JINGPYNPAW 4 - Khasi CL Bible (BSI)

Ka jingmane ha bneng

¹ Ha kane ka por, nga don kawei pat ka jingïohipaw bad nga la ïohi ïa ka jingkhang ba plie ha bneng. Bad nga la ïohsngew ïa ka sur kaba sawa kum ka turoi kaba nga la ïohsngew kaba kren ha nga kumba mynshuwa, kaba ong, “Wan kiew shane shalor, bad ngan pyn-i ïa me kaei kaba dei ban jia hadien kane.”

² Mar kumta hi, U Mynsiem u la shimti ïa nga. Hangta ha bneng la don ka khet bad la don uwei uba shong halor jong ka.

³ Ka durkhmat jong u ka phyrnai kum ki mawkordor, kum u Jasper bad u Karnelian, bad baroh sawdong ka khet la don u simpyllieng uba don ka rong kum ka jong u Emerald.

⁴ Sawdong ïa ka khet, la don arphew saw tylli kiwei pat ki khet, ha kaba la shong arphew saw ngut ki nongsharai balang kiba la riam da kaba lieh bad phong ki pansngiat ksiar.

⁵ Na ka khet la mih ki jingthaba leilieh, ki jingkyrhuh, ki jingsawa u pyrthat. Ha khmat jong ka khet, la don hynñiew tylli ki dongmusa bameh, kiba long ki hynñiew ki mynsiem jong U Blei.

⁶ Ha khmat ka khet ruh la don kaei kaba i kum ka ïit bakhraw, kaba shai sngur bha. La ker ha baroh sawdong ka khet da saw tylli ki jingthaw ba-im kiba don ki khmat sha khmat bad shadien.

⁷ Uba nyngkong u don ka dur kum u sing; uba ar u don ka dur kum u masi kyrtong; uba lai u don ka durkhmat kum ka durkhmat u briew; bad uba saw u don ka dur kum u pukni uba her.

⁸ Baroh kita ki saw tylli ki jingthaw ba-im, ki don mar hynriew tylli ki thapniang, bad ïa ki la tap da ki khmat, shapoh bad shabar. Mynsngi bad mynmiet kim ju sangeh noh na kaba rwai: “Bakhuid, bakhuid, bakhuid, long U Trai U Blei Badonbor Baroh, Uba la long, uba long bad u ban sa wan.”

⁹ Ki saw tylli ki jingthaw ba-im ki rwai ki jingrwai jong ka burom bad ka jingpyndonburom bad ki jingsngewnguh ïa uta uba shong ha ka khet, bad mane ïa uta uba im junom la junom.

¹⁰ Haba ki leh kumta, kita ki arphew saw ngut ki nongsharai balang ki la dem khrup ha khmat uta uba shong halor ka khet, bad mane ïa u, uba im junom la junom. Ki bret ïa ki pansngiat jong ki ha khmat jong ka khet bad ki ong,

¹¹ “U Trai bad U Blei jong ngi! Me long uba dei hok ban ïoh ïa ka burom, ka jingpyndonburom bad ka bor. Naba me la thaw ïa kiei kiei baroh, bad da ka mon jong me, la ai ïa ki ban im bad ïa ka jingim.”