JONAH 4 - Khasi CL Bible (BSI)

Ka jingbitar u Jonah bad ka jingisynei U Blei

¹ U Jonah u la sngewsih haduh katta katta shaphang kane bad u la bitar.

² Kumta u la duwai, “A Trai, hato ngam la ong shuwa ba ngan mih na ïing ba kane ka dei kaei kaba men leh? Dei na kata ka daw ba nga la pyrshang tyngeh ban phet noh sha Spain! Nga la tip ba me long U Blei ka jingieit bad ka jingisynei, uba ïaishah slem, uba sbun borabor, bad uba kloi borabor ban kylla ïa la ka jingmut ban ym pynshitom.

³ Mynta, A Trai, ai ba ngan ïap noh. Ka kham bha ïa nga ban ïap ban ïa ka ban im.”

⁴ U Trai u la jubab, “Me don hok aïu ban bitar?”

⁵ U Jonah u la mih bad leit shaphang mihngi jong ka nongbah bad u la shong hangta. U la shna ka jakarieh tngen ïa lade bad shong ha ka syrngiew jong ka, da kaba ap ban khmih kaei ka ban jia ïa ka Ninebeh.

⁶ Te U Trai U Blei u la pynlong ïa u jingthung ban san kham jrong ïa u Jonah khnang ban ai ïa u katto katne ka jingkah syrngiew, khnang ba un kham tngen. U Jonah u la sngewkmen shibun ïa u jingthung.

⁷ Hynrei dang step phyrngab ha ka sngi kaba bud, ha ka hukum U Blei, u ksaiñ u la bam ïa u jingthung, bad u la ïap noh.

⁸ Hadien ba ka sngi ka la mih, U Blei u la phah ïa ka lyer mihngi kaba shit, bad u Jonah u la jan ïapler na ka jingshit jong ka sngi kaba shoh halor ka khlieh jong u. Kumta u la kwah ban ïap noh. “Ka kham bha ïa nga ban ïap noh ban ïa kaba im,” u la ong.

⁹ Hynrei U Blei u la ong ha u, “Me don hok aïu ban bitar ïa u jingthung?” U Jonah u la jubab, “Nga don ka hok baroh ban bitar — ban bitar eh ban ïap!”

¹⁰ U Trai u la ong ha u, “Une u jingthung u la san ha ka shi miet bad jah noh ha kaba bud; mem shym la leh ei ei na ka bynta jong u, bad mem shym la pynlong ïa u ban san — pynban me la sngewsih na ka bynta jong u!

¹¹ Katno tam, te, ba ngan don ka jingsngewsynei ïa ka Ninebeh, kata ka nongbah bakhraw. La kumno kumno, ka don palat ïa ka shi lakh arphew hajar ngut ki khunlung balui lui ha ka, kumjuh ruh shibun ki mrad!”