JOSHUA 22 - Khasi CL Bible (BSI)

U Joshua u phah noh sha ïing ïa ki jait kiba na mihngi

¹ Nangta u Joshua u khot lang ïa ki paidbah jong ki jait Reuben, Gad, bad Manasseh ba sha Mihngi.

² U ong ha ki, “Phi la pyndep lut ïa kaei kaba u Moses u shakri U Trai u la hukum ïa phi ban leh, bad phi la kohnguh ïa ki hukum jong nga baroh.

³ Baroh shi katta phim pat ju iehnoh ïa kiwei pat ki para Israel. Phi da phikir bha ban kohnguh ïa ki hukum jong U Trai U Blei jong phi.

⁴ Mynta, kumba u la kular, U Trai U Blei jong phi u la ai ka jingsuk ha kiwei pat ki para Israel. Kumta, khie leit phai noh sha ïing sha la ka ri kaba phi la kam kynti na ka bynta ïa lade, ka ri ha ka phang mihngi jong ka Jordan, kaba u Moses u shakri jong U Trai u la ai ha phi.

⁵ Pynthikna ba phi kohnguh ïa ka aiñ kaba u Moses u la hukum ïa phi: ieit ïa U Trai U Blei jong phi, leh ïa ka mon jong u, kohnguh ïa ki hukum jong u, ïaineh ha u, bad shakri ïa u da ka dohnud bad ka mynsiem jong phi baroh.”

^6-8 U Joshua u la phah ïa ki sha ïing ryngkat bad ki jingkyrkhu jong u, bad kine ki ktien: “Phi leit phai pat sha ïing kiba la riewspah bha, lem bad shibun ki jingri, ka rupa, ka ksiar, ka rnong, ka nar, bad shibun ki jaiñphong. Ïasam bynta lem bad la ki para jait ïa kaei kaba phi la shim na ki nongshun jong phi.” Nangta, ki leit phai noh sha ïing. U Moses u la ai jaka ha ka phang mihngi jong ka Jordan ha kaba shiteng na ka jait Manasseh, hynrei ïa kawei pat kaba shiteng, u Joshua u la ai ka jaka ha ka phang sepngi jong ka Jordan, lem bad kiwei pat ki jait.

⁹ Kumta ki paidbah jong ki jait Reuben, Gad, bad Manasseh ba sha Mihngi ki la leit phai pat sha ïing. Ki la iehnoh ïa kiba sah jong u paid Israel ha Shiloh ha ka ri Kanaan bad ki la mihnoh sha la ka jong ka ri, ka ri Gilead, ha kaba ki la lah shim kumba U Trai u la hukum ïa ki lyngba u Moses.

Ka duwan harud ka Jordan

¹⁰ Haba ki jait Reuben, Gad, bad Manasseh ba sha Mihngi ki la poi ha Geliloth, kaba dang dei ha ka liang sepngi jong ka Jordan, ki la tei hangta ka duwan kaba khraw bad kaba ishongkun harud ka wah.

¹¹ La ïathuh ha kiba sah jong ki paid Israel, “Pynshahshkor! Ki paidbah jong ki jait Reuben, Gad bad Manasseh ba sha Mihngi ki la tei ka duwan ha Geliloth, ha ka Jordan sha ka liang jong ngi!”

¹² Haba ki paid Israel ki ïohsngew ïa kane, ka kynhun baroh kawei ka la ïalumlang ha Shiloh ban ïaleh thma pyrshah ïa ki jait ba sha mihngi.

¹³ Nangta ki paid Israel ki phah ïa u Phinehas, u khun jong u Eleasar u lyngdoh, sha ki paidbah jong ki jait Reuben, Gad, bad Manasseh ba sha Mihngi, ha ka ri Gilead.

¹⁴ Shiphew ngut ki riewkhmat ki leit ryngkat bad u Phinehas, uwei uwei na kawei kawei ka jait kaba ha ka phang sepngi bad uwei pa uwei na ki u dei u khlieh jong ka longïing hapdeng ki kur.

¹⁵ Ki la wan sha ka ri Gilead, sha ki paidbah jong ki jait Reuben, Gad, bad Manasseh ba sha Mihngi,

¹⁶ bad ki kren na ka bynta u paidlang U Trai; ki ong ha ki, “Balei phi leh ïa kane kaei kaei kaba sniew pyrshah ïa U Blei ki Israel? Phi la leh pyrshah ïa U Trai da kaba tei ïa kane ka duwan na ka bynta ïa lade! Phim shym bud shuh ïa u!

¹⁷ Kynmaw ïa ka pop jong ngi ha Peor, haba U Trai u la pynshitom ïa la ki briew da ka jingïapthem? Ngi dang ïai shitom namar kata. Hato kata ka pop kam pat biang?

¹⁸ Hato phin kyntait ban bud ïa u mynta? Lada phi ïaleh pyrshah ïa U Trai mynta, un bitar ïa uwei pa uwei ha Israel lashai ka sngi.

¹⁹ Hynrei mynta, lada ka ri jong phi kam bit kam biang na ka bynta ban mane Blei ha ka, wan noh sha shiliang sha ka ri jong U Trai, ha kaba ka Ïingjaiñ jong u ka ïeng. Kam kynti katto katne ka jaka hapdeng jong ngi. Hynrei wat ïaleh pyrshah ïa U Trai, lane pynlong ïa ngi ki nongïaleh pyrshah da kaba tei ka duwan nalor ka duwan U Trai U Blei jong ngi.

²⁰ Kynmaw kumno u Akhan u khun jong u Serah u la kyntait ban kohnguh ïa ka hukum shaphang kiei kiei kiba la pynrem sha ka jingpynjot; ka kynhun Israel baroh kawei ka la shah pynshitom namar kata. U Akhan um shym long tang ma u uba la ïap namar ka pop jong u.”

²¹ Ki paidbah jong ki jait Reuben, Gad, bad Manasseh ba sha Mihngi ki jubab ïa ki khlieh jong ki longïing jong ki jait ba sha sepngi:

²² “U Bakhrawbor tam u dei U Blei! U long U Trai! U Bakhrawbor tam dei U Blei! U long U Trai! U tip balei ngi leh ïa kane, bad ngi kwah ba phi ruh phin tip! Lada ngi ïaleh pyrshah bad ngim ïai bat ïa ka jingngeit bad U Blei, wat shah shuh ïa ngi ban im!

²³ Lada ngim shym kohnguh ïa U Trai bad tei ïa la ka jong ka duwan ban thang jingainguh halor jong ka lane ban pyndonkam na ka bynta ka jingainguh bam lane ki jingainguh ïasyllok, ai ba U Trai da lade hi un pynshitom ïa ngi.

²⁴ Em! Ngi la leh ïa ka namar ngi sheptieng ïoh ba hadien habud ki khun ki ksiew jong phi kin ong ha ki khun ki ksiew jong ngi, ‘Phi donkam aïu bad U Trai, U Blei ki Israel?

²⁵ U Trai u la buh ïa ka Jordan ban long u pud hapdeng jong ngi bad ma phi ki briew jong ki jait Reuben bad Gad. Phim don bynta ei ei shuh bad U Trai.’ Te ki khun ki ksiew jong phi ki lah ban khang ïa ki khun ki ksiew jong ngi ban mane ïa U Trai.

²⁶ Kumta ngi la tei ïa ka duwan, ym ban thang ïa ki jingkñia lane ban pynlong ka jingainguh,

²⁷ hynrei pynban, kum ka dak ïa ki briew jong ngi bad jong phi, bad na ka bynta ki pateng ki ban wan hadien jong ngi, kata kaba ngi da mane shisha ïa U Trai ha khmat ka Ïingjaiñ bakyntang lem bad ki jingainguh jong ngi ban thang bad ki jingkñia bad ki jingainguh ïasyllok. Kane ka long ban sumar ïa ki khun ki ksiew jong phi na kaba ong ba ka jong ngi kam don jingïadei ei ei bad U Trai.

²⁸ Ka long ka jingpyrkhat jong ngi ba lada kane kan urlong, ki khun ki ksiew jong ngi ki lah ban ong, ‘Ha khmih! Ki kpa tymmen jong ngi ki la tei ka duwan kaba kum ka duwan jong U Trai. Kam shym dei na ka bynta ki jingainguh thang lane ka jingkñia, hynrei kum ka dak na ka bynta ki briew jong ngi bad jong phi.’

²⁹ Da lei lei ruh ngin ym ïaleh pyrshah ïa U Trai lane sangeh noh na kaba bud ïa u mynta da kaba tei ka duwan ban thang ki jingainguh halor jong ka lane na ka bynta ki jingainguh bam lane ki jingkñia. Ngin ym tei kano kano kawei pat ka duwan nalor ka duwan U Trai U Blei jong ngi uba ïeng ha khmat ka Ïingjaiñ ka Jingdon Ryngkat jong u!”

³⁰ U Phinehas u lyngdoh bad ki shiphew ngut ki riewkhmat jong ka kynhun kaba don bad u, ki khlieh jong ki longïing jong ki jait ba sha sepngi, ki la ïohsngew ïa kaei ba u paidbah jong ki jait Reuben, Gad, bad Manasseh ba sha Mihngi ki don ban ong, bad ki la sngewhun.

³¹ U Phinehas, u khun jong u Eleasar u lyngdoh, u ong ha ki, “Mynta ngi tip ba U Trai u don bad ngi. Phim shym la ïaleh pyrshah ïa u, bad kumta phi la pynim ïa ki paid Israel na ka jingpynshitom jong U Trai.”

³² Nangta u Phinehas bad ki nongïalam ki leit noh na u paidbah jong ki jait Reuben bad Gad ha ka ri Gilead bad ki la leit phai pat sha Kanaan, sha ki paid Israel, bad ki la ïathuh ha ki.

³³ Ki Israel ki la sngewhun bad ki la ïaroh ïa U Blei. Kim ïakren shuh shaphang kaba leit ïaleh thma ban pynjot ïa ka ri ha kaba u paidbah jong ki jait Reuben bad ki Gad ki la shongduh.

³⁴ U paidbah jong ki jait Reuben bad Gad u ong, “Kane ka duwan ka long ka sakhi ïa ngi baroh ba U Trai u long U Blei.” Bad kumta ki ai kyrteng ïa ka “Ka Sakhi.”