JOSHUA 3 - Khasi CL Bible (BSI)

Ki paid Israel ki jam ïa ka Jordan

¹ Ha ka step kaba bud, u Joshua bad ki paid Israel baroh ki khie dang step phyrngab, bad ki mihnoh na ka jaka shong dara ha Akasia, bad ki la leit sha Jordan, ha kaba ki la sher dara katba ki dang ap ban jam ïa ka.

² Hadien lai sngi, ki nongïalam ki leit kylleng ka jaka shong dara,

³ bad ong ha ki paidbah, “Haba phi ïohi ïa ki lyngdoh ba ki bah ïa ka Synduk ka Jutang jong U Trai U Blei jong phi, loit noh ïa ka jaka shong dara bad bud ïa ki.

⁴ Phim pat ju poi hangta mynshuwa, kumta kin pyn-i ha phi ka lynti ba phin leit. Hynrei wat leit sha jan ka Synduk ka Jutang; pynjngai kumba shi kilomitar nadien jong ka.”

⁵ U Joshua u ong ha ki paidbah, “Pynkhuid ïa lade, namar lashai U Trai un leh ki kambah hapdeng jong phi.”

⁶ Nangta u ong ïa ki lyngdoh ban shim ïa ka Synduk ka Jutang bad leit bad ka ha shuwa ki paidbah. Ki la leh kumba u la ong.

⁷ U Trai u ong ha u Joshua, “Kaei kaba nga leh mynta ka sngi kan pynlong ïa ki paid Israel baroh ban sdang ban burom ïa me kum u riewkhraw, bad kin ïoh tip ba nga long lem ryngkat bad me kumba nga la long bad u Moses.

⁸ Ong ïa ki lyngdoh kiba bah ïa ka Synduk ka Jutang ba ynda ki poi ha ka wah, ki dei ban ïaid ha ki um bad ban ïeng hajan ka rudwah.”

⁹ Nangta u Joshua u ong ha ki paidbah, “Ale hangne bad sngap ïa kaei kaba U Trai U Blei jong phi u don ban ong.

¹⁰ Katba phi nang tur sha khmat, un beh noh da shisha ïa ki Kanaan, ki Hit, ki Hib, ki Peris, ki Girgash, ki Amor, bad ki Jebus.

¹¹ Phin tip ba U Blei uba im u don hapdeng jong phi haba ka Synduk ka Jutang U Trai jong ka pyrthei baroh kan jam ïa ka Jordan ha shuwa jong phi.

¹² Mynta to jied khat-ar ngut ki rangbah, uwei na kawei kawei ka jait Israel.

¹³ Haba ki lyngdoh kiba bah ïa ka Synduk ka Jutang U Trai jong ka pyrthei baroh kin ïuh ïa la ki kjat ha um, ka Jordan kan sangeh ban tuid, bad ka um kaba wan tuid na shaneng kan lang shi jaka.”

^14-15 Ka dei ka aïom ot, bad ka wah ka don ha ka jingshlei um. Haba u paidbah u la mihnoh na ka jaka shong dara ban jam ïa ka Jordan, ki lyngdoh ki la leit ha shuwa jong ki, ki da bah ïa ka Synduk Ka Jutang. Hamar ba ki lyngdoh ki ïuh ha ka wah,

¹⁶ ka um ka sangeh ban tuid bad ka lang shi jaka, kham jngai na kaba wan tuid ha Adam, ka nongbah hajan ka Sarethan. Ïa ka jingtuid jong ka arsut sha ka Duriaw Baïap la pyndkut, bad u paidbah u la lah ban jam sha shiliang hajan ka Jerikho.

¹⁷ Katba u paidbah u dang ïaid sha shiliang ha ka khyndew kaba rkhiang, ki lyngdoh kiba bah ïa ka Synduk ka Jutang U Trai ki ïeng ha ka dewryngkhiang hapdeng jong ka Jordan tad haduh ba uta u paidbah un da jam sha shiliang.