JINGPYNPAW 8 - Khasi CL Bible (BSI)

Ka jingpyndait kaba hynñiew

¹ Haba U Khunlangbrot u la pynpait noh ïa ka jingpyndait kaba hynñiew, ka la don ka jingsngap jar ha bneng kumba shiteng kynta.

² Nangta nga la ïohi ïa ki hynñiew ngut ki angel kiba ïeng ha khmat U Blei, bad la ai ha ki, hynñiew tylli ki turoi.

³ Uwei pat u angel, uba bat ïa ka pliang thang jingiwbih kaba da ka ksiar, u la wan bad u la ïeng ha ka duwan. La ai ha u shikatdei ka jingiwbih ryngkat bad ki jingduwai jong ki briew jong U Blei baroh bad ban ai ïa ka halor ka duwan ksiar kaba ïeng ha khmat kata ka khet.

⁴ Ka tdem jong ka jingainguh thang ka la kiew shalor ryngkat lem bad ki jingduwai jong ki briew jong U Blei na ki kti u angel uba ïeng ha khmat U Blei.

⁵ Nangta uta u angel u la shim ïa kata ka pliang thang jingiwbih, u la pyndap ïa ka da ki rnga ding barhem na ka duwan, bad u la bret ïa ka halor ka khyndew. La don ki jingkyrhuh bad ki jingsawa u pyrthat, ki jingthaba leilieh, bad u jumai.

Ki turoi

⁶ Nangta kita ki hynñiew ngut ki angel kiba don kita ki hynñiew tylli ki turoi ki la pynkhreh ban put ïa ki.

⁷ U angel uba nyngkong u la put ïa la ka turoi. U phria bad ka ding, ba la khleh lang bad ka snam, ki la hap halor ka khyndew. Shi bynta na ka lai bynta jong ka khyndew la thang duh noh, shi bynta na ka lai bynta jong ki dieng, bad ïa baroh ki phlang bajyrngam.

⁸ Nangta u angel uba ar u la put ïa la ka turoi. Ïa kaei re kaei kaba i kum u lumbah uba khraw uba mehding la bret sha duriaw.

⁹ Shi bynta na ka lai bynta jong ka duriaw la pynkylla snam, shi bynta na ka lai bynta jong ki jingthaw ba-im ha ka duriaw ki la ïap, bad shi bynta na ka lai bynta jong ki lieng la shah pynjot.

¹⁰ Nangta u angel uba lai u la put ïa la ka turoi. U khlur uba heh, uba meh kum ka dongmusa, u la hap na sahit bneng bad u la hap halor ka shi bynta na ka lai bynta jong ki wah bad halor ki pukri um.

¹¹ (Ka kyrteng uta u khlur ka long “Ka Jingkthang.”) Shi bynta na ka lai bynta jong ka um ka la kylla kthang, bad bun ki briew ki la ïap na kaba dih ïa kane ka um, namar ka la kylla kthang.

¹² Nangta u angel uba saw u la put ïa la ka turoi. Shi bynta na ka lai bynta jong ka sngi la shoh, bad shi bynta na ka lai bynta jong u bnai, bad shi bynta na ka lai bynta jong ki khlur, ba ka jingshai jong ki ka la jah noh shi bynta na ka lai bynta ka jingtyngshaiñ; ym shym la don jingshai ha ka shi bynta na ka lai bynta jong ka sngi bad ïa ka shi bynta na ka lai bynta jong ka miet.

¹³ Nangta nga la khmih, nga la ïohsngew ïa u pukni uba her shajrong eh jong ka suiñ ba u pyrta ha ka sur kaba jam, “Kaba kordit! Kaba kordit! Katno kaba kordit kan long ïa baroh kiba shong ha ka pyrthei haba ka jingsawa ka mih na ki turoi ïa kaba kita kiwei pat ki lai ngut ki angel kin put.”