JINGPYNPAW 9 - Khasi CL Bible (BSI)

¹ Nangta u angel uba san u la put ïa ka turoi. Nga la ïohi ïa u khlur uba la hap sha ka khyndew, bad la ai ha u ïa u shabi jong ka liewlong ba khlem trai.

² U khlur u la plie ïa ka liewlong ba khlem trai, bad ka tdem ka la mih puk na ka, kum ka tdem na ka lawar ding kaba heh; ïa ka jingshai ka sngi bad ka suiñbneng la pyndum ngaiñ da ka tdem na kata ka liewlong ba khlem trai.

³ Ki puit ki la mih na kata ka tdem sha ka khyndew, bad la ai ha ki ïa kajuh ka bor kaba ki 'ñianglartham ki don.

⁴ La ïathuh ïa ki ba kin ym pynmynsaw ïa u phlang lane ïa ki dieng lane ïa kiwei pat ki jingthung; ki lah ban pynmynsaw tang ïa ki briew ki bym don ka shab jong U Blei ha ki shyllangmat jong ki.

⁵ Ym shym la shah ïa ki puit ban pynïap ïa kine ki briew, hynrei tang ban shu pynsaja ïa ki san bnai. Ka jingkynjut na kata ka jingpynsaja ka long kum na ka sni jong ka 'ñianglartham.

⁶ Ha kine ki san bnai kin wad ïa ka jingïap, hynrei kin ym shem ïa ka; kin kwah ban ïap noh, hynrei ka jingïap kan phet na ki.

⁷ Kita ki puit ki long kum ki kulai kiba la khreh na ka bynta ka thma; halor ki khlieh jong ki, ki la phong ïa kaei kaba syriem kum ki pansngiat ksiar; bad ki durkhmat jong ki, ki long kum ki durkhmat briew.

⁸ U shñiuh jong ki u long kum u shñiuh kynthei, ki bniat jong ki, ki long kum ki bniat sing.

⁹ Ïa ki shadem jong ki la tap da kaei kaba i kum ki jingïada shadem da ka nar, bad ka jingsawa kaba mih na ki thapniang jong ki ka long kum ka jingriew jong ki kali kulai thma babun kiba leit tur sha ka thma.

¹⁰ Ki don ki tdong bad ki sni kum kito ki jong ka 'ñianglartham, bad ka long da ki tdong jong ki ba ki don ka bor ban pynmong ïa ki briew haduh san bnai.

¹¹ Ki don u syiem uba synshar halor jong ki, uba long u angel uba khmih ïa ka liewlong ba khlem trai. Ka kyrteng jong u ha ka ktien Hebru ka long u Abaddon; bad ha ka ktien Grik ka long u Apollyon (kaba mut u “Nongpynjot”).

¹² Ka jingkordit kaba nyngkong ka la kut; hadien kane ka don sa ar tylli ki jingkordit ki ban wan.

¹³ Nangta u angel uba hynriew u la put ïa la ka turoi. Nga la ïohsngew ïa ka sur kaba wan na ki saw tylli ki dong jong ka duwan ksiar kaba ïeng ha khmat U Blei.

¹⁴ Kata ka sur ka la ong ha uta u angel uba hynriew, “To pyllait noh ïa ki saw ngut ki angel kiba la shah khum ha ka wahbah Ïuphratis!”

¹⁵ La pyllait noh ïa kita ki saw ngut ki angel; na ka bynta kane hi ka kynta jong kane hi ka sngi jong une hi u bnai bad ka snem ïa ki la buh pynkhreh ban pynïap noh shi bynta na ka lai bynta jong u bynriew baroh.

¹⁶ La ïathuh ïa nga ïa ka jingdon jong ki shipai shong kulai: Ki la long arphew lakh ngut.

¹⁷ Bad ha ka jingïohipaw jong nga, nga la ïohi ïa ki kulai bad ïa ki nongshong kulai jong ki: Ki don ki jingïada shadem kiba saw kum ka ding, kiba jngum kum u Sapphir, bad kiba stem kum u kyndok. Ki khlieh jong ki kulai ki la long kum ki khlieh sing, bad na ki shyntur jong ki la mih ka ding, ka tdem bad u kyndok.

¹⁸ Shi bynta na ki lai bynta jong u bynriew la pynïap da kito ki lai tylli ki jingïapthem: Ka ding, ka tdem, bad u kyndok kiba mihnoh na ki shyntur jong ki kulai.

¹⁹ Naba ka bor jong ki kulai ka don ha ki shyntur jong ki bad ruh ha ki tdong jong ki. Ki tdong jong ki, ki long kum ki bseiñ ba don ki khlieh, bad ki pyndonkam ïa ki ban pynmynsaw ïa ki briew.

²⁰ Kiba sah na u bynriew, baroh kito kiba ym shym la pynïap noh da kine ki jingïapthem, kim shym la phai noh na kaei kaba ki hi ki la pynlong. Kim shym la sangeh ban mane ïa ki ksuid, lane ïa ki blei ba la thaw da ka ksiar, ka rupa, ka rnong, u maw, bad da ka dieng, ki bym lah ban ïohi, ne ïohsngew, ne ïaid.

²¹ Lymne kim shym la kylla-kaba-mut na ki jingpynïap briew jong ki, ki kam myntor jong ki, ki kam awria bajakhlia, ne ka kam tuh jong ki.