JINGPYNPAW 6 - Khasi CL Bible (BSI)

Ki jingpyndait

¹ Nangta nga la ïohi ïa U Khunlangbrot ba u pynpait noh ïa kawei na ki hynñiew tylli ki jingpyndait, bad nga la ïohsngew ïa uwei na ki saw tylli ki jingthaw ba-im ba u ong ha ka sur kaba sawa kum u pyrthat, “To wan!”

² Nga la khmih, bad hangta la don u kulai balieh. Halor jong u, u nongshong kulai u la bat ïa ka ryntieh, bad ha u la ai ïa ka pansngiat. U la shong halor jong u kum u nongjop ban jop.

³ Nangta U Khunlangbrot u la pynpait noh ïa ka jingpyndait kaba ar; bad nga la ïohsngew ïa u jingthaw ba-im uba ar uba ong, “To wan!”

⁴ Sa uwei pat u kulai u la wan mih, uba saw ka rong. Ha u nongshong kulai la ai ïa ka bor ban wanrah ïa ka thma ha ka pyrthei, ba ki briew kin ïa-pynïap para ma ki hi. La ai ha u ïa ka waitlam kaba heh.

⁵ Nangta U Khunlangbrot u la pynpait ïa ka jingpyndait kaba lai; bad nga la ïohsngew ïa u jingthaw ba-im uba lai uba ong, “To wan!” Nga la khmih, bad hangta la don u kulai uba ïong. U nongshong kulai u la bat ïa ka tarajur ha la ka kti.

⁶ Nga la ïohsngew ïa kaei kaba sawa kum ka sur kaba wan napdeng ki saw tylli ki jingthaw ba-im kaba la ong, “Shi kilo u kew na ka bynta ka bainong shi sngi, bad lai kilo u barli na ka bynta ka bainong shi sngi. Hynrei wat pynjot noh ïa ki dieng Olib bad ïa ki bri sohwaiñ!”

⁷ Nangta U Khunlangbrot u la pynpait ïa ka jingpyndait kaba saw; bad nga la ïohsngew ïa u jingthaw ba-im uba saw uba ong, “To wan!”

⁸ Nga la khmih, bad hangta la don u kulai uba lieh bthuh. Ïa u nongshong kulai la ai kyrteng “ka Jingïap”, bad ka Hades ka bud syndah nadien. La ai ha ki ka bor halor shipawa na ka pyrthei, ban pynïap da ka thma, ka 'nemsniew, ka khlam, bad da ki mradkhlaw.

⁹ Nangta U Khunlangbrot u la pynpait ïa ka jingpyndait kaba san. Nga la ïohi ha khrum ka duwan ïa ki mynsiem jong kito kiba la shah pynïap namar ba ki la pynbna ïa ka ktien U Blei bad ba ki la ïaineh ha ki jingphla jong ki.

¹⁰ Ki la pyrta da ka sur kaba jam, “Ko Trai Badonbor Baroh, u bakhuid bad uba shisha! Sa katno kan long haduh ba men da bishar ïa ki briew ha ka pyrthei bad pynshitom ïa ki namar ba ki pynïap ïa ngi?”

¹¹ Ha uwei pa uwei na ki la ai ïa ka jaiñkup balieh, bad la ong ïa ki ba kin shongthait sa shipor, tad ynda la dep kheiñ lut ïa ki para shakri bad parabangeit kiba la shah pynïap, kumba la leh ïa ki.

¹² Bad nga la ïohi ïa U Khunlangbrot ba u pynpait ïa ka jingpyndait kaba hynriew. Ka la don ka jingkhynñiuh jumai kaba jur, bad ka sngi ka la kylla rong ïong kum ka jaiñ ïong kaba khain, bad u bnai u la kylla rong saw kum ka snam.

¹³ Ki khlur ki la hap ha pyrthei, kum ki soh Dumbur bym pat ih na u dieng haba kynther ka lyer kaba jur.

¹⁴ Ka sahit bneng ka la jah noh kum ka kot kli ba la kli, bad ïa ki lum bad ki dewlynnong baroh la pynkynriah na ka jaka ba ki don.

¹⁵ Te ki syiem jong ka pyrthei, ki nongsynshar bad ki rangbah shipai, kiba riewspah bad kiba donbor, bad kiwei pat ki briew baroh, ki mraw ne kiba laitluid, ki la buhrieh ïa lade ha ki krem bad ha ki synrang maw ba-don ha ki lum.

¹⁶ Ki la pyrta ha ki lumbah bad ha ki mawsiang, “To tap halor jong ngi bad to buhrieh noh ïa ngi na ki khmat jong uta uba shong halor ka khet bad na ka jingbitar U Khunlangbrot!

¹⁷ Ka sngi batriem jong ka jingbitar jong ki ka la poi, bad uei uba lah ban ïeng pyrshah ïa ka?”