JOSHUA 23 - Khasi CL Bible (BSI)

Ka jingkren khublei u Joshua

¹ Kham slem hadien kane, U Trai u la ai ha ki Israel ka jingïada na ki nongshun sawdong jong ki. Ha kata ka por u Joshua u la tymmen bha,

² kumta u khot ïa ki Israel baroh, ki tymmen ki san, ki nongïalam, ki nongbishar, bad ki rangbah pynïaidkam jong u paidbah, bad u ong, “Nga la tymmen bha mynta.

³ Phi la ïohi ïa baroh kaba U Trai U Blei jong phi u la leh ha kine ki jaitbynriew baroh na ka bynta jong phi. U Trai U Blei jong phi u la ïaleh na ka bynta jong phi.

⁴ Nga la ai kum ka jingïohkynti jong ki jait jong phi ïa ka ri jong kita ki jaitbynriew kiba dang sah, lem bad ka jong kito ki jaitbynriew kiba nga la dep jop, naduh ka wah Jordan ha ka phang mihngi haduh ka Duriaw Mediterranian ha ka phang sepngi.

⁵ U Trai U Blei jong phi un pynlong ïa ki ban kynriah na phi, bad un beh ïa ki katba phi nang tur sha khmat. Phin ïoh ïa ka ri jong ki, kumba U Trai U Blei jong phi u la kular ïa phi.

⁶ Kumta sumar ban kohnguh bad leh ïa kaei kaei baroh kaba la thoh ha ka kitab ka Aiñ u Moses.

⁷ Wat klet ïa kano kano ka bynta jong ka, bad nangta phin ym ïakhleh bad kine ki briew kiba dang sah hapdeng jong phi lane ïakren ïa ki kyrteng jong ki blei jong ki lane pyndonkam ïa kito ki kyrteng ha kaba shim smai lane mane ïa kito ki blei lane nguh dem ïa ki.

⁸ Pynban, to ïaineh ha U Trai, kumba phi la leh haduh mynta.

⁹ U Trai u la beh noh ïa ki jaitbynriew kiba khraw bad badonbor katba phi nang ïaid sha khmat, bad ym don mano mano ba la lah ban ïeng pyrshah ïa phi.

¹⁰ Uwei uwei na phi u lah ban pynher krad shihajar ki nongïapom, namar U Trai U Blei jong phi u ïaleh na ka bynta jong phi, kumba u la kular.

¹¹ Da sumar bha te, ban ieit ïa U Trai U Blei jong phi.

¹² Lada phi long ki bymïaineh bad ïasnohkti bad kita ki jaitbynriew kiba dang sah hapdeng jong phi bad phi ïashongkha khleh bad ki,

¹³ to tip skhem ba U Trai U Blei jong phi un ym beh shuh ïa kine ki jaitbynriew na khmat jong phi katba phi nang ïaid sha khmat. Pynban, kin long ka jingmynsaw ïa phi kum ka shangkhawiah lane ka thliew bad kaba pang shikatdei eh kum ka jingsympat ha ka ingdong jong phi lane ki shiah ha ki khmat jong phi. Bad kane kan neh tad haduh ba ym don shuh uwei ruh napdeng jong phi uba dang lait im ha kane ka ri kaba bha ïa kaba U Trai U Blei jong phi u la ai ha phi.

¹⁴ “Mynta, ka la dei ka por ïa nga ban ïap. Uwei pa uwei na phi u tip ha la ka dohnud bad ha la ka mynsiem ba U Trai U Blei jong phi u la ai ha phi ïa kiei kiei kiba bha baroh kiba u la kular ha phi. Ïa kawei pa kawei ka kular la pyndep, ym don kawei ruh ka ban sep-ei.

¹⁵ Hynrei kumba u la bat ïa kawei pa kawei ka jingkular kaba u la pynlong ha phi, kumta ruh un pyndep ïa kawei pa kawei ka jingbyrngem.

¹⁶ Lada phim sumar ïa ka jutang kaba U Trai U Blei jong phi u la hukum ïa phi ban sumar bad lada phi shakri bad mane ïa kiwei pat ki blei, kumta te ha ka jingbitar jong u, un pynshitom ïa phi, bad shen ym don uwei ruh na phi u ban lait im ha kane ka ri babha kaba u la ai ha phi.”