JOSHUA 14 - Khasi CL Bible (BSI)

Ka jingpynbynta ïa ka thain kaba sha sepngi jong ka Jordan

¹ Kaba bud harum ka long ka jingïathuh ba kumno ïa ka ri Kanaan kaba ha ka phang sepngi jong ka Jordan la pynbynta hapdeng ki paid Israel. U Eleasar u lyngdoh, u Joshua u khun jong u Nun, bad ki nongïalam jong ki longïing jong ki jait Israel ki pynbynta ïa ka hapdeng ki paidbah.

² Kumba U Trai u la hukum ïa u Moses, ïa ki jaka jong ki khyndai jait bad kawei ka shiteng jait ha ka phang sepngi jong ka Jordan la rai da kaba kynting sbai.

^3-4 U Moses u la dep ai ïa ka ri ha ka phang mihngi jong ka Jordan ha kiwei pat ki ar jait bad shiteng jong kawei jait. (Ïa kiba hiarpateng na u Joseph la bynta ha ki ar jait: Manasseh bad Ephraim.) Wat la katta, u Moses um shym la ai kano kano ka bynta jong ka jaka ïa ki Lebi. Tangba, ki la ïoh ïa ki nongbah ban shong ban sah, lem bad ki pyntha na ka bynta ki jingri jong ki.

⁵ Ki paid Israel ki la bynta ïa ka ri kumba U Trai u la hukum ïa u Moses.

La ai ïa ka Hebron ha u Kaleb

⁶ Ha kawei ka sngi katto katne ki briew na ka jait Judah ki la wan ha u Joshua ha Gilgal. Uwei na ki, u Kaleb u khun jong u Jephunneh u nong Kenis, u ong ha u, “Phi tip kaei kaba U Trai u ong ha Kadesh Barnea shaphang jong phi bad nga ha u Moses, u briew jong U Blei.

⁷ Nga la don sawphew snem ka rta mynba u Moses u shakri U Trai u la phah ïa nga na Kadesh Barnea ban syntiat ïa kane ka ri. Nga la wanrah ha u ïa ka khubor bashisha.

⁸ Ki rangbah kiba ïaleit ryngkat bad nga, pynban, ki pynsheptieng ïa ki briew jong ngi. Hynrei nga, nga la kohnguh hok ïa U Trai U Blei jong nga.

⁹ Namar ba nga la leh kumta, u Moses u la kular ïa nga ba ki khun ki kti jong nga bad ma nga, ngin ïohpdiang da kaba thikna kum ka jingïohkynti jong ngi ïa kata ka ri kaba nga la ïuhkjat.

¹⁰ Hynrei mynta, ha khmih, ka la long sawphew san snem naduh ba U Trai u la ong ïa kata ha u Moses. Kata ka la long mynba ki Israel ki dang ïaid lyngba ïa ka ri shyiap, bad U Trai, kumba u la kular, u la ri pynim ïa nga.

¹¹ Khmih sha nga! nga la dap phraphew san snem ka rta bad nga dang shait dang khlaiñ mynta kumba nga la long mynba u Moses u la phah ïa nga. Nga dang shait dang khlaiñ bha ban leit ïaleh thma ne na ka bynta kano kano.

¹² Kumta mynta, ai ha nga ïa ka ri lum ba U Trai u la kular ïa nga ha kata ka sngi mynba ki briew jong nga lem bad nga, ngi la wanrah ïa kata ka khubor. Ngi la ïathuh ïa phi ha kato ka por ba ka jait ki ramhah kiba la khot ki Anakim ki la don hangta ha ki nongbah ba la ker sawdong da ki kut bakhraw. Lehse U Trai hi un don ryngkat bad nga, bad ngan beh krad ïa ki, kumba U Trai u la ong.”

¹³ U Joshua u la kyrkhu ïa u Kaleb u khun jong u Jephunneh bad u la ai ha u ïa ka nongbah Hebron kum ka jingïohkynti jong u.

¹⁴ Ka Hebron ka dang dei ka jong ki khun ki ksiew jong u Kaleb, u khun jong u Jephunneh u nong Kenis, namar ba u la kohnguh hok ïa U Trai, U Blei ki Israel.

¹⁵ Ha shuwa kane, ïa ka Hebron la khot ka nongbah jong U Arba. (U Arba u la long uba khraw tam napdeng ki Anakim). Mynta ka don ka jingsuk ha ka ri.