JINGRWAI SOLOMON 2 - Khasi CL Bible (BSI)

¹ Nga long tang u syntiew khlaw ka Sharon, u 'tiew lili ha ka them u lumbah.

U Briew

² Kum u 'tiew lili hapdeng ki shiah ka long kaba ieit jong nga hapdeng ki kynthei.

Ka Briew

³ Kum u diengsoh apple hapdeng ki dieng ha khlaw, kumta u long uba ieit thep mynsiem jong nga haba nujor bad kiwei pat ki shynrang. Nga ieit ban shong hapoh ka jingkahtngen jong u, bad u soh jong u, u thiang ha ka jingmad jong nga.

⁴ U ïalam ïa nga sha ka kamra jingkhawai jong u bad u kyntiew ïa ka lama jingieit halor jong nga.

⁵ Pynïoh pat ïa ka jingkhlaiñ jong nga da ki soh kismis bad pynpyngngad ïa nga da ki soh apple! Nga tlot na ka jingkwah palat jong nga.

⁶ Ka kti kadiang jong u ka don hapoh ka khlieh jong nga, bad ka kti kamon jong u ka syrpud ïa nga.

⁷ To kular ïa nga ko ki kynthei Jerusalem; to smai da ka skei kaba stet bad da ki khiat ba phin ym pynthut ïa ka jingieit jong ngi.

Ka jingrwai kaba ar Ka Briew

⁸ Nga ïohsngew ïa ka sur uba ieit jong nga. U wan da kaba mareh nalor ki lumbah, u da mareh stet sha shiliang ki lumrit sha nga.

⁹ Uba ieit jong nga u long kum u khiat bad kum u bthong samla. Hangtai u ïeng hajan ka kynroh. U khmih shapoh lyngba ka jingkhangïit bad u jngoh lyngba ka thliew barit.

¹⁰ Uba ieit jong nga u kren ha nga. To wan, ko ba-ieit jong nga; ko ieit, to wan bad nga.

U Briew

¹¹ Ka tlang ka la kut; u slap u la sangeh;

¹² ha ka rudnong ki syntiew ki phuh. Kane ka dei ka por ban rwai; ïa ka jingrwai ka lyngdkhur la ïohsngew ha ki lyngkha.

¹³ Ki soh Dumbur ki sdang ban ih, ka lyer ka sma iwbih da ki dieng sohwaiñ ba phuh syntiew. To wan, ko ba-ieit jong nga; ko ieit, to wan bad nga.

¹⁴ Phi long kum ka lyngdkhur kaba rieh ha ki khap jong u mawsiang. Ai ngan ïohi ïa ka durkhmat ba-bhabriew jong phi bad ïohsngew ïa ka sur bakhring jong phi.

¹⁵ Kem ïa ki myrsiang, ki myrsiang barit, ha shuwa ba kin pynjot ïa ka bri sohwaiñ jong ngi kaba dang phuh syntiew.

Ka Briew

¹⁶ Uba ieit jong nga u dei u jong nga hi, bad nga dei ka jong u. U bsa ïa la ka kynhun langbrot hapdeng ki 'tiew lili

¹⁷ tad haduh ban da beh ka lyer step bad ba ka jingdum ka jah. To wan phai ko ba-ieit jong nga, kum u khiat, kum u bthong ha ki lumbah jong ka Bether.