JINGRWAI SOLOMON 3 - Khasi CL Bible (BSI)

¹ Ha ka jingïohthiah ha la ka jingthiah, na kawei ka miet hadien kawei pat nga la phohsniew ïa uta uba nga ieit; nga la wad ïa u, hynrei ngam shem ïa u.

² Nga la leit sakma kylleng ka nongbah, lyngba ki lynti bah bad ki lynti khim jong ka. Nga la khmih ïa uta uba nga ieit, nga la khmih, hynrei ngam shem ïa u.

³ Ki nongap pahara kiba ïaid ha ka nongbah ki la ïohi ïa nga. Nga la kylli ïa ki, “Hato phi la shem ïa uba ieit jong nga?”

⁴ Tang mar ïakhlad na ki, nga la shem ïa u. Nga la bat ïa u bad ngam shah ïa u ban leit tad ynda nga ïalam ïa u sha ka ïing i mei jong nga, sha ka kamra ha kaba la kha ïa nga.

⁵ To kular ïa nga, ko ki kynthei Jerusalem; to smai da ka skei kaba stet ne da ki khiat ba phin ym pynthut ïa ka jingieit jong ngi.

Ka jingrwai kaba lai Ka Briew

⁶ Kaei kane kaba wan na ri shyiap kum u rishot tdem, kaba iw da ka jingiwbih bad ka mirr, ka jingiwbih ba la die da ki nongkhaïi?

⁷ U Solomon u wan, la kit ïa u halor ka khet; hynriewphew ngut ki shipai ki pynlong ka kynhun ïada ïa u, ki shipai batbit tam ha Israel.

⁸ Baroh ki long kiba tbit bha ha ka waitlam; ki la long ki nongïaleh thma ba satar. Ïa uwei pa uwei na ki la pynkieng atiar da ka waitlam, ba la pynkhreh na ka bynta ka jingshah tur ïaleh ha ka por mynmiet.

⁹ Ïa u syiem Solomon la kit halor ka khet kaba la shna da ka dieng kaba kynsai.

¹⁰ Ïa ki jingpynïeng ïa ka la sop da ka rupa, halor jong ka, ka don ka jaiñ ba la thain syntiew da ka ksiar. Ïa ki kushon la sop da ka jaiñ kaba sawbthuh, ba la thain pynitynnat da ki kynthei Jerusalem.

¹¹ Ko ki kynthei ka Seïon, to wan bad khmih ïa u syiem Solomon. U da phong ïa ka pansngiat kaba ka kmie jong u ka la buh halor ka khlieh jong u ha ka sngi kyntiew kurim jong u, ha ka sngi ka jingsngewbha bad ka jingkmen jong u.