JOSHUA 1 - Khasi CL Bible (BSI)

U Blei u hukum ïa u Joshua ban leit hiarthma ïa ka ri Kanaan

¹ Hadien ka jingïap u Moses, u shakri jong U Trai; U Trai u la kren ha u nongïarap lem jong u Moses, u Joshua u khun jong u Nun.

² U ong, “U shakri jong nga, u Moses u la ïap. Khreh mynta, ma me bad ki paid Israel baroh, bad jam ïa ka wah Jordan sha ka ri kaba nga ai ha ki.

³ Kumba nga la ïathuh ha u Moses, nga la ai ha me bad ha ki briew jong nga baroh ïa ka ri baroh kawei kaba phin leit ïuhkjat.

⁴ Ki pud jong phi kin kot naduh ka ri shyiap ha ka phang shathie haduh ki Lumbah Lebanon ha ka phang shatei; naduh ka wah Ïuphratis bakhraw ha ka phang mihngi, lyngba ka ri ki Hit, haduh ka Duriaw Mediterranian ha ka phang sepngi.

⁵ Joshua, yn ym don mano mano uba lah ban jop ïa me katba me dang im. Ngan don ryngkat lem bad me kumba nga la don bad u Moses. Ngan ïailong lem bad me borabor; ngan ym iehnoh ïa me.

⁶ Kut jingmut triang bad long skhem, namar men long u nongïalam jong kine ki briew katba ki shim kynti ïa kane ka ri ïa kaba nga la kular ha ki kpa tymmen jong ki.

⁷ Me dei ban da kut jingmut triang, ban long skhem bad ban pynthikna ba men kohnguh ïa ka Hukum baroh kaba u shakri jong nga, u Moses u la ai ha me. Wat leh klet ïa kano kano ka bynta jong ka, bad men sa jop kat shaba me leit.

⁸ Pynthikna ba ïa kane ka kitab ka Hukum dei ban pule borabor ha ka jingmane jong me. Puson ïa ka mynsngi bad mynmiet, bad pynthikna ba men kohnguh ïa kaei kaei baroh ba la thoh ha ka. Te men sa manbha bad long uba jop.

⁹ Kynmaw ba nga la hukum ïa me ban long uba kut jingmut triang bad uba skhem! Wat sheptieng lane noh mynsiem, namar nga, U Trai U Blei jong me, nga long ryngkat lem bad me kat shaba me leit.”

U Joshua u ai hukum ïa u paidbah

¹⁰ Nangta u Joshua u hukum ïa ki nongïalam

¹¹ ban rung sha ka jaka shong dara bad ban ong ha u paidbah, “Pynkhreh jingbam katto katne, namar ha ki lai sngi phin leit jam ïa ka wah Jordan ban ïohkynti ïa ka ri ba U Trai U Blei jong phi u ai ha phi.”

¹² U Joshua u ong ha ki jait Reuben bad jait Gad, bad ha ki shiteng na ka jait Manasseh,

¹³ “Kynmaw kumno u Moses, u shakri jong U Trai, u la ïathuh ha phi ba U Trai U Blei jong phi un ai ha phi ïa kane ka ri ha ka phang mihngi jong ka Jordan kum ka ïing jong phi.

¹⁴ Ki tnga jong phi, ki khun jong phi, bad ki jingri jong phi kin sah hangne, hynrei ki shipai jong phi, kiba la kieng atiar na ka bynta ka thma, kin jam shuwa ïa kiwei pat ki Israel khnang ban ïarap ïa ki

¹⁵ haduh ba kin da ïohkynti ïa ka ri ha ka phang sepngi jong ka Jordan ïa kaba U Trai U Blei jong phi u la ai ha ki. Hadien ba u la pynïoh ïa ka jingshongshngain ïa ki jait Israel baroh, te phi lah ban wan phai pat bad shongsah hangne ha ka ri jong phi ha ka phang mihngi jong ka Jordan ïa kaba u Moses, u shakri U Trai, u la ai ha phi.”

¹⁶ Ki la jubab ïa u Joshua, “Ngin leh ïa kaei kaei baroh kaba me la ong ïa ngi bad ngin leit kat shaba me phah ïa ngi.

¹⁷ Ngin kohnguh ïa me kumba ngi la ju kohnguh ïa u Moses, bad ai ba U Trai U Blei jong me un long ryngkat bad me kumba u la long bad u Moses!

¹⁸ Uno uno uba artatien ïa ka iktiar jong me lane u bymkohnguh ïa kano kano na ki hukum jong me un shah pynïap. To long uba kut jingmut triang bad uba skhem.”