JINGPYNPAW 21 - Khasi CL Bible (BSI)

Ka bneng kaba thymmai bad ka pyrthei kaba thymmai

¹ Nangta nga la ïohi ïa ka bneng bathymmai bad ïa ka pyrthei bathymmai. Ka bneng banyngkong bad ka pyrthei banyngkong ki la jah noh, bad ka duriaw kam don shuh.

² Bad nga la ïohi ïa ka Nongbah Bakhuid, ka Jerusalem bathymmai, kaba da wan hiar na bneng na U Blei, kaba la pynkhreh bad kaba la kloi, kum ka nongleitkurim kaba la riam ban ïashem ïa u tnga jong ka.

³ Nga la ïohsngew ïa ka sur kaba jam kaba kren na ka khet: “Mynta ka ïing jong U Blei ka long bad u bynriew! Un shong bad ki, bad kin long ki briew jong u. U Blei da lade hi un long bad ki, bad un long U Blei jong ki.

⁴ Un ñiad noh ïa ki ummat baroh na ki khmat jong ki. Yn ym don shuh ka jingïap, ym don shuh ka jingsngewsih lane ka jingïam lane ka jingpang. Kiei kiei kiba rim ki la jah noh.”

⁵ Nangta uta uba shong ha ka khet u la ong, “Bad mynta nga thaw thymmai ïa kiei kiei baroh!” U la ong ruh ïa nga, “Thoh ïa kane, namar kine ki ktien ki long kiba shisha bad kiba lah ban shaniah.”

⁶ Bad u la ong, “La pyndep! Nga long uba nyngkong bad uba khatduh, uba sdang bad uba kut. Ha uno uno uba sliang ngan ai ïa ka hok ban dih na ka umpohliew jong ka um ka jingim khlem da siewdor ïa ka.

⁷ Uno uno uba ïoh ïa ka jingjop un ïohpdiang ïa kane na nga: Ngan long U Blei jong u, bad un long u khun jong nga.

⁸ Hynrei ki khawpud, ki nongshetkylla, ki riewkhyllah, ki nongpynïap briew, kiba leh awria, kito kiba leh byrtong, kito kiba mane bleithaw, bad kiba lamler baroh — ka jaka na ka bynta jong ki ka long ka pung kaba klang da ka ding bad u kyndok, kaba long ka jingïap kaba ar.”

Ka Jerusalem bathymmai

⁹ Uwei na ki hynñiew ngut ki angel uba la don ïa ki hynñiew tylli ki pliang kiba dap da ki hynñiew tylli ki khlam kiba khatduh u la wan sha nga bad u la ong, “To wan, bad ngan pyn-i ha me ïa ka Nongleitkurim, ka tnga jong U Khunlangbrot.”

¹⁰ U Mynsiem u la bat synshar ïa nga, bad u angel u la rah ïa nga sha kliar jong u lumbah uba jrong. U la pyn-i ha nga ïa ka Jerusalem, ka Nongbah Bakhuid, kaba da wan hiar na bneng na U Blei

¹¹ bad ka da phyrnai da ka burom jong U Blei. Ka nongbah ka la phyrnai kum u mawkordor, kum u maw Jasper, kaba shai sngur bha.

¹² Ka la don ka kynroh kaba khraw, kaba jrong bad khat-ar tylli ki khyrdop lem bad ki khat-ar ngut ki angel kiba khmih ïa ki khyrdop. Ha ki khyrdop la thoh ïa ki kyrteng jong ki khat-ar jait ki paid Israel.

¹³ La don lai tylli ki khyrdop ha kawei kawei ka liang: Lai tylli ha ka phang mihngi, lai tylli ha ka phang shathie, lai tylli ha ka phang shatei, bad lai tylli ha ka phang sepngi.

¹⁴ Ïa ka kynroh jong ka nongbah la tei halor ki khat-ar tylli ki maw nongrim, kiba halor jong ki la thoh ïa ki kyrteng jong ki khat-ar ngut ki apostol jong U Khunlangbrot.

¹⁵ U angel uba la kren ha nga u la don u diengthew uba da ka ksiar ban thew ïa ka nongbah, ïa ki khyrdop jong ka, bad ïa ki kynroh jong ka.

¹⁶ Ka nongbah ka la long kaba sawdong janai, ka ïar kat ka lynter jong ka. U angel u la thew ïa ka nongbah da u diengthew jong u: Ka la don ar hajar sawspah kilomitar ka lynter bad ka la ïar bad kynjang kat ka lynter jong ka.

¹⁷ U angel u la thew ruh ïa ka kynroh, bad ka la don hynriewphew mitar ka jingkynjang, kat kum ka jingthew ba la pdiang ïa kaba u la pyndonkam.

¹⁸ Ïa ka kynroh la thaw da u maw Jasper, bad ïa ka nongbah hi la thaw da ka ksiar nylla, kaba sngur kum ka ïit.

¹⁹ Ïa ki maw nongrim jong ka kynroh ka nongbah la pynkup itynnat da ki jait maw bakordor baroh. U maw nongrim uba nyngkong u la long u maw Jasper, uba ar u maw Sapphir, uba lai u maw Agate, uba saw u maw Emerald,

²⁰ uba san u maw Oniks, uba hynriew u maw Karnelian, uba hynñiew u mawleiñ bastem, uba phra u maw Beryl, uba khyndai u maw Topas, uba shiphew u maw Khalkedon, uba khatwei u maw Turkwois, uba khat-ar u maw Amethyst.

²¹ Ki khat-ar tylli ki khyrdop ki la long ki khat-ar tylli ki mawlynnai; ïa kawei kawei ka khyrdop la shna na uwei u mawlynnai. Ka lynti bah jong ka nongbah ka la long da ka ksiar nylla, kaba lah ban ïohi lyngba kum ka ïit.

²² Ngam shym ïohi ïa ka templ ha ka nongbah, namar ka templ jong ka, u long U Trai U Blei Badonbor Baroh bad U Khunlangbrot.

²³ Ka nongbah kam donkam ïa ka sngi lane ïa u bnai ban tyngshaiñ halor jong ka, namar ba ka burom jong U Trai ka tyngshaiñ halor jong ka, bad U Khunlangbrot u long ka sharak jong ka.

²⁴ Ki briew ka pyrthei kin ïaid ha ka jingshai jong ka, bad ki syiem jong ka pyrthei kin wallam ïa ka spah jong ki shapoh jong ka.

²⁵ Ki khyrdop jong ka nongbah kin plie baroh shi sngi; yn ym khang ïa ki da lei lei, namar yn ym don ka miet hangta.

²⁶ Ïa ka jingkhraw bad ïa ka spah jong ki jaitbynriew yn wallam shapoh ka nongbah.

²⁷ Hynrei ym don kano kano ka bymkhuid ka ban ïohrung sha ka nongbah, lymne uno uno uba leh ïa kino kino kiba sngewlehrain lane uba ïathuh lamler. Tang kito ïa kiba ki kyrteng jong ki la thoh ha ka kitab kiba im jong U Khunlangbrot kin ïohrung sha kata ka nongbah.