JINGPYNPAW 7 - Khasi CL Bible (BSI)

Ki shi lakh sawphew saw hajar ngut ki paid Israel

¹ Hadien kane nga la ïohi ïa ki saw ngut ki angel kiba ïeng ha ki saw tylli ki dong jong ka pyrthei, ba ki ïabat ïa ki sawlyer, khnang ba yn ym don lyer ka ban beh halor ka khyndew lane ha ka duriaw lane ha pyrshah uno uno u dieng.

² Bad nga la ïohi ïa uwei pat u angel uba wan kiew na shaphang mihngi lem bad ka shab jong U Blei uba im. U la pyrta ha ka ktien kaba jam ïa ki saw ngut ki angel ha kiba U Blei u la ai bor ban pynjot ïa ka khyndew bad ïa ka duriaw.

³ U angel u la ong, “Wat pynsniew ïa ka khyndew, ka duriaw ne ïa ki dieng, katba ym pat buh dak ïa ki shakri jong U Blei jong ngi da ka shab ha ki shyllangmat jong ki.”

⁴ Bad la ïathuh ïa nga ba ka jingkheiñ jong kito ïa kiba la buh dak da ka shab jong U Blei ha ki shyllangmat jong ki ka la long shi lakh sawphew saw hajar ngut.

^5-8 Ki la long na ki khat-ar jait ki Israel, khat-ar hajar ngut na kawei kawei ka jait: ka jait Judah, ka jait Reuben, ka jait Gad, ka jait Asher, ka jait Naphtali, ka jait Manasseh, ka jait Simeon, ka jait Lebi, ka jait Issakhar, ka jait Sebulun, ka jait Joseph, bad ka jait Benjamin.

U paidbah byllien

⁹ Hadien kane nga la khmih, bad la don u paidbah byllien — ym don mano mano ba lah ban ñiew ïa kita ki briew baroh! Ki la long na man ki kynja bynriew, ki jaitbynriew, ki hima, bad ki jait ktien, bad ki la ïeng ha khmat ka khet bad ha khmat uta U Khunlangbrot, kiba la riam ha ki jaiñ balieh bad ki bat ïa ki tnat dieng Tlai ha la ki kti.

¹⁰ Ki la pyrta ha ka sur kaba jam: “Ka jingpynim ka wan na U Blei jong ngi, uba shong halor ka khet, bad na uta u Khunlangbrot!”

¹¹ Ki angel baroh ki la ïeng sawdong ka khet, ki nongsharai balang, bad ki saw tylli ki jingthaw ba-im.

¹² Te ki la dem ngon ha khmat kata ka khet bad ki la mane ïa U Blei, ki da ong, “Amen! Ka jingïaroh, ka burom, ka jingstad, ka jingainguh, ka jingpyndonburom, ka bor, bad ka jingkhlaiñ ki long jong U Blei jong ngi junom la junom! Amen!”

¹³ Te uwei na kita ki nongsharai balang u la kylli ïa nga, “Kiei kine ki briew kiba la phong da ki jaiñ balieh, bad nangno ki wan?”

¹⁴ Nga la jubab ïa u, “Ngam tip, ko kynrad. Phi te phi tip.” U la ong ha nga, “Kine ki long ki briew kiba la lait na kata ka jingpynshitom kaba triem. Ki la sait ïa la ki jaiñkup bad ki la pynlieh ïa ki da ka snam jong uta U Khunlangbrot.

¹⁵ Ka dei kumta ba balei ki ïeng ha khmat ka khet U Blei bad ki shakri ïa u bad sngi bad miet ha ka templ jong u. Uta uba shong halor ka khet un ïada ïa ki da ka jingdon ryngkat jong u.

^16-17 Lano lano ruh kin ym thngan ne kin ym sliang; ka sngi lymne ka jingshit kyr-ang kan ym thang ïa ki, namar U Khunlangbrot, uba don hapdeng jong ka khet, un long u nongaplangbrot jong ki, bad un ïalam ïa ki sha ki umpohliew jong ka um ba ai jingim. Bad U Blei un ñiad noh ïa ki ummat baroh na ki khmat jong ki.”