JOSHUA 11 - Khasi CL Bible (BSI)

U Joshua u jop ïa u Jabin bad ki paralok jong u

¹ Haba ka khubor shaphang ka jingjop ki Israel ka la poi ha u Jabin u syiem ka Hasor, u phah ktien sha u Jobab u syiem ka Madon, sha u syiem ka Shimron bad u syiem ka Akhshaph,

² bad sha ki syiem kiba ha ka ri lum ha ka phang shatei, kiba ha Them Jordan shathie na ka Duriaw Galilaïa, kiba ha trai ki lum, bad kiba harud duriaw hajan ka Dor.

³ U la phah ktien ruh sha ki Kanaan kiba don ha baroh arliang jong ka Jordan, sha ki Amor, sha ki Hit, sha ki Peris, bad sha ki Jebus kiba ha ka ri lum, kumjuh ruh sha ki Hib kiba shong ha trai u Lum Hermon ha ka ri Mispah.

⁴ Kita ki la ïawan lem bad ki shipai jong ki baroh — ka kynhun shipai kaba bun briew kat u shyiap harud duriaw. Ki don ruh shibun ki kulai bad ki kali ïapom.

⁵ Kine ki syiem baroh ki la ïasoh lang kawei bad ki la wan lang ban sher dara harud ka Wahduid Meron ban ïaleh pyrshah ïa ki Israel.

⁶ U Trai u ong ha u Joshua, “Wat sheptieng ïa ki. Ha kane ka por lashai ka sngi ngan pynïap ïa ki baroh na ka bynta ki Israel. Phi dei ban pyndkoh ïa ki kulai jong ki bad thang ïa ki kali ïapom jong ki.”

⁷ Kumta u Joshua bad ki rangbah jong u baroh ki la tur ïaleh ïa ki ha ka por ba kim poi pyrkhat ha ka Wahduid Meron.

⁸ U Trai u ai ha ki Israel ka jingjop halor jong ki; ki Israel ki tur ïaleh bad ki bad ki beh kthong ïa ki shaphang shatei haduh Misrephoth Maim bad Sidon, bad shaphang mihngi haduh ka them Mispah. Ka jingïaleh ka neh haduh ba ym don shuh uwei ruh u nongshun uba lait im.

⁹ U Joshua u leh ïa ki kumba U Trai u la hukum: u pyndkoh ïa ki kulai jong ki bad u thang ïa ki kali ïapom jong ki.

¹⁰ Nangta u Joshua u wan phai, u la kurup ïa ka Hasor bad pynïap ïa u syiem jong ka. (Ha kata ka por, ka Hasor ka long kaba khlaiñ tam na kito ki hima baroh.)

¹¹ Ki la pynïap ïa uwei pa uwei uba don hangta, ym don shuh uwei ruh uba dang lait im, bad la thang ruh ïa ka nongbah.

¹² U Joshua u la kurup ïa kine ki nongbah baroh bad ïa ki syiem jong ki, da kaba pynïap ïa uwei pa uwei, kumba u Moses, u shakri jong U Trai, u la hukum.

¹³ Pynban, ki Israel kim shym thang ïa kano kano na ki nongbah kiba la tei halor ki lumrit, lait tang ka Hasor, kaba u Joshua u la thang.

¹⁴ Ki paid Israel ki la shim ïa ki markordor baroh bad ïa ki jingri jingdup na kine ki nongbah bad ki la buh ïa ki na ka bynta ïa lade. Hynrei ki la pynïap ïa uwei pa uwei u briew; ym don uwei ruh uba lait im.

¹⁵ U Trai u la ai ïa ki hukum jong u ha u Moses u shakri jong u, u Moses u la ai ïa kita ha u Joshua, bad u Joshua u la kohnguh ïa ki. U la leh ïa baroh kaba U Trai u la hukum ïa u Moses.

Ka jaka kaba u Joshua u la shim

¹⁶ U Joshua u la kurup ïa ka ri baroh — ka ri lum bad ki kjat lum, ïa kaba shatei bad shathie, ka jaka jong ka Goshen baroh, bad ki ri ryngkhiang ha ka phang shathie jong ka, kumjuh ruh ïa ka Them Jordan.

^17-18 Ka jaka ka ïar naduh u Lum Halak ha ka phang bashathie hajan ka Edom, shaduh Baalgad ha ka phang bashatei ha ka them jong ka Lebanon shaphang shathie jong u Lum Hermon. U Joshua u la ïaleh thma slem bad ki syiem jong kane ka thain, hynrei u la kurup ïa ki baroh bad u pynïap ïa ki.

¹⁹ Ka nongbah kaba la ïasuk bad ki paid Israel ka dei ka Gibeon, ha kaba katto katne ki Hib ki shong. Baroh kiwei pat ki la shahjop ha ka thma.

²⁰ U Trai u la pynlong ïa ki ban kut jingmut ban ïaleh ïa ki Israel, ba kumta kin shah pynrem sha ka jingpynjot thiaw bad ba baroh kin shah pynïap khlem ka jingisynei. Kane ka long kaba U Trai u la hukum ïa u Moses.

²¹ Ha kane ka por u Joshua u la leit bad u pynduh khoit ïa ka jait ka kynja ki ramhah ba la khot kyrteng ki Anakim kiba shong basah ha ka ri lum — ha Hebron, Debir, Anab, bad ha baroh ka ri lum jong ka Judah bad ka Israel. U Joshua u la pynjot thiaw ïa ki bad ïa ki nongbah jong ki.

²² Ym don napdeng ki Anakim kiba dang sah ha ka ri Israel; pynban, tang katto katne, la iehnoh ha Gasa, Gath bad Ashdod.

²³ U Joshua u la kurup ïa kata ka ri baroh kawei, kumba U Trai u la hukum ïa u Moses. U Joshua u la ai ïa ka ha ki Israel kum ka jong ki hi bad u la pynbynta ïa ka ha ki lyngkhot, kawei kawei na ka bynta kawei kawei ka jait. Kumta ki paidbah ki la shongthait na ka thma.