JOEL 2 - Khasi CL Bible (BSI)

Ki puit kum ka jingmaham ka Sngi jong U Trai

¹ To put ïa ka turoi, to pynsawa ba don jingma ha Seïon, u lum bakyntang jong U Blei. To khynñiuh, ko ki paid Judah! Ka sngi jong U Trai shen kan sa wan.

² Kan sa long ka sngi kaba dum bad kaba pynlong jingkhuslai, ka sngi kaba ïong bad ba-dum lyoh. Ka kynhun bakhraw jong ki puit ka tur kum ka jingdum kaba pyiar halor ki lumbah. Ym ju don mynno mynno ruh kum kane, bad yn ym don shuh lano lano ruh.

³ Kum ka ding ki bam duh ïa ki jingthung. Ha khmat jong ki ka ri ka long kum ka Kper Eden, hynrei sha lyndet jong ki ka long ka ri shyiap shrah. Ym don kano kano kaba lait im na ki.

⁴ Ki i kum ki kulai; ki mareh kum ki kulai thma.

⁵ Katba ki kynthih halor ki lumbah, ki riew kum ki kali ïapom; ki sawa kum u phlangïap ha ka ding. Ki ïeng laiñ kum ka kynhun shipai bakhraw ban ïaleh thma.

⁶ Katba ki dang wan, uwei pa uwei u sngewshyrkhei; kawei pa kawei ka durkhmat ka kylla blad.

⁷ Ki tur ïaleh kum ki khla-ka-wait; ki kiew ïa ki kynroh kum ki shipai. Ki baroh ki ïatur beit sha khmat bad kim phai sha kadiang ne kamon

⁸ lane ïatyngkhuh para ma ki. Ki ïa-ïaid kynhun lyngba ïa ki jingker-ïada, bad ym don kano kano kaba lah ban pynsangeh ïa ki.

⁹ Ki rung stet sha ka nongbah; ki mareh nalor ki kynroh; ki kiew sha ki ïing bad ki rung lyngba ki jingkhangïit kum ki nongtuh.

¹⁰ Ka pyrthei ka khih katba ki nang tur; ka sahit bneng ka khynñiuh. Ka sngi bad u bnai ki kylla dum, bad ki khlur kim shai shuh.

¹¹ U Trai u kyrhuh ïa ki hukum sha ka kynhun shipai jong u. Ki shipai kiba kohnguh ïa u ki long shibun bad kiba khlaiñbor. Haduh katno ka long kaba shyrkhei ka sngi jong U Trai! Uei u ban lait im na ka?

Ka jingkhot sha ka jingkylla-kaba-mut

¹² “Hynrei wat mynta,” ong U Trai, “kylla-kaba-mut da shisha bad phai sha nga da ka jingshah jingit bad ka jingïam bad ka jingïambriew.

¹³ Ai ba ka dohnud ba la pait jong phi kan pyn-i ïa ka jingsngewsih jong phi; kaba kad ïa ki jaiñphong jong phi kam biang.” To wan phai pat sha U Trai U Blei jong phi. U long uba sbun bad uba dap da ka jingisynei; u long uba ïaishah slem bad uba bat ïa la ka kular; u long borabor uba kloi ban map bad ym ban pynshitom.

¹⁴ Lehse U Trai U Blei jong phi un kylla ka jingmut bad un kyrkhu ïa phi da ki jingthung bakyrhai. Te phin lah ban ainguh ha u da u kew bad ka waiñ.

¹⁵ To put ïa ka turoi halor u lum Seïon; to ai ki hukum na ka bynta ka jingshah jingit bad khot ïa ka jingïaseng bah!

¹⁶ To ïalumlang ïa ki paidbah; to pynkhreh ïa ki na ka bynta ka jingïalang bakyntang; to wallam ki briew ba la tymmen; to ïalumlang ïa ki khynnah bad ki khunlung ruh. Wat kito kiba dang shu dep shongkurim ki dei ban mihnoh na la ka kamra bad ban wan.

¹⁷ Ki lyngdoh, kiba shakri ïa U Trai hapdeng ka duwan bad ka jaka rung ka Templ, ki dei ban ïam bad duwai: “To isynei ïa la ki briew, A Trai. To wat ai ba kiwei ki jaitbynriew kin krenbeiñ bad ñiewbeiñ ïa ngi da kaba ong, ‘Hangno U Blei jong phi?’ ”

U Blei u la wallam pat ïa ka jingseisoh ha ka ri

¹⁸ Te U Trai u la pyn-i ïa ka jingsngewkhia na ka bynta la ka ri; u la don ka jingisynei ïa la ki briew.

¹⁹ U la jubab ïa ki: “Mynta ngan ai ïa phi u kew bad ka waiñ bad ka umphniang Olib, bad phin long kiba la sngewhun. Kiwei ki jaitbynriew kin ym ñiewbeiñ shuh ïa phi.

²⁰ Ngan weng ïa ka kynhun ki puit kaba la wan na shaphang shatei bad ngan pynphai katto katne na ki sha ka ri shyiap. Kito kiba don ha ki bynta ba ha khmat kin shah beh sha ka Duriaw Baïap, kito kiba don ha ka bynta ba hadien sha ka Duriaw Mediterranian. Ki metïap jong ki kin iwtung. Ngan pynjot ïa ki namar baroh kaba ki la leh ïa phi.

²¹ “Ko ki lyngkha, wat sheptieng, hynrei to risa bad lehkmen namar baroh kaba U Trai u la leh ïa phi.

²² Ko ki mrad, wat sheptieng. Ki jaka phlang ki long kiba jyrngam; ki dieng ki sei ïa la ki soh, bad don kyrhai ki soh Dumbur bad sohwaiñ.

²³ “To lehkmen, ko ki briew ka Seïon, to shadkmen ha kaei kaba U Trai U Blei jong phi u la leh ïa phi. U la ai ïa phi ïa u slap synrai uba biang; u la theh ïa u slap tlang na ka bynta jong phi bad ïa u slap pyrem kumba mynshuwa.

²⁴ Ki jaka pynkhuid kew kin dap da u kew; ki thliew harud ki jaka pynmih umsoh bad umphniang kin shlei da ka waiñ bad ka umphniang Olib.

²⁵ Ngan ai pat ha phi ïa kaei kaba phi la duh noh ha ki snem mynba ki kynhun jong ki puit ki la bam ïa ki jingthung jong phi. Dei ma nga uba la phah ïa kane ka kynhun pyrshah ïa phi.

²⁶ Mynta phin don kyrhai ban bam, bad phin sngewhun. Phin ïaroh ïa U Trai U Blei jong phi, uba la leh kiei kiei kiba phylla na ka bynta jong phi ki briew jong nga kin ym shah ñiewbeiñ shuh.

²⁷ Te, ma phi ki Israel, phin tip ba nga don hapdeng jong phi bad ba ma nga, U Trai, nga long U Blei jong phi bad ym don uwei pat. Ki briew jong nga kin ym shah ñiewbeiñ shuh.”

Ka Sngi jong U Trai

²⁸ “Hadien ngan sa theh ïa U Mynsiem jong nga ha uwei pa uwei: Ki khun shynrang bad ki khun kynthei jong phi kin pynbna ïa ka khubor jong nga; ki tymmen shynrang kin don ki jingphohsniew, bad ki samla shynrang jong phi kin ïohi ki jingïohipaw.

²⁹ Ha kata ka por ngan theh noh ïa U Mynsiem jong nga wat ha ki shakri, ki shynrang bad ki kynthei kumjuh.

³⁰ “Ngan ai ki jingmaham shaphang kata ka sngi ha ka suiñbneng bad ha ka khyndew; kan don ka jingumsnam, ka ding bad ki lyoh tdem.

³¹ Ïa ka sngi yn pyndum, bad u bnai un kylla saw kum ka snam shuwa kata ka sngi bakhraw bad bashyrkhei jong U Trai kan wan.

³² Hynrei baroh uba kyrpad ïa U Trai na ka bynta ka jingïarap, yn pynim. Kumba U Trai U la ong, ‘Katto katne ha Jerusalem, kin lait im; kito ïa kiba nga jied, kin im.’ ”