JOSHUA 10 - Khasi CL Bible (BSI)

Ka jingshahjop ki Amor

¹ U Adonisedek, u syiem ka Jerusalem, u ïohsngew ba u Joshua u la kurup bad pynjot thiaw ïa ka Ai bad u la pynïap ïa u syiem jong ka, kumba u la leh ïa ka Jerikho bad ïa u syiem jong ka. U ïohsngew ruh ba ki nong Gibeon ki la ïasuk bad ki Israel bad ba ki shong hapdeng jong ki.

² Ki briew ka Jerusalem ki sngewkyndit shikatdei eh da ka jingsheptieng ha kane, namar ka Gibeon ka long ka nongbah kaba heh kum kano kano ka nongbah kaba don la u syiem; ka kham heh ban ïa ka Ai, bad ki rangbah jong ka ki long ki riewïaleh kiba tbit.

³ Kumta u Adonisedek u phah ïa kane ka khubor harum sha u Hoham u syiem ka Hebron, u Piram u syiem ka Jarmuth, u Japhia u syiem ka Lakhish, bad sha u Debir u syiem ka Eglon:

⁴ “Ale wan bad ïarap ïa nga ban tur ïaleh ïa ka Gibeon, namar ba ki briew jong ka ki la ïasuk bad u Joshua bad ki Israel.”

⁵ Kine ki san ngut ki syiem Amor, ki syiem ka Jerusalem, ka Hebron, ka Jarmuth, ka Lakhish, bad ka Eglon, ki ïasoh lang kawei, ki kerkut ïa ka Gibeon, bad ki tur ïaleh ïa ka.

⁶ Ki rangbah ka Gibeon ki la phah ktien sha u Joshua ha ka jaka sher dara ha Gilgal, ki da ong, “Kynrad, wat iehnoh ïa ngi! Wan mar mar ban ïarap ïa ngi! Pyllait im ïa ngi! Baroh ki syiem Amor ha ri lum ki la ïasoh lang kawei bad ki la wan tur ïaleh ïa ngi.”

⁷ Kumta u Joshua bad ka kynhun shipai jong u baroh, kynthup ïa ka kynhun shipai kaba kynsai tam, ki la mihnoh na Gilgal.

⁸ U Trai u ong ha u Joshua, “Wat sheptieng ïa ki. Nga la ai lypa ha me ïa ka jingjop. Yn ym don uwei ruh na ki uba lah ban ïeng pyrshah ïa me.”

⁹ Baroh shi miet, u Joshua bad ka kynhun shipai jong u ki la ïaid na Gilgal sha Gibeon bad ki la tur kyndit ban ïaleh ïa ki Amor.

¹⁰ U Trai u la pynkulmar jingmut ïa ki Amor ha ka jingïohi ïa ka kynhun shipai Israel. Ki Israel ki pynïap ïa ki ha Gibeon bad ki la beh ïa ki arsut ïa ka khim lum ha Beth Horon, da kaba ïai ïaleh shaduh shaphang shathie ha Asekah bad Makkedah.

¹¹ Katba ki Amor ki dang phet arsut na ka khim lum na ki shipai Israel, U Trai u pynhap halor jong ki ïa u phria uba heh baroh shi lynter lynti haduh Asekah. Kham bun ki la ïap na u phria ban na kaba ki shah pynïap ha ki Israel.

¹² Ha ka sngi kaba U Trai u ai jingjop ïa ki Israel halor ki Amor, u Joshua u kren ha U Trai. Ha khmat ki Israel u ong, “Ko Sngi, to ïeng thik halor ka Gibeon, Ko Bnai, to sangeh ha ka Them Aijalon.”

¹³ Ka sngi ka la ïeng thik bad u bnai um shym khih tad haduh ba ka jaitbynriew ka la jop thiaw ïa ki nongshun jong ka. Ïa kane la thoh ha ka Kitab u Jashar. Ka sngi ka la sangeh hapdeng ka sahit bneng bad kam shym la sep ha kata ka sngi.

¹⁴ Ym pat ju don mynno mynno, bad yn ym don lano lano, ba la don kum kata ka sngi, mynba U Trai u la shahshkor ïa u bynriew. U Trai u ïaleh ha ka liang ki Israel!

¹⁵ Hadien kane, u Joshua bad ka kynhun shipai jong u ki leit phai pat sha ka jaka shong dara ha Gilgal.

U Joshua u kem ïa ki san ngut ki syiem Amor

¹⁶ Ki san ngut ki syiem Amor, pynban, ki la phet ïap bad rieh hapoh ka krem ha Makkedah.

¹⁷ Don kiba lap ïa ki, bad la ïathuh ha u Joshua ha-ei ba ki ïarieh.

¹⁸ U ong, “Pyntyllun katto katne ki maw kiba heh ha khmat kata ka krem. Buh katto katne ki nongap phira hangta,

¹⁹ hynrei ma phi pat wat sah hangta. Ïai beh ïa ki nongshun jong phi, bad tur ïaleh ïa ki na shadien; wat ailad ba kin ïohrung sha la ki jong ki nongbah! U Trai U Blei jong phi u la ai ha phi ka jingjop halor jong ki.”

²⁰ U Joshua bad ki rangbah jong ki Israel ki la pynïap ïa ki, wat la katto katne ki ïohlad ban shem jaka lait im hapoh ki kynroh shnong bad ba ki khlem shah pynïap.

²¹ Nangta baroh ki rangbah jong u Joshua ki la wan phai suk sha u ha ka jaka sher dara ha Makkedah. Ym don uwei ruh u briew ha kata ka ri uba nud ban kren pyrshah ïa ki Israel.

²² Nangta u Joshua u ong, “Plie ïa ka jaka rung sha ka krem bad wallam ïa kito ki san ngut ki syiem sha nga.”

²³ Kumta la plie ïa ka krem bad la pynmih shabar ïa ki syiem ka Jerusalem, ka Hebron, ka Jarmuth, ka Lakhish, bad ka Eglon bad la leit lam ïa ki sha u Joshua.

²⁴ Nangta u Joshua u khot ïa ki rangbah ka Israel baroh bad u hukum ïa ki rangbah shipai kiba la leit ryngkat bad u ban wan bad buh ïa la ki kjat ha ki ryndang jong ki syiem. Ki la leh kumta.

²⁵ Nangta u Joshua u ong ha ki rangbah shipai, “Wat sheptieng lane khaw-eit. Long uba kut jingmut triang uba skhem namar kane ka dei kaei kaba U Trai un leh ïa ki nongshun jong phi baroh.”

²⁶ Nangta u Joshua u pynïap ïa ki syiem bad u sdien ïa ki ha ki san tylli ki dieng, ha kaba ki met jong ki, ki la sah haduh janmiet.

²⁷ Ha ka por sep sngi u Joshua u ai ka hukum, bad la pynhiar noh ïa kita ki metïap bad bret ha kajuh ka krem ha kaba ki la ïarieh mynshuwa. La buh ïa ki maw kiba heh ha ka jaka rung sha ka krem, bad ki dang don hangta.

U Joshua u kurup shuh shuh bun ka jaka jong ki Amor

²⁸ U Joshua u la tur ïaleh bad kurup ïa ka Makkedah bad ïa u syiem jong ka ha kata ka sngi. U pynïap ïa uwei pa uwei u briew ha ka nongbah; ym don uwei ruh uba lait im. U leh ïa u syiem ka Makkedah kumba u la leh ïa u syiem ka Jerikho.

²⁹ Hadien kane, u Joshua bad ka kynhun shipai jong u ki leit na Makkedah sha Libnah bad ki tur ïaleh ïa ka.

³⁰ U Trai u la ai ruh ha ki Israel ka jingjop ïa kane ka nongbah bad ïa u syiem jong ka. Kim shym la iehnoh wat uwei ruh, hynrei ki la pynïap ïa uwei pa uwei u briew uba don ha ka. Ki la leh ïa u syiem jong ka kumba ki la leh ïa u syiem ka Jerikho.

³¹ Hadien kane, u Joshua bad ka kynhun shipai jong u ki la leit na Libnah sha Lakhish, ki kerkut ïa ka, bad ki tur ïaleh ïa ka.

³² U Trai u ai ha ki Israel ka jingjop halor ka Lakhish ha ka sngi kaba ar jong ka thma. Kumba ki la leh ha Libnah, kim shym iehnoh wat uwei ruh, hynrei ki la pynïap ïa uwei pa uwei u briew ha ka nongbah.

³³ U Horam u syiem ka Geser u la wan ban ïarap ïa ka Lakhish, hynrei u Joshua u jop ïa u bad ïa ka kynhun shipai jong u, bad um shym la pyllait im wat ïa uwei ruh na ki.

³⁴ Nangta pat, u Joshua bad ka kynhun shipai jong u ki la leit na Lakhish sha Eglon, ki kerkut ïa ka, bad ki tur ïaleh ïa ka.

³⁵ Ki la kurup ïa ka ha kajuh ka sngi bad ki la pynïap ïa uwei pa uwei hangta, kumba ki la leh ha Lakhish.

³⁶ Hadien kane, u Joshua bad ka kynhun shipai jong u ki la leit kiew na Eglon sha ki lum ka Hebron, ki la tur ïaleh ïa ka bad ki la kurup ïa ka.

³⁷ Ki la pynïap ïa u syiem jong ka bad ïa uwei pa uwei baroh ha ka nongbah bad ha ki shnong kiba markhap. U Joshua u pynjot thiaw ïa kata ka nongbah, kumba u la leh ïa ka Eglon. Ym shym don uwei ruh hangta uba lait im.

³⁸ Nangta u Joshua bad ka kynhun shipai jong u ki la phai noh pat sha Debir bad ki tur ïaleh ïa ka.

³⁹ U la kurup ïa ka bad ïa u syiem jong ka, bad ïa baroh ki shnong kiba markhap. Ki pynïap lut ïa uwei pa uwei hangta. U Joshua u la leh ïa ka Debir bad ïa u syiem jong ka kumba u la leh ïa ka Hebron bad ïa ka Libnah bad u syiem jong ka.

⁴⁰ Kumta u Joshua u la jop thiaw ïa kata ka ri baroh kawei. U la jop ïa ki syiem jong ka ri lum, kiba ha ki sharing lum ha ka phang mihngi, bad kiba ha trai ki lum ha ka phang sepngi, bad ïa kito ki jong ka ri ryngkhiang ha ka phang bashathie. Um shym la pynsah ïano ïano, u pynïap lut khoit ïa ki baroh. Kane ka long kaba U Trai U Blei ki Israel u la hukum.

⁴¹ Ka jingïaleh u Joshua ka ïalam ïa u naduh Kadesh Barnea ha ka phang shathie haduh Gasa hajan ka rud duriaw, kaba kynthup ïa baroh ki jaka ka ri Goshen haduh Gibeon ha ka phang bashatei.

⁴² U Joshua u la jop ïa kine ki syiem baroh bad ïa ka ri jong ki tang shisien ïaleh namar U Trai, U Blei ki Israel, u ïaleh na ka bynta ki Israel.

⁴³ Hadien kane, u Joshua lem bad ka kynhun shipai, u leit phai pat sha ka jaka sher dara ha Gilgal.