JINGPYNPAW 5 - Khasi CL Bible (BSI)

Ka kot kli bad U Khunlangbrot

¹ Nga la ïohi ïa ka kot kli ha ka kti kamon jong uta uba shong halor ka khet; kaba la dap da ka jingthoh ha baroh arliang bad kaba la pyndait da ki hynñiew tylli ki jingpyndait.

² Bad nga la ïohi ïa u angel uba khlaiñ, uba pynbna ha ka sur kaba jam, “Mano uba dei hok ban pynpait ïa ki jingpyndait bad ban plied ïa ka kot kli?”

³ Hynrei ym shym la don ha bneng lane ha khyndew lane ha ka pyrthei kaba shapoh, uba lah ban plied ïa ka kot kli bad ban khmih shapoh jong ka.

⁴ Nga la ïamkthang namar ym shym lah ban shem ïa uno uno uba dei hok ban plied ïa ka kot kli lane ban khmih shapoh jong ka.

⁵ Te uwei na ki nongsharai balang u la ong ha nga, “Wat ïam. Ha khmih! U Sing na ka jait Judah, uba hiarpateng na u Dabid, u la ïoh ïa ka jingjop, bad u lah ban pynpait ïa ki hynñiew tylli ki jingpyndait bad ban plied ïa ka kot kli.”

⁶ Nangta nga la ïohi ïa U Khunlangbrot uba ïeng hapdeng ka khet, ïa kaba la ker sawdong da ki saw tylli ki jingthaw ba-im bad ki nongsharai balang. U Khunlangbrot u la paw ba u la shah pynïap. U don hynñiew tylli ki reng bad hynñiew tylli ki khmat, kiba long ki hynñiew ki mynsiem U Blei ïa kiba la phah sha kylleng ka pyrthei.

⁷ U Khunlangbrot u la leit bad u la shim ïa ka kot kli na ka kti kamon jong uta uba shong halor ka khet.

⁸ Katba u dang leh kumta, kita ki saw tylli ki jingthaw ba-im bad ki arphew saw ngut ki nongsharai balang ki la dem khrup ha khmat U Khunlangbrot. Uwei pa uwei u la don ka duitara bad ki pliang ksiar ba la pyndap da ka jingiwbih, kiba long ki jingduwai jong ki briew jong U Blei.

⁹ Ki la rwai ka jingrwai bathymmai: “Me long uba dei hok ban shim ïa ka kot kli bad ban pynpait ïa ki jingpyndait jong ka. Naba la pynïap ïa me, bad da ka jingïap ba aiti lut jong me me la siew kuna na ka bynta ki briew jong U Blei na kawei pa kawei ka jait, ka jait ktien, ka hima bad ka jaitbynriew.

¹⁰ Me la pynlong ïa ki, ka hima ki lyngdoh ban shakri ïa U Blei jong ngi, bad kin synshar ha ka pyrthei.”

¹¹ Nga la khmih biang, bad nga la ïohsngew ïa ki angel, da ki hajar bad ki million na ki! Ki la ïeng sawdong ka khet, ki saw tylli ki jingthaw ba-im, bad ki nongsharai balang,

¹² bad ki la rwai ha ka sur bajam: “U Khunlangbrot uba la shah pynïap u long uba dei hok ban ïohpdiang ïa ka bor, ka spah, ka jingstad, bad ka jingkhlaiñ, ka jingpyndonburom, ka burom, bad ka jingïaroh!”

¹³ Bad nga la ïohsngew ïa ki jingthaw baroh ha bneng, ha khyndew, ha ka pyrthei shapoh, bad ha ka duriaw — baroh kiei kiei kiba im ha ka pyrthei — bad ki ïarwai: “Ha uta uba shong halor ka khet bad ha U Khunlangbrot, long ka jingïaroh bad ka jingpyndonburom, ka burom bad ka bor, junom la junom!”

¹⁴ Ki saw tylli ki jingthaw ba-im ki la jubab, “Amen!” Bad ki nongsharai balang ki la dem khrup bad ki la mane.