JOEL 3 - Khasi CL Bible (BSI)

U Blei un bishar ïa ki jaitbynriew

¹ U Trai u ong, “Ha kata ka por ngan pynïoh pat ïa ka jingroi kyrhai jong ka Judah bad ka Jerusalem.

² Ngan lumlang ïa baroh ki jaitbynriew bad wallam ïa ki sha ka Them jong ka Jingbishar. Hangta ngan bishar ïa ki na ka bynta baroh kaba ki la leh ïa ki briew jong nga. Ki la pynsakma ïa ki Israel sha ki ri nongwei bad ki la phiah ïa ka Israel, ka ri jong nga.

³ Ki la kynting sbai ban rai mano ki ban ïoh ïa ki koidi. Ki la die mraw ïa ki khynnah shynrang bad khynnah kynthei ban siew na ka bynta ki nuti bad ka waiñ.

⁴ “Kaei kaba phi pyrshang ban leh ïa nga, ko Tyros bad Sidon, bad baroh ki jaka jong ka Philistia? Hato phi pyrshang ban siew pat ïa nga na ka bynta kaei kaei? Lada phi leh kumta, ngan siew kylliang kloi kloi pat ïa phi!

⁵ Phi la shim noh ïa ka rupa bad ka ksiar jong nga bad rah noh ïa ki jingkynshew spah jong nga sha ki templ jong phi.

⁶ Phi la rah noh ïa ki briew ka Judah bad Jerusalem jngai na ka ri jong ki hi bad die ïa ki ha ki Grik.

⁷ Mynta ngan wallam pat ïa ki na ki jaka na kiba ki la shah die. Ngan leh ïa phi ïa kaei kaba phi la leh ïa ki.

⁸ Ngan pynlong ba ki khun shynrang bad ki khun kynthei jong phi yn die sha ki briew ka Judah; ma ki kin sa die ïa ki sha jngai sha ki Sabean. Ma nga, U Trai, nga la kren.

⁹ “Pynlong ïa kane ka jingpynbna hapdeng ki jaitbynriew: ‘To Pynkhreh na ka bynta ka thma; khot ïa ki nongïaleh thma; ïalumlang ïa ki shipai bad tur shaphrang!

¹⁰ Shoh tyrnem ïa kiba nep jong ki lyngkor jong phi ban pynlong waitlam bad ïa ki wait ngor tnat dieng ban pynlong sum. Wat kiba tlot ki dei ban ïaleh thma.

¹¹ To pynkloi bad to wan, phi baroh ki jaitbynriew ba don sawdong, bad ïalumlang ha ka them.’ ” To phah, A Trai, ïa ka kynhun shipai ban tur ïaleh ïa ki.

¹² “Ki jaitbynriew ki dei ban long kiba la kloi bad wan sha ka Them jong ka Jingbishar. Hangta ma nga, U Trai, ngan shong ban bishar ïa baroh ki jaitbynriew ba don sawdong.

¹³ Ki long kiba bymman haduh katta katta; ot ïa ki kum ïa u kew ha ka aïom ot; pynlwet ïa ki kum ïa ki sohwaiñ ha ka jaka pynmih umsoh haduh ba ka umsoh ka shlei.”

¹⁴ Da ki hajar hajar ki don ha ka Them jong ka Jingbishar. Dei hangta ba ka Sngi jong U Trai shen kan wan.

¹⁵ Ka sngi bad u bnai ki kylla dum, bad ki khlur kim tyngshaiñ shuh.

U Blei un kyrkhu ïa la ki briew

¹⁶ U Trai u kyrhuh na u lum Seïon; ka sur jong u ka byrthen na Jerusalem; ka khyndew bad ka suiñbneng ki khynñiuh. Hynrei un ïada ïa la ki briew.

¹⁷ “Te ko Israel, phan sa tip ba nga long U Trai U Blei jong pha. Nga shong ha Seïon, u lum bakyntang jong nga. Ka Jerusalem kan long ka nongbah bakyntang; ki nongwei kin ym lah ban jop shuh ïa ka lano lano ruh.

¹⁸ “Ha kata ka por ïa ki lumbah yn tap da ki bri sohwaiñ, bad ïa ki masi yn shem ha uwei pa uwei u lum; yn don kyrhai ka um na ka bynta ki wahduid baroh ha Judah. Ka wahduid kan tuid na ka Templ jong U Trai, bad kan ai um ïa ka Them Akasia.

¹⁹ “Ka Ijipt kan kylla long ka ri shyiap, bad ka Edom kan long ha ka jingjot lehnoh-ei, namar ki la tur ïaleh ïa ka ri Judah bad pynïap ïa ki briew balui lui jong ka.

^20-21 Ngan pynhiarkput na ka bynta kito kiba la shah pynïap; ngan ym map ïa kiba leh kam sniew. Hynrei ha Judah bad Jerusalem yn don ki nongshong shnong junom, bad ma nga U Trai, ngan shong ha u lum Seïon.”