JOSHUA 20 - Khasi CL Bible (BSI)

Ki nongbah jakarieh

¹ Nangta U Trai u ong ha u Joshua

² ban ong ha ki paid Israel, “Jied ïa ki nongbah jakarieh kiba nga la hukum ha u Moses ban ïathuh ha phi.

³ Lada uno uno na phi da ka jingjia ryngkhat u pynïap ïano ïano, u lah ban leit shata bad lait na uta uba wad kput.

⁴ U lah ban phet ïap sha kawei na kine ki nongbah, un leit sha ka jaka bishar ha ka khyrdop sha ka nongbah, bad batai ha ki nongïalam ïa kaba la jia. Nangta kin shah ba un rung shapoh ka nongbah bad kin ai jaka sah ïa u, ba kumta u lah ban shong ban sah hangta.

⁵ Lada uta uba wad kput u bud ïa u shata, ki briew jong ka nongbah kim dei ban aiti ïa u ha uta. Ki dei ban ïada ïa u namar ba u la pynïap ïa u briew da ka jingjia ryngkhat bad ym na ka jingbitar.

⁶ U lah ban sah ha ka nongbah haduh ban da bishar paidbah ïa u bad haduh ka jingïap jong u briew uba long u Rangbah Lyngdoh ha kata ka por. Hadien kata, u lah ban leit phai pat sha ïing sha la ka shnong, na kaba u la phet ïap.”

⁷ Kumta, ha ka liang sepngi jong ka Jordan ki buh kyrpang ïa ka Kedesh ha Galilaïa, ha ka ri lum Naphtali, ïa ka Shekhem ha ka ri lum Ephraim, bad ïa ka Hebron ha ka ri lum Judah.

⁸ Ha ka phang mihngi jong ka Jordan, ha ka padun ri shyiap sha mihngi jong ka Jerikho, ki jied ïa ka Beser kaba ha ka jaka ki jait Reuben, ïa ka Ramoth ha Gilead ha ka jaka ki jait Gad; bad ïa ka Golan ha Bashan ha ka jaka ki jait Manasseh.

⁹ Kine ki long ki nongbah jakarieh ïa kiba la jied na ka bynta ki paid Israel baroh, bad na ka bynta uno uno u nongwei uba shong hapdeng jong ki. Uno uno uba pynïap briew da ka jingjia ryngkhat u lah ban shem jingïada hangta na uta uba wad kput; kim lah ban pynïap ïa u lymda u ïohpdiang shuwa ïa ka jingbishar paidbah.