JOSHUA 12 - Khasi CL Bible (BSI)

Ki syiem kiba shahjop ha u Moses

¹ Ki paid Israel ki la lah jop bad kam kynti ïa ka ri kaba sha mihngi jong ka Jordan, naduh ka Them Arnon haduh ka Them Jordan bad shaduh u Lum Hermon ha ka phang bashatei. Ki la jop ïa ki ar ngut ki syiem.

² Uwei u dei u Sihon, u syiem Amor uba synshar ha Heshbon. Ka hima jong u ka kynthup shiteng jong ka Gilead: naduh Aroer (ha ka tduh jong ka Them Arnon) bad na ka nongbah kaba hapdeng jong kata ka them, shaduh ka wah Jabbok, ka khappud jong ki Ammon;

³ ka kynthup ïa ka Them Jordan naduh Duriaw Galilaïa arsut shaduh Beth Jeshimoth (shaphang mihngi jong ka Duriaw Baïap) bad sha trai jong u Lum Pisgah.

⁴ Ki la jop ruh ïa u Og u syiem ka Bashan, uba long uwei na kiba khatduh jong ki Rephaim; u synshar ha Ashtaroth bad ha Edrei.

⁵ Ka hima jong u ka kynthup ïa u Lum Hermon, ka Salekah, bad ka Bashan baroh haduh ki pud jong ka Geshur bad ka Maakah, bad shiteng jong ka Gilead haduh ka ri jong u Sihon u syiem ka Heshbon.

⁶ Kine ki ar ngut ki syiem ki la shahjop ha u Moses bad ki paid Israel. U Moses, u shakri U Trai, u la ai ïa ka ri jong ki ha ka jait Reuben bad ka jait Gad, bad ha shiteng na ka jait Manasseh, ba kan long ka jingïohkynti jong ki.

Ki syiem kiba la shahjop ha u Joshua

⁷ U Joshua bad ki paid Israel ki la jop ïa ki syiem baroh kiba ha ka ri kaba sha sepngi jong ka Jordan, naduh Baalgad ha Them Lebanon haduh u Lum Halak ha ka phang shathie hajan Edom. U Joshua u pynïabynta ïa kane ka ri hapdeng ki jait Israel bad u ai ïa ka ha ki kum ka jingïohkynti baneh junom.

⁸ Kane ka bynta ka kynthup ïa ka ri lum, ki kjat lum ha ka phang sepngi, ka Them Jordan bad ki kjat lum jong ka, ka sharing lum ha ka phang mihngi bad ka ri ryngkhiang ha ka phang bashathie. Kane ka ri ka la ju long ka ïing jong ki Hit, ki Amor, ki Kanaan, ki Peris, ki Hib, bad ki Jebus.

⁹ Ki paid Israel ki la jop ïa ki syiem jong kine ki nongbah: ka Jerikho, ka Ai (hajan Bethel),

¹⁰ ka Jerusalem, ka Hebron,

¹¹ ka Jarmuth, ka Lakhish,

¹² ka Eglon, ka Geser,

¹³ ka Debir, ka Geder,

¹⁴ ka Hormah, ka Arad,

¹⁵ ka Libnah, ka Adullam,

¹⁶ ka Makkedah, ka Bethel,

¹⁷ ka Tappuah, ka Hepher,

¹⁸ ka Aphek, ka Lasharon,

¹⁹ ka Madon, ka Hasor,

²⁰ ka Shimron Meron, ka Akhshaph,

²¹ ka Taanakh, ka Megiddo,

²² ka Kedesh, ka Jokneam (ha Karmel),

²³ ka Dor (harud duriaw), Goiim (ha Galilaïa),

²⁴ bad Tirsah — baroh ki long laiphew wei ngut ki syiem.