JOSHUA 18 - Khasi CL Bible (BSI)

Kaba pynbynta ïa kaba dang sah jong ka ri

¹ Hadien ba ki la jop ïa ka ri, ka kynhun Israel baroh kawei ka la ïalumlang ha Shiloh bad pynïeng ïa ka Ïingjaiñ Ka Jingdon Ryngkat U Trai.

² Dang don sa hynñiew jait jong ki paid Israel ki bym pat ïoh ïa la ka bhah jong ka ri.

³ Kumta u Joshua u ong ha ki paid Israel, “Sa katno phin ap ha shuwa ban phin rung bad shim kynti ïa ka ri kaba U Trai, U Blei jong ki kpa tymmen jong phi, u la ai ha phi?

⁴ Ai ha nga lai ngut ki rangbah na kawei kawei ka jait. Ngan phah ïa ki ban leit lyngba ïa ka ri baroh kawei bad jurip ïa kata ka jaka kaba kin mon ban ïohkynti. Hadien kata kin wan pat ha nga.

⁵ Ïa ka ri yn pynbynta mar katjuh ha ki hynñiew bynta; ka jait Judah kan sah ha la ka jaka shaphang shathie, bad ka jait Joseph ha la ka jaka shaphang shatei.

⁶ To thoh ka jingbatai shaphang kine ki hynñiew bynta bad wallam ïa ka sha nga. Nangta ngan kynting sbai ban ïakren bad U Trai U Blei jong ngi na ka bynta jong phi.

⁷ Pynban, ki Lebi kin ym ïoh kano kano ka bynta jong ka ri lem bad phi, namar ka bynta jong ki ka long ban shakri kum ki lyngdoh jong U Trai. Bad da shisha, ki jait Gad, Reuben, Manasseh ba sha Mihngi te ki la lah ïohpdiang ïa la ka jaka ha ka phang mihngi jong ka Jordan, ïa kaba u Moses u shakri jong U Trai u la ai ha ki.”

⁸ Ki rangbah ki la leit ban jurip ïa ka ri hadien ba u Joshua u la ai ha ki ïa kine ki jingbthah: “Khie ïaid ïa ka ri baroh kawei bad jurip ïa ka, bad wan phai pat sha nga. Nangta, hangne ha Shiloh ngan ïakren bad U Trai na ka bynta jong phi da kaba kynting sbai.”

⁹ Kumta ki rangbah ki la leit kylleng ka ri bad ki la buh jingthoh kumno ki la pynbynta ïa ka ha ki hynñiew bynta, da kaba thoh ter ter ïa ki kyrteng jong ki nongrit. Nangta ki la leit phai pat sha U Joshua ha ka jaka shong dara ha Shiloh.

¹⁰ U Joshua u la kynting sbai ban ïakren bad U Trai na ka bynta jong ki, bad u la ai ha kawei pa kawei na ki jait kiba sah jong ki Israel shi bynta jong ka ri.

Ka jaka ba la ai ha ka jait Benjamin

¹¹ Ka jaka kaba dei jong ki longïing jong ka jait Benjamin ka long kaba nyngkong eh ïa kaba la ai. Ka jaka jong ki ka don hapdeng ki jait Judah bad Joseph.

¹² Ha ka phang bashatei u pud jong ki u sdang na Jordan bad u kiew artet ïa ka sharing lum kaba shatei na Jerikho bad u suh sha sepngi lyngba ka ri lum haduh ka ri shyiap Bethaben.

¹³ Nangta u suh sha ka sharing lum ha ka phang bashathie jong ka Lus (kaba la khot ruh ka Bethel), nangta arsut shaduh Ataroth Addar, ha u lum uba shathie na ka Beth Horon kaba sharum.

¹⁴ Nangta u khun sha kawei pat ka liang, da kaba phai shathie na ka liang sepngi jong uta u lum bad u suh shaduh ka Kiriath Baal (lane ka Kiriath Jearim), kaba dei jong ka jait Judah. Une u dei u pud uba shaphang sepngi.

¹⁵ U pud uba shaphang shathie u sdang na tduh jong ka Kiriath Jearim bad u suh shaduh ki Umpohliew jong ka Nephtoah.

¹⁶ Nangta u hiar arsut shaduh trai jong u lum na uba lah ban ïohi ïa ka Them Hinnom, ha ka tduh kaba shaphang shatei jong ka Them Rephaim. Nangta u suh arsut lyngba ka Them Hinnom, shathie na ka sharing lum jong ka Jebus, sha ka Enrogel.

¹⁷ Nangta u khun shaphang shatei sha Enshemesh bad nangta pat sha Geliloth, marpyrshah ïa ka khim Adummim. Nangta u hiar arsut sha u Maw jong u Bohan (u Bohan u dei u khun jong u Reuben),

¹⁸ bad u ïaid lyngba na shatei jong ka sharing lum na kaba lah ban ïohi ïa ka Them Jordan. Nangta u hiar arsut sha ka them,

¹⁹ u da ïaid na shatei jong ka sharing lum jong ka Beth Hoglah, bad u kut ha ka jaka ba ka wah Jordan ka wan tuid ha ka bynta bashatei jong ka Duriaw Baïap. Une u dei u pud uba shaphang shathie.

²⁰ Ka Jordan ka dei u pud uba shaphang mihngi. Kine ki dei ki pud jong ka ri kaba ki longïing na ka jait Benjamin ki la ïohpdiang kum ka jingïohkynti jong ki.

²¹ Ki nongbah kiba dei jong ki longïing na ka jait Benjamin ki long ka Jerikho, ka Beth Hoglah, ka Emek Kesis,

²² ka Beth Arabah, ka Semaraim, ka Bethel,

²³ ka Abbim, ka Parah, ka Ophrah,

²⁴ ka Shepharammoni, ka Ophni, bad ka Geba: khat-ar tylli ki nongbah, lem bad ki nongrit sawdong jong ki.

²⁵ La don ruh ka Gibeon, ka Ramah, ka Beeroth,

²⁶ ka Mispah, ka Shephirah, ka Mosah,

²⁷ ka Rekem, ka Irpeel, ka Taralah,

²⁸ ka Sela, ka Haeleph, ka Jebus (lane ka Jerusalem), ka Gibeah, bad ka Kiriath Jearim: khatsaw tylli ki nongbah, lem bad ki nongrit sawdong jong ki. Kane ka long ka ri kaba ki longïing na ka jait Benjamin ki la ïohpdiang kum ka jingïohkynti jong ki.