JINGPYNPAW 20 - Khasi CL Bible (BSI)

Ki shihajar snem

¹ Nangta nga la ïohi ïa u angel ba u wan hiar na bneng, u da bat ha ka kti ïa u shabi jong ka 'liewlong khlem trai bad u kynjri uba khia.

² U la kem ïa u Ïakjakor, ïa uta u 'seiñ hyndai — kata, u Ksuid lane u Soitan — bad u la teh kynjri ïa u haduh shihajar snem.

³ U angel u la bret ïa u sha ka 'liewlong khlem trai, u la khang tala ïa ka, bad u la pynskhem ïa ka, khnang ba un ym lah ban shukor shuh ïa ki jaitbynriew tad haduh ba ki shihajar snem ki la kut. Hadien kata ïa u dei ban pyllait shipor.

⁴ Nangta nga la ïohi ïa ki khet bad ha kito kiba shong ha ki la ai ïa ka bor ban bishar. Nga la ïohi ruh ïa ki mynsiem jong kito kiba la shah pynïap namar ba ki la pynbna ïa ka jingshisha ïa kaba U Jisu u la pynpaw bad ïa ka ktien U Blei. Kim shym la mane ïa u mradkhlaw lane ïa ka dur jong u, lymne ba ki la pdiang ïa ka shab jong u mradkhlaw ha ki shyllangmat jong ki lane ha ki kti jong ki. Ki la im pat bad ki la synshar kum ki syiem bad U Khrist shihajar snem.

⁵ (Kiba sah na kiba ïap kim shym la im pat tad ynda ki shihajar snem ki la kut.) Kane ka dei ka jingpynmihpat kaba nyngkong ïa kiba ïap.

⁶ Katno kiba suk bad kiba la ïoh jingkyrkhu shikatdei eh ki long kito kiba la kynthup ha kane ka jingpynmihpat banyngkong ïa kiba ïap. Ka jingïap kaba ar kam donbor halor jong ki; kin long ki lyngdoh jong U Blei bad jong U Khrist, bad kin synshar bad u shihajar snem.

Ka jingshahjop u Soitan

⁷ Hadien ba ki shihajar snem ki la kut, yn pyllait ïa u Soitan na ka byndi jong u,

⁸ bad un mih shabar ban shukor ïa ki jaitbynriew ïa kiba la pynsakma kylleng ka pyrthei, kata ka Gog bad ka Magog. U Soitan un wallam lang ïa ki na ka bynta ka jingïaleh thma, kiba bun kat ki symboh shyiap harud ka duriaw.

⁹ Ki la saphriang kylleng ka pyrthei bad ki la kerkut ïa ka jaka sher dara jong ki briew jong U Blei bad ïa ka nongbah kaba u ieit. Hynrei ka ding ka la wan hiar na bneng bad ka la pynjot ïa ki.

¹⁰ Nangta ïa u Ksuid, uba la shukor ïa ki, la bret sha ka pung ka ding bad u kyndok, ha kaba la lah bret ïa u mradkhlaw bad ïa u nongïathuhlypa lamler, bad kin shah pynkordit mynsngi bad mynmiet junom la junom.

Ka jingbishar bakhatduh

¹¹ Nangta nga la ïohi ïa ka khet balieh kaba khraw bad ïa uta uba shong ha ka. Ka pyrthei bad ka bneng ki la phet na khmat jong u bad ym shym la ïohi shuh ïa ki.

¹² Bad nga la ïohi ïa kiba ïap, kiba rit bad kiba khraw kumjuh, kiba ïeng ha khmat jong ka khet. Ïa ki kitab la plied, bad nangta la plied sa kawei pat ka kitab, ka kitab jong kiba im. Ïa kiba ïap la bishar kat kum kaei kaba ki la leh, kumba la buh jingthoh ha ki kitab.

¹³ Nangta ka duriaw ka la aiti ïa kiba ïap jong ka. Ka jingïap bad kumjuh ka pyrthei kiba ïap, ki la aiti ïa kiba ïap kiba ki la bat. Bad ïa baroh la bishar kat kum kaei kaba ki la leh.

¹⁴ Nangta ïa ka jingïap bad ïa ka Hades la bret ha ka pung ka ding. (Kane ka pung ka ding ka long ka jingïap kaba ar.)

¹⁵ Ïa uno uno uba ïa ka kyrteng jong u ym shym la thoh ha ka kitab kiba im la bret sha ka pung ka ding.