshua u la leh kumta,

¹⁸ bad haba ki lyngdoh ki la poi ha ka rudwah, ka wah ka la sdang ban tuid biang bad ka la pynshlei ïa ki rud jong ka baroh sa shisien pat.

¹⁹ U paidbah u la jam ïa ka Jordan ha ka sngi kaba shiphew jong u bnai uba nyngkong bad ki la shong dara ha Gilgal, ha ka phang mihngi jong ka Jerikho.

²⁰ Hangta u Joshua u pynïeng ïa ki khat-ar tylli ki maw ba la shim na ka Jordan.

²¹ Bad u la ong ha ki paid Israel, “Hadien habud, haba ki khun ki kti jong phi ki kylli ïa phi aïu kine ki maw ki mut,

²² phin ïathuh ha ki shaphang ka por mynba ki Israel ki la jam ïa ka Jordan halor ka dewryngkhiang.

²³ Ïathuh ïa ki ba U Trai U Blei jong phi u la pynrngad ïa ka um jong ka Jordan na ka bynta jong phi haduh ba phin da la jam sha shiliang, kumba u la pynrngad ïa ka Duriaw Basaw na ka bynta jong ngi.

²⁴ Namar kane, uwei pa uwei ha ka pyrthei un tip haduh katno ka bor jong U Trai ka long kaba khraw, bad ba phin burom ïa U Trai U Blei jong phi junom.”