JOSHUA 24 - Khasi CL Bible (BSI)

U Joshua u kren ïa u paidbah ha Shekhem

¹ U Joshua u la lumlang ïa ki jait Israel baroh ha Shekhem. U la khot ïa ki tymmen ki san, ki nongïalam, ki nongbishar, bad ki rangbah pynïaidkam jong ki Israel, bad ki la ïawan sha ka jingdon ryngkat U Blei.

² U Joshua u ong ha uta u paidbah baroh, “Kane ka long kaei kaba U Trai, U Blei ki Israel, u don ban ong: ‘Mynhyndai, ki kpa tymmen jong phi ki shong ki sah sha shiliang jong ka wah Ïuphratis, bad ki la mane ïa kiwei pat ki blei. Uwei na kito ki kpa tymmen u dei u Terah, u kpa jong u Abraham bad u Nahor.

³ Nangta nga la shim ïa u Abraham, u kpa tymmen jong phi, na ka ri kaba sha shiliang ka wah Ïuphratis bad nga ïalam ïa u lyngba ka ri Kanaan baroh kawei. Nga la ai ha u shibun ki khun ki ksiew. Nga la ai ha u ïa u Isaak,

⁴ bad ha u Isaak nga la ai ïa u Jakob bad u Iso. Nga la ai ha u Iso ïa ka ri lum Edom kum ka jingïohkynti jong u, hynrei u Jakob, u kpa tymmen jong phi, bad ki khun ki kti jong u, ki leit hiar sha Ijipt.

⁵ Kham hadien, nga la phah ïa u Moses bad u Aaron, bad nga la wallam ka jingjynjar bakhraw halor ka Ijipt.

⁶ Hynrei nga la ïalam noh ïa phi; nga la wallam ïa ki kpa tymmen jong phi na Ijipt, bad ki nong Ijipt ki la beh kthong nadien jong ki da ki kali ïapom bad ki nongshong kulai.

⁷ Hynrei haba ki kpa tymmen jong phi ki poi ha Duriaw Basaw, ki la kyang sha nga ban ïoh jingïarap, bad nga la buh ïa ka jingdum hapdeng jong ki bad ki nong Ijipt. Nga la pynlong ïa ka duriaw ba kan tyllep halor ki nong Ijipt bad pynïap jyllop ïa ki. Phi tip kaei kaba nga la leh ïa ka Ijipt. “ ‘Phi la im slem bha ha ka ri shyiap.

⁸ Nangta nga la wallam ïa phi sha ka ri ki Amor, kiba shong ha ka phang mihngi jong ka Jordan. Ki la ïaleh ïa phi, hynrei nga la ai ha phi ka jingjop halor jong ki. Phi la knieh ïa ka jaka jong ki, bad nga la pynjot ïa ki katba phi nang ïaid sha khmat.

⁹ Nangta u syiem Moab, u Balak u khun jong u Sippor, u la ïaleh pyrshah ïa phi. U la phah ktien ïa u Balaam u khun jong u Beor bad u la ong ïa u ban buh ka jingtim halor jong phi.

¹⁰ Hynrei ngam shym la shahshkor ïa u Balaam, kumta u la kyrkhu ïa phi, bad da kumta nga la pyllait ïa phi na u Balak.

¹¹ Phi la jam ïa ka Jordan bad wan poi sha ka Jerikho. Ki rangbah ka Jerikho ki la ïaleh pyrshah ïa phi, kumba la leh ki Amor, ki Peris, ki Kanaan, ki Hit, ki Girgash, ki Hib bad ki Jebus. Hynrei nga la ai ha phi ka jingjop halor jong ki baroh.

¹² Katba phi nang tur sha khmat, nga la pynshaïong ïa ki khnang ban beh noh ïa ki ar ngut ki syiem Amor. Ki waitlam bad ki ryntieh jong phi kim ïadon bynta ei ei bad kane.

¹³ Nga la ai ha phi ïa ka khyndew ha kaba phim shym la trei bad ïa ki nongbah kiba phim shym la tei. Mynta phi shong phi sah hangta bad bam ïa ki sohwaiñ na ki dieng sohwaiñ kiba phim shym thung, bad ki soh Olib na ki dieng kiba phim shym thung.’

¹⁴ “Mynta te,” u Joshua u bteng, “pyndonburom ïa U Trai, bad shakri ïa u da kaba sngur bad kaba shisha. Iehnoh syndon ïa ki blei ba ki kpa tymmen jong phi ki la ju mane ha Mesopotamia bad ha Ijipt, bad shakri tang ïa U Trai.

¹⁵ Te lada phim mon ban shakri ïa u, jied ha kane hi ka sngi ïano phin shakri, ïa ki blei ba ki kpa tymmen jong phi ki la mane ha Mesopotamia, ne ïa ki blei jong ki Amor, kiba ha ka ri jong ki phi shong phi sah mynta. Hynrei ma nga bad ka ïing jong nga, ngin shakri ïa U Trai.”

¹⁶ U paidbah u jubab, “Da lei lei ngin ym iehnoh ïa U Trai ban shakri ïa kiwei pat ki blei!

¹⁷ U Trai U Blei jong ngi u la wallam ïa ki kpa jong ngi bad ïa ngi ruh na ka jinglongmraw ha Ijipt, bad ngi la ïohi ïa ki kambah ba u la leh. U la ri pynim ïa ngi shano shano shaba ngi leit hapdeng ki jaitbynriew baroh ba ngi la ïaid lyngba.

¹⁸ Katba ngi nang ïaid sha khmat sha kane ka ri, U Trai u la beh ïa ki Amor baroh kiba shong basah hangne. Kumta ma ngi ruh, ngin shakri ïa U Trai, u long U Blei jong ngi.”

¹⁹ U Joshua u ong ha u paidbah, “Hynrei phin ym lah ban shakri ïa U Trai. U long U Blei uba khuid bad un ym map ïa ki pop jong phi.

²⁰ Um lah ban shah ïa kiwei pat kiba ïaleh pyrshah bad u, bad lada phi iehnoh ïa u ban shakri ïa ki blei nongwei, un phai pyrshah ïa phi bad un pynshitom ïa phi. Un pynjot thiaw ïa phi, wat la u long uba bha ïa phi mynshuwa.”

²¹ U paidbah u ong ha u Joshua, “Em! Ngin shakri ïa U Trai.”

²² U Joshua u ong ha ki, “Phi long ki sakhi ïa lade hi ïa ka jingshisha ba phi la jied ban shakri ïa U Trai.” “Ho-oid,” ki ong, “ngi long ki sakhi.”

²³ “Te kumta, iehnoh syndon ïa kito ki blei nongwei kiba phi don,” u la dawa, “bad kular skhem ïa ka jingïaineh jong phi sha U Trai, U Blei ki Israel.”

²⁴ Nangta u paidbah u ong ha u Joshua, “Ngin shakri ïa U Trai U Blei jong ngi. Ngin kohnguh ïa ki hukum jong u.”

²⁵ Kumta u Joshua u pynlong ka jutang na ka bynta u paidbah ha kata ka sngi, bad hangta ha Shekhem u la ai ha ki ïa ki aiñ bad ki jingbuhbeit ryntih ba kin bud.

²⁶ U Joshua u thoh ïa kita ki hukum ha ka kitab Ka Aiñ U Blei. Nangta u la shim uwei u maw uba heh, bad u pynïeng ïa u hapoh u dieng Sning ha ka jaka kyntang jong U Trai.

²⁷ U ong ha u paidbah baroh, “Une u maw un long u sakhi ïa ngi. U la ïohsngew ïa ki ktien baroh ba U Trai u la kren ha ngi. Kumta un long u sakhi pyrshah ïa phi, ban da ïa phi na kaba ïaleh pyrshah ïa U Blei jong phi.”

²⁸ Nangta u Joshua u la phah noh ïa u paidbah, bad uwei pa uwei u leit phai pat sha la ka jong ka jong ka jaka.

U Joshua bad u Eleasar ki ïap

²⁹ Hadien kata, u shakri U Trai, u Joshua u khun jong u Nun, u la ïap ha ka rta kaba shispah shiphew snem.

³⁰ Ki la tep ïa u ha ka ri kynti jong u hi ha Timnath Serah ha ka ri lum Ephraim, ha ka phang bashatei jong u Lum Gaash.

³¹ Katba u Joshua u dang im, ki paid Israel ki la shakri ïa U Trai, bad hadien ka jingïap jong u, ki dang bteng ban leh kumta katba dang im kito ki nongïalam kiba la ïohi da lade hi ïa kaei kaei baroh kaba U Trai u la leh na ka bynta ki Israel.

³² Ïa ka met jong u Joseph, kaba ki paid Israel ki la wanrah na Ijipt, la tep ha Shekhem, ha kata ka jaka ba u Jakob u la thied ha ka dor shispah tylli ki sbai rupa na ki khun jong u Hamor, u kpa jong u Shekhem. Ïa kane ka jaka la ïohpateng da ki khun ki ksiew jong u Joseph.

³³ U Eleasar u khun jong u Aaron u la ïap, bad la tep ha Gibeah, ka shnong ha ka ri lum Ephraim ïa kaba la ai ha u khun jong u, u Phinehas.