JOEL 1 - Khasi CL Bible (BSI)

¹ Kane ka long ka khubor U Trai ha u Joel u khun jong u Pethuel.

Ki paidbah ki ïamkthang namar ka jingpynjot ïa ki jingthung

² To shahshkor, phi ki briew ba la kham rangbah; phi baroh ha Judah, to shahshkor. Hato kaba kum kane ka la ju jia ha ka por jong phi lane ha ka por ki kpa jong phi?

³ To ïathuh ïa la ki khun shaphang jong ka; kin sa ïathuh ïa la ki khun, ki ban sa ïathuh ïa ka pateng kaba hadien.

⁴ Ki kynhun jong ki puit, kawei hadien kawei ki la hiar halor ki jingthung; kaei kaba kawei ka kynhun ka la iehnoh, kawei pat ka kynhun ka bam duh.

⁵ To kyndit na kaba ïohthiah bad to ïam, phi ki nongbuaid; to ïam, phi ki nongdih kyiad; ïa ki sohwaiñ ban shna waiñ thymmai la pynjot.

⁶ Ka kynhun ki puit ka la tur ïaleh ïa ka ri jong ngi; ki long kiba khlaiñbor bad bun palat bym lah ñiew shuh; ki bniat jong ki, ki nep kum kito ki jong u sing.

⁷ Ki la pynjot ïa ki brisoh jong ngi bad ki la ktha lut ïa ki dieng Dumbur jong ngi. Ki la bam lut ïa ki snep dieng, haduh bad ki tnat ki la kylla lieh.

⁸ To ïam, phi ki briew, kum ka samla kaba ïambriew ïa ka jingïap jong u briew uba kan sa shongkurim.

⁹ Ym don kew lane waiñ ban ai ha ka Templ; ki lyngdoh ki ïamkthang namar kim don ki jingainguh na ka bynta U Trai.

¹⁰ Ki lyngkha kim don ei ei shuh; ka khyndew ka ïamkthang namar ïa u kew la pynjot, ki sohwaiñ ki la tyrkhong, bad ki dieng Olib ki la ïapstai.

¹¹ To sngewsih, phi ki nongrep; to ïam, phi kiba sumar ïa ki bri sohwaiñ, namar u kew, u barli, ho-oid, ïa baroh ki jingthung la pynjot.

¹² Ki dieng sohwaiñ bad ki dieng Dumbur ki la ïapstai; baroh ki diengsoh ki la tyrkhong bad ki la ïap. Ka jingkmen jong ki briew ka la duh noh.

¹³ To phong ki jaiñ khain bad to ïam, phi ki lyngdoh kiba shakri ha ka duwan! To leit sha ka Templ bad to ïamkthang baroh shi miet! Ym don kew lane waiñ ban ainguh ha U Blei jong phi.

¹⁴ To ai hukum na ka bynta ka jingshah jingit; to khot na ka bynta ka jingïaseng bah! To ïalumlang ïa ki nongïalam bad ki paid Judah baroh ha ka Templ jong U Trai U Blei jong phi bad to khot kyrpad ïa U.

¹⁵ Ka Sngi jong U Trai ka la jan; ka sngi ha kaba U Badonbor Baroh u wallam ka jingpynjot. Kaba haduh katno ka jingshyrkhei kata ka sngi kan wallam!

¹⁶ Ngi shu khmih ha ka jingbymlah leh ei ei haba ïa ki jingthung jong ngi la pynjot. Ym don jingkmen ha ka Templ jong U Blei jong ngi.

¹⁷ Ki symbai ki ïap ha ka khyndew kaba tyrkhong. Ym don kew ban kynshew, bad kumta ki thiar thylli ki don ha ka jingjot.

¹⁸ Ki masi ki ïa-pah ha ka jinglanot namar ym don jaka phlang na ka bynta jong ki; ki kynhun langbrot ruh ki shah jynjar.

¹⁹ Nga pyrta sha me, ko Trai, namar ki jaka phlang bad ki dieng ki la tyrkhong, kumba ka ding ka la thang ïa ki.

²⁰ Wat ki mradkhlaw ki lynñiar sha me namar ki wahduid ki la rngad.