JONAH 1 - Khasi CL Bible (BSI)

U Jonah um shym kohnguh ïa U Trai

¹ Ha kawei ka sngi, U Trai u la kren ha u Jonah u khun jong u Amittai.

² U ong, “Khie leit sha Ninebeh, kata ka nongbah kaba khraw, bad to kren pyrshah ïa ka; nga tip haduh katno kiba bymman ki briew jong ka ki long.”

³ U Jonah pynban, u la leit sha ka jaka kaba marpyrshah khnang ban phet noh na U Trai. U la leit sha Joppa, ha kaba u la shem ïa ka liengbah ka ban sa leit sha Spain. U la siew ïa ka bai lynti bad u la rung shapoh ryngkat bad ki nongtrei liengbah kiba leit sha Spain, ha kaba un long jngai na U Trai.

⁴ Hynrei U Trai u la phah ïa ka lyer kaba jur ha ka duriaw, bad ka 'erïong ka la long kaba khlaiñ haduh katta katta ba ka liengbah ka don ha ka jingma jong ka jingpait jingpra.

⁵ Ki maji ki la sngewshyrkhei bad ki la pyrta ban ïoh jingïarap, uwei pa uwei sha la u jong u blei. Nangta, khnang ban pynduna ïa ka jingma, ki bret noh ïa ka jingkit nalor lieng. Ha kata ka por, u Jonah u la hiar sha ka bynta bashapoh, u thiah ha trai ka lieng, u ïohthiah lyngngai.

⁶ U kapten u la shem ïa u hangta bad u ong ïa u, “Me leh aïu da kaba ïohthiah? To khie bad to duwai ha u blei jong me na ka bynta ka jingïarap. Lehse un sngewlem ïa ngi bad pyllait im ïa ngi.”

⁷ Ki maji ki la ïa-ong para ma ki, “To ngin ïakynting sbai bad wad mano ba long ka daw kaba la pynlong ïa ngi ban ngat ha kane ka jingma.” Ki la leh kumta, bad ka la hap ha ka kyrteng u Jonah.

⁸ Kumta ki la ong ïa u: “Mynta te, ïathuh ïa ngi! Mano uba long ka daw na ka bynta kane? Me leh aïu hangne? Me wan na kano ka ri? Kaei ka jinglong traishnong jong me?”

⁹ “Nga dei u Hebru,” u Jonah u la jubab. “Nga mane ïa U Trai, U Blei ka bneng, uba la thaw ïa ka khyndew bad ka duriaw.”

¹⁰ U Jonah u la ong shuh shuh ïa ki ba u la phet na U Trai. Ki maji ki la sngewshyrkhei, bad ki la ong ïa u, “Kata ka long kaei kaei kaba sngewma ban leh!”

¹¹ Ka 'erïong ka la nang jur ha kata ka por, kumta ki maji ki la kylli ïa u, “Kaei kaba ngi dei ban leh ïa me ban pynsangeh ïa ka 'erïong?”

¹² U Jonah u la jubab, “Bret noh ïa nga sha ka duriaw, bad kan sa long jai jai. Nga tip ka dei ka jingleh bymdei jong nga ba phi la ngat ha kane ka 'erïong kaba jur.”

¹³ Hynrei ki maji pat, ki la pyrshang ban ïaleh ban pynpoi ïa ka lieng sharud duriaw, da kaba king katba don ka bor jong ki. Hynrei ka 'erïong ka la nang jur, bad kim poi shuh shano shano ruh.

¹⁴ Kumta ki la kyang sha U Trai, “A Trai, ngi duwai, to wat pynshitom ïa ngi da ka jingïap ban shim ïa ka jingim jong une u briew! Ma me, ko Trai, me kitkhlieh na ka bynta kane baroh; ka long ka jingleh jong me.”

¹⁵ Nangta ki la shim ïa u Jonah bad bret ïa u sha ka duriaw, bad ka la long jai jai ha ka shikhyllipmat.

¹⁶ Kane ka la pynlong ïa ki maji ban sheptieng ïa U Trai ha kaba ki la ai ka jingkñia bad kular ban shakri ïa u.

¹⁷ Ha ka hukum U Trai, u dohkha uba heh u la nguid ïa u Jonah, bad u la don hapoh u dohkha lai sngi lai miet.