JOSHUA 21 - Khasi CL Bible (BSI)

Ki nongbah jong ki Lebi

¹ Ki nongïalam jong ki longïing na ka jait Lebi ki leit sha u Eleasar u lyngdoh, sha u Joshua u khun jong u Nun, bad sha ki khlieh jong ki longïing na ki jait Israel baroh.

² Hangta ha Shiloh ha ka ri Kanaan ki ong ha ki, “U Trai u la hukum da u Moses ba dei ban ai ïa ngi ki nongbah ba ngin shong ngin sah, lem bad ki pyntha phlang sawdong jong ki na ka bynta ki jingri jong ngi.”

³ Kumta, kat kum ka hukum U Trai, ki paid Israel ki ai ha ki Lebi katto katne tylli ki nongbah lem bad ki pyntha phlang na ki jaka jong ki.

⁴ Ki longïing na ka kur Kohath jong ka jait Lebi ki long kiba nyngkong eh ban ïoh ïa ki nongbah. Ki longïing kiba hiarpateng na u Aaron u lyngdoh ki ïoh khatlai tylli ki nongbah na ki jaka jong ki jait Judah, Simeon bad Benjamin.

⁵ Kiwei pat kiba sah jong ka kur Kohath ki ïoh shiphew tylli ki nongbah na ki jaka jong ki jait Ephraim, Dan, Manasseh ba sha Sepngi.

⁶ Ka kur Gershon ka ïoh khatlai tylli ki nongbah na ki jaka jong ki jait Issakhar, Asher, Naphtali, Manasseh ba sha Mihngi.

⁷ Ki longïing jong ka kur Merari ki ïoh khat-ar tylli ki nongbah na ki jaka jong ki jait Reuben, Gad, bad Sebulun.

⁸ Da kaba kynting sbai, ki paid Israel ki ai ïa kine ki nongbah bad ki pyntha phlang ha ki Lebi, kumba U Trai u la hukum lyngba u Moses.

⁹ Kine ki long ki kyrteng jong ki nongbah na ki jaka jong ki jait Judah bad Simeon ïa kiba la ai

¹⁰ ha ki khun ki ksiew jong u Aaron, kiba dei na ka kur Kohath, kiba hiarpateng na u Lebi. Ka bynta jong ki ka dei kaba nyngkong eh ban pyndep.

¹¹ La ai ha ki ïa ka nongbah Arba (u Arba u dei u kpa jong u Anak), ïa kaba mynta la khot ka Hebron, ha ka ri lum Judah, lem bad ki pyntha phlang sawdong jong ka.

¹² Pynban, ïa ki pyntha jong ka nongbah, lem bad ki nongrit jong ka la lah ai ha u Kaleb u khun jong u Jephunneh kum ka jingïohkynti jong u.

¹³ Nalor jong ka Hebron (kawei na ki nongbah jakarieh), la ai ïa kine ki nongbah harum ha ki khun ki ksiew jong u Aaron u lyngdoh: Ka Libnah,

¹⁴ ka Jattir, ka Eshtemoa,

¹⁵ ka Holon, ka Debir,

¹⁶ ka Ain, ka Juttah, bad ka Beth Shemesh, lem bad ki pyntha phlang jong ki: khyndai tylli ki shnong na ki jait Judah bad Simeon.

¹⁷ Na ka jaka jong ka jait Benjamin la ai saw tylli ki nongbah: ka Gibeon, ka Geba,

¹⁸ ka Anathoth, bad ka Almon, lem bad ki pyntha phlang jong ki.

¹⁹ Baroh ki long khatlai tylli lem bad ki pyntha phlang jong ki, la ai ha ki lyngdoh, kiba hiarpateng na u Aaron.

²⁰ Kiwei pat ki longïing jong ka kur Kohath ki ïoh katto katne ki nongbah na ka jaka jong ki Ephraim.

²¹ La ai ha ki, saw tylli ki nongbah: ka Shekhem bad ki pyntha phlang jong ka ha ka ri lum Ephraim (kawei na ki nongbah jakarieh), ka Geser,

²² ka Kibsaim, bad ka Beth Horon, lem bad ki pyntha phlang jong ki.

²³ Na ka jaka jong ka jait Dan la ai ha ki saw tylli ki nongbah: ka Eltekeh, ka Gibbethon,

²⁴ ka Aijalon, bad ka Gathrimmon, lem bad ki pyntha phlang jong ki.

²⁵ Na ka jaka jong ka Manasseh ba sha Sepngi, la ai ar tylli ki nongbah: ka Taanakh bad ka Gathrimmon, lem bad ki pyntha phlang jong ki.

²⁶ Kine ki longïing jong ka kur Kohath ki la ïohpdiang shiphew tylli ki nongbah lem bad ki pyntha phlang jong ki.

²⁷ Kiwei pat ki kynhun jong ki Lebi, ka kur Gershon, ka ïohpdiang ar tylli ki nongbah na ka jaka jong ka Manasseh ba sha Mihngi: ka Golan ha Bashan (kawei na ki nongbah jakarieh) bad ka Beeshterah lem bad ki pyntha phlang jong ki.

²⁸ Na ka jaka jong ka jait Issakhar ki la ïohpdiang saw tylli ki nongbah: ka Kishion, ka Daberath,

²⁹ ka Jarmuth, bad ka Engannim, lem bad ki pyntha phlang jong ki.

³⁰ Na ka jaka jong ka jait Asher ki la ïohpdiang saw tylli ki nongbah: ka Mishal, ka Abdon,

³¹ ka Helkath, bad ka Rehob, lem bad ki pyntha phlang jong ki.

³² Na ka jaka jong ka jait Naphtali ki la ïohpdiang lai tylli ki nongbah: ka Kedesh ha Galilaïa, lem bad ki pyntha phlang jong ka (kawei na ki nongbah jakarieh), ka Hammoth Dor, bad ka Kartan, lem bad ki pyntha phlang jong ki.

³³ Ki longïing babun jong ka kur Gershon ki la ïohpdiang baroh khatlai tylli ki nongbah lem bad ki pyntha phlang jong ki.

³⁴ Kiba sah jong ki Lebi, ka kur Merari, ka la ïohpdiang na ka jaka jong ka jait Sebulun saw tylli ki nongbah: ka Jokneam, ka Kartah,

³⁵ ka Dimnah, bad ka Nahalal, lem bad ki pyntha phlang jong ki.

³⁶ Na ka jaka jong ka jait Reuben ki la ïohpdiang saw tylli ki nongbah: ka Beser, ka Jahas

³⁷ ka Kedemoth, bad ka Mephaath, lem bad ki pyntha phlang jong ki.

³⁸ Na ka jait Gad ki la ïohpdiang saw tylli ki nongbah: ka Ramoth ha Gilead, lem bad ki pyntha phlang jong ka (kawei na ki nongbah jakarieh), ka Mahanaim,

³⁹ ka Heshbon, bad ka Jaser, lem bad ki pyntha phlang jong ki.

⁴⁰ Kumta ïa ka kur Merari la ai khat-ar tylli ki nongbah.

^41-42 Na ka ri ba ki Israel ki la ïoh, la ai ha ki Lebi sawphew phra tylli ki nongbah, lem bad ki pyntha phlang sawdong jong ki.

Ki Israel ki shimti ïa ka ri

⁴³ Kumta U Trai u la ai ha ki Israel ïa ka ri baroh ïa kaba u la kular da kaba kyntang ha ki kpa tymmen jong ki ba un ai ha ki. Haba ki la shimti ïa ka, ki la shongduh hangta.

⁴⁴ U Trai u la ai ha ki ka jingshongsuk ha kata ka ri baroh kawei, kumba u la kular ïa ki kpa tymmen jong ki. Ym don uwei ruh na ki nongshun jong ki baroh uba lah ban ïeng pyrshah ïa ki, namar U Trai u la ai ha ki Israel ka jingjop ïa ki nongshun jong ki baroh.

⁴⁵ U Trai u la bat ïa kawei pa kawei na ki jingkular kiba u la pynlong ha ki paid Israel.