JONAH 3 - Khasi CL Bible (BSI)

U Jonah u kohnguh ïa U Trai

¹ Sa shisien pat U Trai u la kren ha u Jonah.

² U ong, “Khie leit sha Ninebeh, kata ka nongbah bakhraw, bad to pynbna ha ki briew ïa ka khubor kaba nga la ai ha me”

³ Kumta u Jonah u la kohnguh ïa U Trai bad u la leit sha Ninebeh, ka nongbah kaba heh haduh katta katta ba ka la shim por lai sngi ban ïaid lyngba jong ka.

⁴ U Jonah u sdang ban ïaid lyngba ïa ka nongbah, bad hadien ba u la ïaid baroh shi sngi, u la pynbna, “Hapoh sawphew sngi ïa ka Ninebeh yn sa pynjot!”

⁵ Ki briew jong ka Ninebeh ki la ngeit ïa ka khubor U Blei. Kumta ki la ïa-rai ba baroh ki dei ban shahjingit, bad ba baroh ki briew, naduh uba rit tam haduh uba khraw tam, ban phong jaiñ khain ban pynpaw ba ki la kylla-kaba-mut.

⁶ Haba u syiem ka Ninebeh u la ïohsngew shaphang kata, u ïeng joit na la ka khet, u law noh ïa la ka jaiñkup, u phong da ka jaiñ khain, bad u shong ha u dpei.

⁷ U la phah ka jingpynbna sha ki briew ka Ninebeh: “Kane ka dei ka hukum na u syiem bad ki rangbah synshar jong u: Yn ym don uno uno u ban bam ei ei; ïa baroh ki briew, ki masi bad ki langbrot la khang ban bam lane ban dih.

⁸ Baroh ki briew bad ki mrad ki dei ban phong ki jaiñ khain. Uwei pa uwei u dei ban duwai jur ha U Blei bad u dei ban iehnoh ïa ka jingleh bymman bad ki kam sniew jong u.

⁹ Lehse U Blei un kylla ka jingmut jong u; lehse un sangeh noh na kaba bitar, bad ngin ym ïap!”

¹⁰ U Blei u la ïohi ïa kaei kaba ki la leh; u la ïohi ba ki la iehnoh ïa ka jingleh bymman jong ki. Kumta u la kylla jingmut bad um shym la pynshitom ïa ki kumba u la ong ban leh.