JONAH 2 - Khasi CL Bible (BSI)

Ka jingduwai u Jonah

¹ Na ka jingjylliew hapoh u dohkha u Jonah u la duwai sha U Trai U Blei jong u:

² “Ha ka jingjynjar jong nga, A Trai, nga la khot kyrpad ïa me, bad me la jubab ïa nga. Na ka jingjylliew jong ka pyrthei kiba ïap nga la khot kyrpad na ka bynta ka jingïarap, bad me la ïohsngew ïa nga.

³ Me la bret ïa nga shapoh ki jingjylliew, sha trai duh jong ka duriaw, ha kaba ki um ki don baroh sawdong jong nga, bad baroh ki jingat phyllung bakhlaiñ ki tyllun halor jong nga.

⁴ Nga la pyrkhat ba ïa nga la beh noh na ka jingdon ryngkat jong me bad ba ngan ym ïohi shuh lano lano ruh ïa ka Templ bakhuid jong me.

⁵ Ka um ka la tap bad ka set mynsiem ïa nga; ka duriaw ka la tap lup ïa nga, bad ki phlang duriaw ki la sop baroh sawdong ïa ka khlieh jong nga.

⁶ Nga la ngam shaduh ki trai jong ki lumbah, sha ka ri kaba ki khyrdop ki khang junom. Hynrei ma me, A Trai U Blei jong nga, me la wanrah im pat ïa nga na ki jingjylliew.

⁷ Haba nga la sngew kumba ka jingim jong nga ka la syntuid noh na nga, te, A Trai, nga la khot kyrpad ïa me, bad ha ka Templ bakhuid jong me, me la ïohsngew ïa nga.

⁸ Kito kiba mane ïa ki bleithaw bym don jingmyntoi ki la iehnoh na kaba ïaineh ha me.

⁹ Hynrei ngan rwai ki jingïaroh ïa me; ngan ai ka jingkñia ïa me bad ngan leh ïa kaei kaba nga la kular. Ka jingpynim ka wan na U Trai!”

¹⁰ Te U Trai u la hukum ïa u dohkha ban prie noh ïa u Jonah harud duriaw, bad u la leh kumta.