JOSHUA 13 - Khasi CL Bible (BSI)

Ki ri kiba dang dei ban ïohkynti

¹ U Joshua mynta u la tymmen bha. U Trai u ong ha u, “Me la tymmen bha, hynrei dang bun ka jaka kaba dei ban ïohkynti.

² Baroh ka ri jong ka Philistia bad ka Geshur,

³ kumjuh ruh ka ri jong ka Abbim ha ka phang bashathie (ka jaka naduh ka wahduid Shihor ha ki khappud jong ka Ijipt haduh khappud Ekron ha ka phang bashatei, ïa kaba la ñiew ba ka dei ka jong ki Kanaan; ki syiem Philistia ki la shong ha Gasa, Ashdod, Ashkelon, Gath, bad Ekron).

⁴ Ka dang don ka ri ki Kanaan baroh kawei, bad ka Mearah (kaba dei ka jong ki nong Sidon), haduh ka Aphek, kaba ha khappud ki Amor;

⁵ ka ri jong ki Gebal, ka Lebanon baroh shaphang mihngi, naduh Baalgad, kaba don shaphang shathie jong u Lum Hermon, haduh ka Khim Hamath.

⁶ Kane ka kynthup ïa ka ri baroh jong ki nong Sidon, kiba shong ha ka ri lum hapdeng ki lum Lebanon bad Misrephoth Maim. Ngan beh noh ïa kine ki briew katba ki Israel ki nang tur sha khmat. Me dei ban pynbynta ïa kane ka ri hapdeng ki Israel, kumba nga la hukum ïa me ban leh.

⁷ Mynta te, pynbynta ïa kane ka ri hapdeng kiwei pat ki khyndai jait bad ha ka shiteng na ka jait Manasseh, na ka bynta jong ki ba kin ïohkynti kum la ka jong.”

Ka jingpynbynta ïa ka ri ha ka phang mihngi jong ka Jordan

⁸ Ka jait Reuben bad ka jait Gad, bad kawei pat ka shiteng na ka jait Manasseh ki la ïohpdiang lypa ïa ka ri kaba u Moses, u shakri U Trai, u la ai ha ki; ka don ha ka liang mihngi jong ka wah Jordan.

⁹ Ka ri jong ki ïar shaduh Aroer (ha ka tduh jong ka Them Arnon) bad ka nongbah kaba hapdeng jong kata ka them bad kaba kynthup ïa ka jaka padun baroh na Medeba shaduh Dibon.

¹⁰ Ka kner shaduh ka khappud jong ka Ammon bad kynthup ïa ki nongbah baroh kiba la synshar da u Sihon u syiem ka Amor, uba la synshar ha Heshbon.

¹¹ Ka kynthup ïa ka Gilead, ki thain jong ka Geshur bad ka Maakah, u Lum Hermon baroh, bad ka Bashan baroh haduh Salekah.

¹² Ka kynthup ïa ka hima jong u Og, uba khatduh jong ki Rephaim, uba la synshar ha Ashtaroth bad Edrei. U Moses u la jop ïa kine ki briew bad u la beh noh ïa ki.

¹³ Pynban, ki Israel kim shym beh noh ïa ki briew jong ka Geshur bad Maakah; ki dang shong ha Israel.

¹⁴ U Moses um shym la ai kano kano ka jaka ha ka jait Lebi. Kumba U Trai u la bthah ha u Moses, ki dei ban pdiang kum ka jingïohkynti jong ki, ïa ka bhah jong ki jingainguh ba la thang ha ka duwan sha U Trai U Blei ki Israel.

Ka jaka ba la ai ha ka Jait Reuben

¹⁵ U Moses u la ai shi bynta jong ka ri ha ki longïing jong ka jait Reuben kum ka jingïohkynti jong ki.

¹⁶ Ka jaka jong ki ka ïar shaduh Aroer (ha ka tduh jong ka Them Arnon) bad ka nongbah kaba hapdeng jong kata ka them bad kynthup ïa ka jaka padun baroh sawdong ka Medeba.

¹⁷ Ka kynthup ïa ka Heshbon bad ki nongbah baroh ha ka jaka padun: ka Dibon, ka Bamoth Baal, ka Beth Baalmeon,

¹⁸ ka Jahas, ka Kedemoth, ka Mephaath,

¹⁹ ka Kiriathaim, ka Sibmah, ka Serethshahar halor u lum uba don ha ka them,

²⁰ ka Bethpeor, ki sharing jong u Lum Pisgah, bad ka Beth Jeshimoth.

²¹ Ka kynthup ïa ki nongbah baroh jong ka jaka padun bad ka hima baroh kawei jong u Sihon u syiem Amor, uba la synshar ha Heshbon. U Moses u la jop ïa u, bad ruh ïa ki nongsynshar jong ki Midian: u Ebi, u Rekem, u Sur, u Hur, bad u Reba. Kine baroh ki la synshar na ka bynta u Sihon.

²² Napdeng kito kiba ki paid Israel ki la pynïap, u dei u Balaam, u nongkren byrtong, u khun jong u Beor.

²³ Ka Jordan ka dei ka pud bashaphang sepngi jong ka jait Reuben. Kine ki long ki nongbah bad ki nongrit kiba la ai ha ki longïing jong ka jait Reuben kum ka jingïohkynti jong ki.

Ka jaka ba la ai ha ka jait Gad

²⁴ U Moses u la ai ruh shi bynta jong ka ri ha ki longïing jong ka jait Gad kum ka jingïohkynti jong ki.

²⁵ Ka jaka jong ki ka kynthup ïa ka Jaser bad ki nongbah baroh jong ka Gilead, shiteng na ka ri ki Ammon haduh Aroer, kaba ha ka phang mihngi jong ka Rabbah;

²⁶ ka jaka jong ki ka ïar naduh Heshbon haduh Ramath Mispeh bad Betonim, naduh Mahanaim haduh ka khappud jong ka Lodebar.

²⁷ Ha ka Them Jordan ka kynthup ïa ka Beth Haram, ka Bethnimrah, ka Sukkoth, bad ka Saphon, kaba sah na ka hima u Sihon u syiem Heshbon. Ka pud bashaphang sepngi jong ki ka dei ka wah Jordan haduh ka Duriaw Galilaïa ha ka phang bashatei.

²⁸ Kine ki long ki nongbah bad ki nongrit ïa kiba la ai ha ki longïing jong ka jait Gad kum ka jingïohkynti jong ki.

Ka jaka ba la ai ha ka jait Manasseh kaba sha mihngi

²⁹ U Moses u la ai shi bynta jong ka ri ha ki longïing jong kaba shiteng na ka jait Manasseh kum ka jingïohkynti jong ki.

³⁰ Ka jaka jong ki ka ïar naduh Mahanaim bad kynthup ïa ka Bashan baroh — baroh ka hima u Og, u syiem Bashan, bad ruh baroh hynriewphew tylli ki shnong jong u Jair ha Bashan.

³¹ Ka kynthup shiteng jong ka Gilead, lem ruh bad ka Ashtaroth bad Edrei, ki nongbah jong ka hima u Og ha Bashan. Ïa kane baroh la ai ha kaba shiteng jong ki longïing kiba hiarpateng na u Makhir u khun jong u Manasseh.

³² Kane ka long kumno ba u Moses u la pynbynta ïa ka ri shaphang mihngi jong ka Jerikho bad ka Jordan mynba u don ha ki pyntha ka Moab.

³³ Hynrei u Moses um shym la ai kano kano ka jaka ha ka jait Lebi. U ong ïa ki ba ka jingïohkynti jong ki ka dei ka bhah jong ki jingainguh sha U Trai U Blei ki Israel.