JOSHUA 2 - Khasi CL Bible (BSI)

U Joshua u phah nongsyntiat sha Jerikho

¹ Nangta u Joshua u la phah ar ngut ki nongsyntiat na ka jaka shong dara ha Akasia lem bad ka hukum ba kin leit bad swar jar jar ïa ka ri Kanaan, khamtam eh ïa ka nongbah Jerikho. Haba ki la poi ha ka nongbah, ki la leit ban sahmiet ha ka ïing jong ka nuti kaba kyrteng ka Rahab.

² U Syiem ka Jerikho u la ïoh jingtip ba katto katne ngut ki nong Israel ki la wan ha kata ka miet ban syntiat ïa ka ri,

³ kumta u la phah ktien sha ka Rahab: “Ki rangbah ha ka ïing jong pha ki la wan ban syntiat ïa ka ri baroh kawei! Wallam ïa ki shabar!”

^4-6 “Katto katne ngut ki rangbah ki la wan sha ïing jong nga,” ka la jubab; “hynrei ngam tip ki dei kiba nangno. Ki la mihnoh ha ka por sep sngi shuwa ban khang ïa ka khyrdop shnong. Ngam tip shano ki leit, hynrei lada phin leit beh kloi kloi ïa ki, phi lah ban lap ïa ki.” (Mynta ka Rahab ka la ïalam ïa ki ar ngut ki nongsyntiat sha tnum ïing bad pynrieh ïa ki hapoh ki jyntang 'saihon ba ka la buh hangta.)

⁷ Ki briew jong u syiem ki la mihnoh na ka nongbah, bad nangta la khang noh ïa ka khyrdop. Ki la leit thwet ïa ki nongsyntiat Israel haduh ka jaka ha kaba ka surok ka ïaid lyngba ïa ka Jordan.

⁸ Shuwa ba kita ki nongsyntiat kin khreh thiah noh, ka Rahab ka la leit sha tnum ïing

⁹ bad ka ong ha ki, “Nga tip ba U Trai u la ai ha phi ïa kane ka ri. Uwei pa uwei ha ka ri u la dap da ka jingsheptieng ïa phi.

¹⁰ Ngi la ïohsngew kumno U Trai u la pynrngad ïa ka Duriaw Basaw ha khmat jong phi mynba phi mihnoh na Ijipt. Ngi la ïohsngew ruh kumno phi la pynïap ïa u Sihon bad ïa u Og, ki ar ngut ki syiem Amor ha ka phang mihngi jong ka Jordan.

¹¹ Ngi tang shu ïohsngew shaphang kata, ngi la sheptieng; ngi la duh ïa ka jingshlur jong ngi baroh namar jong phi. U Trai U Blei jong phi u long U Blei ha bneng shajrong bad hangne ha ka pyrthei.

¹² Mynta to smai da u ba phin lehbha ïa ka longïing jong nga kumba nga la leh ïa phi, bad ai ha nga katto katne ka dak ba nga lah ban shaniah ïa phi.

¹³ To kular ba phin pyllait im ïa i mei bad i pa, ki hynmen bad ki para jong nga, shynrang bad kynthei, bad ïa ki longïing longsem jong ki baroh. Wat shah ba yn pynïap ïa ngi!”

¹⁴ Ki rangbah ki ong ha ka, “Ai ba U Blei un shim noh ïa ka jingim jong ngi lada ngim leh kumba ngi kular! Lada phim ïathuh hano hano ïa kaei kaba ngi la leh, ngi kular ïa phi ba ynda U Trai u ai ha ngi ïa kane ka ri, ngin lehbha shisha ïa phi.”

¹⁵ Ka Rahab ka shong ka sah ha kawei ka ïing kaba la tei halor ka kynroh shnong hi; kumta ka la pynhiar shapoh ïa ki rangbah da u tyllai na ka jingkhangïit.

¹⁶ “Khie leit sha ka ri lum,” ka la ong, “ïoh ba ki briew jong u syiem kin lap ïa phi. Rieh hangta lai sngi haduh ba kin da wan phai. Hadien kata, phi lah ban leit la ka lynti.”

¹⁷ Ki rangbah ki ong ïa ka, “Ngin bat ïa ka kular kaba pha la pynlong ïa ngi ban ai.

¹⁸ Kane ka dei kaba pha dei ban leh. Haba ngi wan hiarthma ïa ka ri jong pha, teh ïa une u 'saisaw ha ka jingkhangïit na kaba pha la pynhiar shapoh ïa ngi. Lumlang ha ïing jong pha ïa la ka kmie bad u kpa, ki hynmen ki para shynrang, bad ki ba-ha-ïing ha-sem jong pha baroh.

¹⁹ Lada uno uno u mih shabar jong kane ka ïing, ka jingïap jong u kan dei ka jingbakla jong u hi, bad ngin ym kitkhlieh ei ei; hynrei lada la pynmynsaw ïa uno uno uba hapoh ka ïing, te ngi ngin kitkhlieh.

²⁰ Tangba lada pha ïathuh hano hano ïa kaei kaba ngi la leh, te ngim donkam ban bat ïa la ka kular ïa kaba pha la pynlong ïa ngi ban ai ha pha.”

²¹ Ka la mynjur bad phah noh ïa ki. Haba ki la leit, ka la teh ïa u 'saisaw ha ka jingkhangïit.

²² Ki nongsyntiat ki la leit sha ki lumrit bad rieh. Ki briew jong u syiem ki la wad ïa ki kylleng ka rudnong haduh lai sngi, hynrei kim shem ïa ki, kumta ki leit phai noh sha Jerikho.

²³ Nangta, ki ar ngut ki nongsyntiat ki la wan hiar na ki lumrit, ki jam ïa ka wah bad ki leit phai pat sha u Joshua. Ki ïathuh ha u ïa kaba la jia baroh, bad ki ong,

²⁴ “Ngi thikna ba U Trai u la ai ha ngi ïa ka ri baroh kawei. Ki briew baroh hangta ki la sngewsheptieng ïa ngi.”