JINGPYNPAW 3 - Khasi CL Bible (BSI)

Ka khubor ïa ka balang ha Sardis

¹ “Thoh ha u angel jong ka balang ha Sardis: “Kane ka long ka khubor na uta uba don ki hynñiew ki mynsiem jong U Blei bad ki hynñiew ki khlur. Nga tip ïa kaei kaba pha leh; nga tip ba pha don ka nam babha ba pha long kaba im, wat la pha la ïap!

² Kumta kyndit bynriew noh, bad pynkhlaiñ ïa kaei kaba pha dang don ha shuwa ba kan jah noh khoit. Naba nga shem ba kaei kaba pha la leh kam long kaba janai ha khmat jong U Blei jong nga.

³ Kynmaw te, ïa kaei kaba la hikai ïa pha bad ïa kaei kaba pha la ïohsngew; kohnguh ïa kata bad phai noh na ki pop jong pha. Lada pham kyndit bynriew noh, ngan wan ha pha kum u nongtuh, bad phan ym lah wat ban tip ïa ka por lano ngan wan.

⁴ Hynrei katto katne ngut na pha hangto ha Sardis kim shym la pyntngit ïa ki jaiñkup jong ki. Phan ïaid ryngkat bad nga, da kaba phong da ki jaiñkup balieh, namar pha long kaba dei hok ban leh kumta.

⁵ Ïa kito kiba ïoh ka jingjop yn pynkup ïa ki kumne ha ki jaiñkup balieh, bad ngan ym weng noh ïa ki kyrteng jong ki na ka kitab jong kiba im. Ha ka jingdon ryngkat jong U Kpa jong nga bad ki angel jong u, ngan pynbna paidbah ba ki long ki jong nga.

⁶ “Te lada pha don ki shkor, shahshkor ïa kaei kaba U Mynsiem u ong ha ki balang!

Ka khubor ïa ka balang ha Philadelphia

⁷ “Thoh ha u angel jong ka balang ha Philadelphia: “Kane ka long ka khubor na uta uba khuid bad uba shisha. U don u shabi jong u Dabid, bad haba u plie ïa ka jingkhang, ym don uba lah ban khang ïa ka, bad haba u khang ïa ka, yn ym don uba lah ban plie ïa ka.

⁸ Nga tip ïa kaei kaba pha leh; nga tip ba pha don khyndiat ka bor; pha la bud ïa ka jinghikai jong nga bad pha la ïaineh ha nga. Nga la plie ïa ka jingkhang ha khmat jong pha, kaba ym don ba lah ban khang.

⁹ Shahshkor! Na ka bynta kato ka kynhun kaba dei ka jong u Soitan, kito kiba lamler kiba kam ba ki dei ki Jiw hynrei kim dei, ngan pynlong ïa ki ban wan bad dem khrup ha ki kjat jong pha. Baroh kin tip ba nga ieit ïa pha.

¹⁰ Namar ba pha la kohnguh ïa ka hukum jong nga ban shahshitom, nga ruh ngan ri sumar ïa pha ha ka por jong ka jingjynjar ka ban wan ha ka pyrthei ban tynjuh ïa ki briew baroh ha ka pyrthei.

¹¹ Ngan wan kloi. Sumar kyndong ïa kaei kaba pha don, khnang ba yn ym don uno uno u ban lute na pha ïa ka bainong jong ka jingjop.

¹² Ngan pynlong ïa uta uba jop, u rijied ha ka Templ jong U Blei jong nga, bad un ïailong hangta. Ngan thoh halor jong u ïa ka kyrteng U Blei jong nga bad ka kyrteng jong ka nongbah jong U Blei jong nga, ka Jerusalem bathymmai, ka ban wan hiar na bneng na U Blei jong nga. Ngan thoh ruh halor jong u ïa ka kyrteng bathymmai jong nga.

¹³ “Te lada pha don ki shkor, shahshkor ïa kaei kaba U Mynsiem u ong ïa ki balang!

Ka khubor ïa ka balang ha Laodikaïa

¹⁴ “Thoh ha u angel jong ka balang ha Laodikaïa: “Kane ka long ka khubor na U Amen, uba ïaineh bad u sakhi bashisha, uba long u jingsdang jong baroh kaba U Blei u la thaw.

¹⁵ Nga tip ïa kaei kaba pha la leh; nga tip ba pham long kaba khriat ne kaba shit. Katno nga kwah ba phan jin da la long kawei na kita!

¹⁶ Hynrei namar ba pha long kaba blem blem, ka bym shit lymne khriat, ngan prie noh ïa pha na ka shyntur jong nga!

¹⁷ Pha ong, ‘Nga long kaba riewspah bad kaba dap babiang; nga don baroh kaba nga donkam.’ Hynrei pham tip haduh katno pha long kaba lanot bad kaba isynei ban khmih! Pha long kaba duk, kaba lyngkhuit, bad kaba matlah.

¹⁸ Te nga ai jingmut ïa pha ban thied ksiar na nga, ka ksiar banylla, khnang ba phan riewspah. Thied ruh ïa ki jaiñkup balieh ban kup ïa lade bad ban tap ïa ka jinglyngkhuit bakhlemrain jong pha. Thied ruh katto katne ka jingtah ban tah ha ki khmat jong pha, khnang ba pha lah ban ïohi.

¹⁹ Nga sneng bad sympat ïa baroh kiba nga ieit. Long kaba thrang eh, te, bad phai noh na ki pop jong pha.

²⁰ Shahshkor! Nga ïeng ha ka jingkhang bad nga tied; lada uno uno u sngew ïa ka sur jong nga bad plie ïa ka jingkhang, ngan wan rung shapoh ka ïing jong u bad ngan ïabam bad u, bad ma u ruh un ïabam lem bad nga.

²¹ Ha kito kiba ïoh ïa ka jingjop ngan ai ïa ka hok ban shong ha syndah jong nga ha ka khet jong nga, kumba nga ruh nga la jop bad mynta nga shong ha syndah U Kpa jong nga ha ka khet jong u.

²² “Te lada pha don ki shkor, shahshkor ïa kaei kaba U Mynsiem u ong ha ki balang!”